ବ୍ରହ୍ମପୁରରେ
ଆଧୁନିକ ସାହିତ୍ୟ ଜାଗରଣରେ ସହରରେ ୧୯୬୯ରେ ଆୟୋଜିତ ‘ଓଡ଼ିଆ ଯୁବ ଲେଖକ ସମ୍ମେଳନ’ ଅଧିବେଶନର ଭୂମିକା ଗୁରୁତ୍ୱପୂର୍ଣ୍ଣ । ଯୁବଲେଖକ
ସମ୍ମେଳନ ଏକ ରାଜ୍ୟସ୍ତରୀୟ ସାହିତ୍ୟ ଉତ୍ସବ ରୂପେ ବିଗତ ଶତାଦ୍ଦୀର ସପ୍ତମ ଓ ଅଷ୍ଟମ ଦଶକ
ସନ୍ଧିକାଳରେ ପ୍ରତିବର୍ଷ ବିଭିନ୍ନ ସହରରେ ଅନୁଷ୍ଠିତ ହେଉଥିଲା । ସାଧାରଣତଃ ଡ଼ିସେମ୍ୱର ମାସ
ଶେଷ ସପ୍ତାହରେ ଦୁଇ-ତିନି ଦିନ ବ୍ୟାପୀ ଉତ୍ସବରେ ରାଜ୍ୟର ବିଭିନ୍ନ ପ୍ରାନ୍ତରୁ ସାହିତ୍ୟିକଗଣ
ଯୋଗ ଦେଉଥିଲେ । ପ୍ରତି ଅଧିବେଶନରେ ପରବର୍ତ୍ତୀ ବର୍ଷ ଲାଗି କର୍ମକର୍ତ୍ତା ନିର୍ବାଚ଼ିତ
ହୁଅନ୍ତି । ବିପ୍ଳବୀ କବିରୁ ରାଜନୀତିଜ୍ଞ ପାଲଟିଥିବା ପ୍ରସନ୍ନ କୁମାର ପାଟ୍ଟଶାଣୀ ଯୁବଲେଖକ ସମ୍ମେଳନର
ଅନ୍ୟତମ ଉତ୍ସାହୀ ସଂଗଠକ । କିନ୍ତୁ କ୍ରମାଗତ ଭାବେ ଦୀର୍ଘକାଳ ଧରି ସେ ସାଂଗଠନିକ ପଦବୀରେ
ରହିଯିବା ଏବଂ ଅବସ୍ଥାଚକ୍ରରେ ନକସଲପନ୍ଥୀ ଆନ୍ଦୋଳନ ଅବସରରେ ପଳାତକ ସାଜିବାରୁ ଅନୁଷ୍ଠାନର
ସାଂଗଠନିକ ସ୍ଥିତି ବିଶୃଙ୍ଖଳିତ ହୋଇ କ୍ରମଶଃ ବିଲୟ ଘଟିଥିଲା ।
ବ୍ରହ୍ମପୁରରେ
ଓଡ଼ିଆ ଯୁବଲେଖକ ସମ୍ମେଳନ ଅଧିବେଶନ ଆୟୋଜନରେ ସୃଷ୍ଟ ସାହିତ୍ୟିକ ପରିବେଶ ପ୍ରଭାବରେ ଓଡ଼ିଆ
ସାହିତ୍ୟ ଅନୁଷ୍ଠାନ ‘କଳିଙ୍ଗ
ସାହିତ୍ୟ ସମାଜ’ ଓ ତେଲୁଗୁ
ସାହିତ୍ୟ ଅନୁଷ୍ଠାନ ‘ବିକାଶମ’ ଗଠନ ସ୍ପଷ୍ଟ ବାରି ହୁଏ । ‘କଳିଙ୍ଗ ସାହିତ୍ୟ ସମାଜ’ର ସୁବର୍ଣ୍ଣ ଜୟନ୍ତୀ ଉତ୍ସବ ପାଳିତ ହୋଇସାରିଛି ।
‘ବିକାଶମ’ର ଜନ୍ମକାଳ ବିଂଶ ଶତାଦ୍ଦୀ ସପ୍ତମ ଓ ଅଷ୍ଟମ ଦଶକରେ
ତେଲୁଗୁ ଭାଷାଭାଷୀଙ୍କ ମଧ୍ୟରେ ସାହିତ୍ୟ ପ୍ରୀତି ଶୀର୍ଷ ସ୍ତରରେ ପହଞ୍ଚିଥିଲା । ଏଥିରେ
ମୁଦ୍ରିତ ପତ୍ରପତ୍ରିକା ମାଧ୍ୟମ ସାଜିଥିଲା । ବିଜୟୱାଡ଼ାରୁ ପ୍ରକାଶିତ ସାପ୍ତାହିକ ‘ଆନ୍ଧ୍ର ପତ୍ରିକା’, ‘ଆନ୍ଧ୍ରପ୍ରଭା’ ଓ ‘ଆନ୍ଧ୍ରଜ୍ୟୋତି’ ସାଙ୍ଗକୁ ହାଇଦରାବାଦ ଓ ବିଶାଖପାଟଣାରୁ
ପ୍ରତିମାସରେ ପ୍ରାୟ ଡ଼ଜନେରୁ ଉର୍ଦ୍ଧ୍ୱ ପେପରବ୍ୟାକ ଉପନ୍ୟାସ ପୁସ୍ତକ ପ୍ରକାଶ ପାଉଥିଲା । ସୁବିସ୍ତୃତ
ପାଠକଗୋଷ୍ଠୀ ଏହି ଲୋକପ୍ରିୟ ପ୍ରକାଶନଗୁଡ଼ିକର ପୃଷ୍ଠପୋଷକତା କରୁଥିଲେ । ବ୍ରହ୍ମପୁରର ତେଲୁଗୁ
ଭାଷାଭାଷୀ ପାଠକଶ୍ରେଣୀ ମଧ୍ୟ ଏଥିରେ ସାମିଲ ହେଉଥିଲେ ।
ସ୍ଥାନୀୟ
ଖଲ୍ଲିକୋଟ ମହାବିଦ୍ୟାଳୟରେ ଏ.ରାମକୃଷ୍ଣ ରାଓ ଇଂଲିଶ ଅଧ୍ୟାପକଭାବେ ଅବସ୍ଥାପିତ ହୋଇଥିଲେ । ସେ
୨୦ରୁ ଉର୍ଦ୍ଧ୍ୱ ତେଲୁଗୁ ଉପନ୍ୟାସ ଓ ବହୁସଂଖ୍ୟକ କ୍ଷୁଦ୍ରଗଳ୍ପ ଲେଖକ । ତାଙ୍କରି ଉପନ୍ୟାସରେ
ସ୍ୱାଧୀନୋତ୍ତର ଅବସ୍ଥାରେ କ୍ରମବର୍ଦ୍ଧିଷ୍ଣୁ ସହରୀ ସଭ୍ୟତା ଏବଂ ପରିବର୍ତ୍ତିତ ସାମାଜିକ
ବ୍ୟବସ୍ଥାରେ ପାରିବାରିକ ସ୍ଥିତି ବର୍ଣ୍ଣନା ଗୁରୁତ୍ୱଲାଭ କରୁଥିଲା । ରାମକୃଷ୍ଣ ରାଓ ଜଣେ
ଧୀରସ୍ଥିର, କମ ଉଚ୍ଚତା ବିଶିଷ୍ଟ ଚଷମାଧାରୀ ଭଦ୍ରବ୍ୟକ୍ତି । ଫୁଲ-ସ୍ଳିଭ ହାଫ-ଫୋଲଡ଼ ସହ
ଇନସାର୍ଟରେ ବାହାରନ୍ତି । ସେ ସପରିବାରେ ଭୀମାରାଓ ପେଟାରେ ରହୁଥିଲେ । ଏକ ନୂଆ ବାଇ-ସାଇକଲ ଧରି
କଲେଜ ଯାଆନ୍ତି । ତେଲୁଗୁ ଲେଖକ ଭାବେ ତାଙ୍କରି ପ୍ରତିପତ୍ତି ଥାଏ ଏବଂ ସ୍ଥାନୀୟ ତେଲୁଗୁ
ସାହିତ୍ୟିକମାନେ ତାଙ୍କ ବାସଭବନକୁ ଯା’ଆସ କରୁଥିଲେ । ରାମକୃଷ୍ଣଙ୍କ ଉଦ୍ୟମରେ ୧୫ ନଭେମ୍ୱର ୧୯୭୦ରେ ତାଙ୍କରି ଭଡ଼ାଘରେ ଦଶଜଣ
ସାହିତ୍ୟପ୍ରେମୀଙ୍କ ଗହଣରେ ‘ବିକାଶମ’ ଜନ୍ମ ନେଇଥିଲା । ସେମାନେ ସାପ୍ତାହିକଭିତ୍ତିରେ
ପ୍ରତି ରବିବାର ସକାଳେ ଏକତ୍ରୀତ ହୋଇ ସାହିତ୍ୟ ଚର୍ଚ୍ଚାରେ କିଛି କିଛି ସମୟ କଟାଉଥିଲେ ।
ସଂଭବତଃ ସାମୟିକଭାବେ ଏକ ହାତଲେଖା ପତ୍ରିକା ମଧ୍ୟ ପ୍ରକାଶ କରୁଥିଲେ ।
ସଂଯୋଗବଶତଃ ‘କଳିଙ୍ଗ ସାହିତ୍ୟ ସମାଜ’ର ବାର୍ଷିକ ଉତ୍ସବ ପୁରୀ ଗଜପତିଙ୍କ ଶାସନର ନବବର୍ଷ ‘ସୁନିଆଁ’ରେ ଉତ୍କଳ ଆଶ୍ରମଠାରେ ପାଳିତ ହେଉଥିବା ସ୍ଥଳେ ‘ବିକାଶମ’ର ବାର୍ଷିକ ଉତ୍ସବ ତେଲୁଗୁ ନବବର୍ଷ ‘ଉଗାଦି’ରେ ପ୍ରକାଶମ ହଲରେ ପାଳିତ ହେଉଥିଲା । ତତ୍କାଳୀନ
ଖ୍ୟାତନାମା ଉପାନ୍ତ ତେଲୁଗୁ ସାହିତ୍ୟିକ ପୁରୀପଣ୍ଡା ଆପଲାସ୍ୱାମୀ ଓ ବିପ୍ଳବୀ କବି ଶ୍ରୀ ଶ୍ରୀଙ୍କ
ଭଳି ପ୍ରତିଷ୍ଠିତ ସାହିତ୍ୟିକଗଣ ‘ବିକାଶମ’ କାର୍ଯ୍ୟକ୍ରମରେ ଯୋଗଦେଇ ସଂଗଠକମାନଙ୍କୁ ଉତ୍ସାହିତ
କରିଥିଲେ । ପରବର୍ତ୍ତୀ କାଳରେ ସହରର କେତେକ ଉର୍ତ୍ସଗୀକୃତ ତେଲୁଗୁ ସାହିତ୍ୟିକ ‘ବିକାଶମ’ ସହ ସଂପର୍କ ରଖିଆସିଥିଲେ ।
ଖଲ୍ଲିକୋଟ
ମହାବିଦ୍ୟାଳୟ ସରକାରୀ ପରିଚାଳନାଧୀନ ହେବାପରେ ‘ବିକାଶମ’ ଜନ୍ମର ବର୍ଷକ ମଧ୍ୟରେ ପ୍ରତିଷ୍ଠାତା ରାମକୃଷ୍ଣ
ରାଓ ଅନ୍ୟତ୍ର ବଦଳି ହୋଇ ସହର ଛାଡ଼ିଥିଲେ । ପରବର୍ତ୍ତୀ ସଭାପତି ଭାବେ ଭି.ଭି.ଗିରିଙ୍କ
ସଂପର୍କୀୟ ଡ଼କ୍ଟର ଉପାଲା ଲକ୍ଷ୍ମଣ ରାଓ ୧୯୭୧ ରୁ ୧୯୮୫ ଯାଏଁ ଦୀର୍ଘ ସମୟ ‘ବିକାଶମ’ର ସଭାପତି ପଦବୀ ଅଳଂକୃତ କରିଥିଲେ ।
No comments:
Post a Comment