ମୂଷଳ ଧାରାରେ ବର୍ଷାର ମାସକ ପରେ #ବ୍ରହ୍ମପୁରରେ ମଶା ଉପଦ୍ରବ ଏକ ଚିରାଚରିତ ସମସ୍ୟା ।
ଏ ବର୍ଷ ତାମିଲନାଡୁ ଓ ଆନ୍ଧ୍ର ପ୍ରଦେଶ ଉପକୂଳରେ
ଲଘୁଚାପ ପ୍ରଭାବରେ ଅକ୍ଟୋବର ଶେଷ ନଭେମ୍ୱର ଆରମ୍ଭରେ ବ୍ରହ୍ମପୁରରେ ବର୍ଷା ପରେ ନଭେମ୍ୱର ଶେଷ
ସପ୍ତାହରୁ ପ୍ରବଳ ମଶା । ଦିନ ସାରା ମଶା ଧୂପ, ରସାୟନ ଜାଳିଲେ ସୁଦ୍ଧା ମଶାଙ୍କ କବଳରୁ ମୁକ୍ତି
ନାହିଁ । ରାତିରେ ମଶାରୀ ଢାଙ୍କି ଶୋଇଲେ ମଧ୍ୟ ମଶାରୀ କଡ଼ରେ ଶରୀର ପହଞ୍ଚିବା ସଙ୍ଗେ ସଙ୍ଗେ
ମଶା ଦଂଶନରେ ବାରମ୍ୱାର ନିଦ୍ରାହାନୀ । ମଶା ନିୟନ୍ତ୍ରଣ ପାଇଁ ଅଧିକ କିଛି ବ୍ୟକ୍ତିଗତ ବା
ପାରିବାରିକ କ୍ଷମତା ନଥିବା ହେତୁ ପୌରପାଳିକାଙ୍କ ଦୟାକୁ ଅପେକ୍ଷା କରିବାକୁ ପଡ଼େ ।
ସହର ସାରା
ରାସ୍ତାଘାଟ ବିଶେଷ କରି ଖୋଲା ସ୍ଥାନମାନଙ୍କରେ ଅଳିଆ ଆବର୍ଜନା ଏବଂ ଖୋଲା ନର୍ଦ୍ଦମା କାରଣରୁ
ବର୍ଷା ହେବା ପରେ ପାଣି ଜମି ରହେ । ସେଠି ମଶା ଡ଼ିମ୍ୱ ଦିଏ ଏବଂ ସପ୍ତାହରୁ ଦୁଇ ସପ୍ତାହ
ମଧ୍ୟରେ ମଶା ଘରେ ପଶି ଆକ୍ରମଣ ଜାରି ରଖେ । ଏହା ଏକ ସ୍ୱାଭାବିକ ପ୍ରକ୍ରିୟା ।
ଅଳିଆ ଆବର୍ଜନା
ନାଳନର୍ଦ୍ଦମା ତ ନିୟମିତ ସଫା ହେବା କଥା । ତେବେ ବର୍ଷା ଋତୁ ଆଗରୁ ତତ୍ପରତା ସହ ସଫେଇ ଆୟୋଜନ
କଲେ ବର୍ଷା ପରେ ଆବଦ୍ଧ ଜଳର ପରିସୀମା କମିଯାଆନ୍ତା । ବ୍ରହ୍ମପୁର ପୌରପାଳିକା ପକ୍ଷରୁ ଏହି
କାର୍ଯ୍ୟକ୍ରମ ନିୟମିତ ହେବା କଥା । ତେବେ ସେଥିରେ ଅବହେଳା ହେଲେ ସଂପୃକ୍ତ ଅଞ୍ଚଳରେ ମଶାଙ୍କ ପ୍ରାଦୁର୍ଭାବ
ବୃଦ୍ଧି ପାଏ ।
ସହରର ବହୁ
ଅଞ୍ଚଳରେ ନିୟମିତ ସଫେଇ ବ୍ୟବସ୍ଥା ନଥାଏ । ଉଦାହରଣରେ ବହୁ ଜନାକୀର୍ଣ୍ଣ ସାହୀର ପଛପଟ ରାସ୍ତା ‘ସ୍କେଭେଞ୍ଜର୍ସ ଲେନ’ କିମ୍ୱା ପୌରାଞ୍ଚଳକୁ ଘେରି ରହିଥିବା ସହରତଳି
ଜନବସତି ଇତ୍ୟାଦି । ଏହି ସବୁ ଅଞ୍ଚଳରେ ସ୍ୱତନ୍ତ୍ର ଅଭିଯାନ ବିନା ସଫେଇ କାର୍ଯ୍ୟ ସଂଭବ
ହୋଇନଥାଏ ।
ବର୍ଷା ପରେ
ପରେ ସଫେଇ, ମଶାବଂଶ ନାଶ ତେଲ ସ୍ପ୍ରେ କରିବା ଏବଂ ମଶା ଉପଦ୍ରବ ଆରମ୍ଭ ହେବା ସଙ୍ଗେ ସଙ୍ଗେ ମଶା
ମରା ଧୂଆଁ ଛାଡ଼ିବା ଦ୍ୱାରା ମଶା ବଂଶ ବୃଦ୍ଧିକୁ ଆୟତ୍ତ କରିବା ସଂଭବ । କିନ୍ତୁ ଏହି
କାର୍ଯ୍ୟକ୍ରମ ଠିକ ସମୟରେ ଆୟୋଜନ ନ ହୋଇ ପାରିଲେ ଜନଜୀବନ ଅସ୍ତବ୍ୟସ୍ତ ହୋଇପଡ଼େ ।
କୁହାଯାଏ ମଶାର
ଜୀବନଚକ୍ର ଚାରିଗୋଟି ଅବସ୍ଥା ଦେଇ ଗତି କରିଥାଏ – ଡିମ୍ୱ, ଲାର୍ଭା, ପ୍ୟୁପା ଓ ପ୍ରାପ୍ତ ବୟସ୍କ
ମଶା । ଡ଼ିମ୍ୱ, ଲାର୍ଭା ଓ ପ୍ୟୁପା ଆବଦ୍ଧ ଜଳ ମଧ୍ୟରେ କଟିବା ପରେ ପ୍ରାପ୍ତ ବୟସ୍କ ମଶା ଉଡ଼ି
ବୁଲେ । ମଶା ନିପାତ କରିବା ନିମନ୍ତେ ଅଳିଆ ଆବର୍ଜନା ପରିଷ୍କାର ଓ ଆବଦ୍ଧ ଜଳ ନିୟନ୍ତ୍ରଣ
କରାଯାଇ ପାରିଲେ ମଶା ବଂଶବୃଦ୍ଧି ପ୍ରାଥମିକ ପର୍ଯ୍ୟାୟରେ ନିୟନ୍ତ୍ରଣ ସମ୍ଭବ । କିନ୍ତୁ ତାହା ନ
ହୋଇପାରିଲେ ମଶା ଧୂଆଁ ଦ୍ୱାରା ନିପାତ କରିବା ବ୍ୟତୀତ ଅନ୍ୟ ଉପାୟ ନଥାଏ ।
ଅଣ୍ଡିରା
ମଶାଙ୍କ ଜୀବଦ୍ଦଶା ପ୍ରାପ୍ତ ବୟସ୍କ ପର୍ଯ୍ୟାୟରେ ପହଞ୍ଚିବା ପରେ ୫ ରୁ ୭ ଦିନ ମଧ୍ୟରେ ସୀମିତ ରହୁଥିବା
ସ୍ଥଳେ ମାଈ ମଶା ଦୁଇ ସପ୍ତାହରୁ ଚାରି ସପ୍ତାହ ଯାଏଁ
ବଞ୍ଚେ । ଅଣ୍ଡିରା ମଶା ଗଛ ପତ୍ର ରସ ଆହାର ରୂପେ ଗ୍ରହଣ କରୁଥିବା ବେଳେ ମାଈ ମଶାର ଖାଦ୍ୟ ଗଛପତ୍ର ରସ ସହ ମନୁଷ୍ୟ ତଥା ଅନ୍ୟାନ୍ୟ ପ୍ରାଣୀଙ୍କ
ରକ୍ତ ଅନ୍ତର୍ଭୁକ୍ତ । ମାଈ ମଶା ରକ୍ତ ପାନ ପରେ ଦୁଇ ତିନି ଦିନ ବିଶ୍ରାମ ନିଏ । ଏହି ଅବସରରେ
ରକ୍ତ ହଜମ ହୋଇ ଅଣ୍ଡା ପ୍ରସ୍ତୁତ ହୋଇଥାଏ । ସ୍ଥିର ଜଳରେ ଅଣ୍ଡା ଦେବା ପରେ ମାଈ ମଶା ପୁଣି
ରକ୍ତ ଆହାର ପାଇଁ ଶୀକାର ସନ୍ଧାନରେ ବାହାରିପଡ଼େ । ମଶାଙ୍କ ଜୀବନଚକ୍ର ଅବଧି ମୁଖ୍ୟତଃ ସ୍ଥାନୀୟ
ପାଣିପାଗ ଉପରେ ନିର୍ଭରଶୀଳ ।
ବିଶ୍ୱବ୍ୟାପୀ
ପ୍ରାୟ ତିନି ହଜାର ପ୍ରଜାତିର ମଶା ଦେଖାଯାଆନ୍ତି । ମାଈ ମଶା ସକାଳ ଓ ସନ୍ଧ୍ୟାରେ କାମୁଡ଼େ ।
ଦିନର ଗରମ ସମୟରେ ଥଣ୍ଡା ଅନ୍ଧାରୁଆ ସ୍ଥାନ ଖୋଜି ବିଶ୍ରାମ ନିଏ । କିନ୍ତୁ କେତେକ ପ୍ରଜାତିର
ମଶା ଦିନ ତମାମ କାମୁଡ଼ନ୍ତି । ହୁଏତ ବ୍ରହ୍ମପୁରର ମଶା ସେହି ଭଳି ପ୍ରଜାତି ଅନ୍ତର୍ଗତ !
No comments:
Post a Comment