Two Ministers from Ganjam / ଗଞ୍ଜାମ ଜିଲ୍ଲାରୁ ଦୁଇ ମନ୍ତ୍ରୀ

 

କେନ୍ଦ୍ର କିମ୍ୱା ରାଜ୍ୟରେ ୨୦୨୪ ନିର୍ବାଚ଼ନ ପରବର୍ତ୍ତୀ ଅବସ୍ଥାରେ ଭାରତୀୟ ଜନତା ପାର୍ଟି ଦ୍ୱାରା ଗଠିତ ମନ୍ତ୍ରିମଣ୍ଡଳରେ #ବ୍ରହ୍ମପୁର ସହରର ସାଂସଦ କିମ୍ୱା ବିଧାୟକ ସାମିଲ ହୋଇନାହାନ୍ତି । ବ୍ରହ୍ମପୁର ସାଂସଦ ପ୍ରଦୀପ କୁମାର ପାଣିଗ୍ରାହୀ ଓ ବିଧାୟକ କେ. ଅନୀଲ କୁମାର ୨୦୨୪ ନିର୍ବାଚ଼ନର ମାତ୍ର କିଛି ଦିନ ପୂର୍ବରୁ ବିଜୁ ଜନତା ଦଳରୁ ଯାଇ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ । ତେଣୁ ଦଳୀୟ ମାନଦଣ୍ଡରେ ମନ୍ତ୍ରିମଣ୍ଡଳରେ ସେମାନଙ୍କ ପ୍ରତିନିଧିତ୍ୱ ସମ୍ଭବ ହୋଇପାରିନାହିଁ । ଗୋପାଳପୁର ବିଧାନସଭା ନିର୍ବାଚ଼ନମଣ୍ଡଳୀରୁ ନିର୍ବାଚ଼ିତ ବିଧାୟକ ବିଭୂତି ଜେନା ଓ ପୋଲସରା ନିର୍ବାଚ଼ନମଣ୍ଡଳୀରୁ ନିର୍ବାଚ଼ିତ ବିଧାୟକ ଗୋକୁଳାନନ୍ଦ ମଳିକ ରାଜ୍ୟ ମନ୍ତ୍ରିମଣ୍ଡଳରେ ସ୍ଥାନ ପାଇଛନ୍ତି । ରାଜଧାନୀ ଭୁବନେଶ୍ୱରଠାରେ ୧୨ ଜୁନରେ ଆୟୋଜିତ ସମାବେଶରେ ବିଭୂତି ଜେନା କ୍ୟାବିନେଟ ଓ ଗୋକୁଳାନନ୍ଦ ମଳିକ ସ୍ୱାଧୀନ ରାଷ୍ଟ୍ରମନ୍ତ୍ରୀଭାବେ ଶପଥ ନେଇଥିଲେ ।
 
ବିଭୂତି ଜେନା ବ୍ରହ୍ମପୁରରେ ଚର୍ଚ୍ଚିତ ଭାଜପା ଚ଼େହରା । ସେ ୨୦୨୧ରେ ଗଞ୍ଜାମ ଜିଲ୍ଲା ଭାଜପା ସଭାପତି ଭାବେ ମନୋନୀତ ହେବା ପରଠୁ ସହରରେ ସରକାର ବିରୋଧୀ ସଭାସମିତି ବିକ୍ଷୋଭ ନେତୃତ୍ୱ ନେଇ ଆସିଥିଲେ । ରାଷ୍ଟ୍ରୀୟ ସ୍ୱୟଂ ସେବକ ସଂଘର ସଦସ୍ୟଭାବେ ସେ ସାଂଗଠନିକ ଜୀବନ ଆରମ୍ଭ କରିଥିଲେ । ନିଜ ଗ୍ରାମ ଗୋଳନ୍ଥରାଠାରେ ଯୁବାବସ୍ଥାରେ ମଦ ବିରୋଧୀ ଆନ୍ଦୋଳନ ତାଙ୍କ ରାଜନୀତିକ ସଂଗ୍ରାମର ପ୍ରଥମ ସ୍ୱାକ୍ଷର । ସେ ୧୯୯୭ରେ ସରପଞ୍ଚ, ୨୦୦୨ରେ ଜିଲ୍ଲା ପରିଷଦ ସଭ୍ୟ, ୨୦୦୭ରୁ ୨୦୧୩ ମଧ୍ୟରେ ଦୁଇ ଥର ରାଜ୍ୟ ଯୁବମୋର୍ଚ୍ଚା ସଭାପତି ଦାୟିତ୍ୱ ନିର୍ବାହ କରିଥିଲେ । ଏହି ଅଭିଜ୍ଞତାକୁ ବିଚାରକୁ ନେଲେ ରାଜ୍ୟସ୍ତରୀୟ ଭାଜପା ସଂଗଠନ କାର୍ଯ୍ୟକ୍ରମରେ ବିଭୂତି ଜେନା ସକ୍ରିୟ ରହିଆସିଥିବା ସୁସ୍ପଷ୍ଟ । ସେ ୨୦୦୯, ୨୦୧୪ ଓ ୨୦୧୯ ତିନି ଥର ବିଧାନସଭା ନିର୍ବାଚନରେ ଗୋପାଳପୁରରୁ ଭାଜପା ପ୍ରାର୍ଥୀଭାବେ ଲଢ଼ି ପରାସ୍ତ ହୋଇଥିଲେ । ୨୦୧୯ ନିର୍ବାଚନରେ ଗୋପାଳପୁର ନିର୍ବାଚ଼ନମଣ୍ଡଳୀରୁ ବିଜୟୀ ତତ୍କାଳୀନ ବିଜୁ ଜନତା ଦଳର ପ୍ରଦୀପ କୁମାର ପାଣିଗ୍ରୀହୀଙ୍କଠାରୁ ଭୋଟ ବ୍ୟବଧାନ ଅତି କମ ରହିଥିଲା । ପରିବର୍ତ୍ତିତ ପରିସ୍ଥିତିରେ ୨୦୨୪ ନିର୍ବାଚନରେ ଗୋପାଳପୁର ନିର୍ବାଚନମଣ୍ଡଳୀରେ ଭାଜପା ଟିକଟରେ ପ୍ରଦୀପ କୁମାର ପାଣିଗ୍ରାହୀ ସାଂସଦ ଓ ବିଭୂତି ଜେନା ବିଧାୟକ ପ୍ରାର୍ଥୀ ହୋଇଥିଲେ ।
 
ଗୋକୁଳାନନ୍ଦ ମଳିକ ଗଞ୍ଜାମ ଜିଲ୍ଲା ବୁଗୁଡ଼ା ବ୍ଳକ ସଙ୍କୁରୁ ପଞ୍ଚାୟତ ଘୋଳପୁର ଗ୍ରାମ ବାସିନ୍ଦା । ତେବେ ସ୍କୁଲ ଶିକ୍ଷା ଶେଷରେ ସେ ଭୁବନେଶ୍ୱରରେ କଲେଜ ଶିକ୍ଷାର୍ଜନ କରି ସେଠାରେ ହିଁ ବ୍ୟବସାୟ ଆରମ୍ଭ କରିଥିଲେ । ରାଜନୀତିରେ ଋଚି ରଖି ୨୦୧୧ରେ ଗ୍ରାମକୁ ଫେରି କଂଗ୍ରେସ ଦଳରେ ଯୋଗ ଦେଇ ୨୦୧୨ରେ ବୁଗୁଡ଼ା ବ୍ଳକ ଅଧ୍ୟକ୍ଷ ଭାବେ ନିର୍ବାଚ଼ିତ ହୋଇଥିଲେ । ଦୁଇ ବର୍ଷ ପରେ ୨୦୧୪ ନିର୍ବାଚନରେ କଂଗ୍ରେସ ଟିକଟରେ ପୋଲସରା ବିଧାନସଭା ନିର୍ବାଚନମଣ୍ଡଳୀରେ ବିଧାୟକ ପ୍ରାର୍ଥୀ ରୂପେ ପରାଜିତ ହୋଇଥିଲେ । ତତ୍ ପରବର୍ତ୍ତୀ ଅବସ୍ଥାରେ ସେ ଭାଜପାରେ ଯୋଗ ଦେଇ ୨୦୧୯ ନିର୍ବାଚ଼ନରେ ଅବତୀର୍ଣ୍ଣ ହୋଇ ପୁଣି ହାରିଥିଲେ । ତୃତୀୟବାର ୨୦୨୪ରେ ନିର୍ବାଚ଼ିତ ହୋଇ ଭାଜପା ସରକାରରେ ସାମିଲ ହୋଇଛନ୍ତି । ପୋଲସରାର ପୂର୍ବତନ ବିଧାୟକ ଶ୍ରୀକାନ୍ତ ସାହୁ ରାଜ୍ୟ ମନ୍ତ୍ରୀମଣ୍ଡଳର ସଦସ୍ୟ ରହିଥିଲେ ।
 
ରାଜ୍ୟର ପ୍ରଥମ ଭାଜପା ମନ୍ତ୍ରୀମଣ୍ଡଳର ପ୍ରଥମ ପର୍ଯ୍ୟାୟରେ ଜିଲ୍ଲାରେ ଦୀର୍ଘ ସାଂଗଠନିକ ଅଭିଜ୍ଞତାକୁ ଗୁରୁତ୍ୱ ଦିଆଯାଇଛି । ୨୦୨୪ ନିର୍ବାଚନ ଅବସରରେ ଦଳ ପକ୍ଷରୁ ଶାଣିତ ସଂଘର୍ଷ ଆୟୋଜନ କରାଯାଇଥିବା ଅବସରରେ ଅନ୍ୟାନ୍ୟ ରାଜନୀତିକ ଦଳରୁ ଆଗତ ବହୁ ନେତାଙ୍କୁ ଟିକଟ ଦିଆଯାଇଥିଲା ସତ, କିନ୍ତୁ ଦଳୀୟ ଅନୁଭୂତିକୁ ବିଚାରକୁ ନେଇ ମନ୍ତ୍ରୀପଦରେ ଅବସ୍ଥାପିତ କରାଯାଇନାହିଁ । ଗୋପାଳପୁର ଓ ପୋଲସରା ବିଧାୟକ ଗଞ୍ଜାମ ଜିଲ୍ଲା ପ୍ରତିନିଧିତ୍ୱ କରୁଥିବା ସ୍ଥଳେ ସେମାନଙ୍କ ନିର୍ବାଚନମଣ୍ଡଳୀ ମୁଖ୍ୟତଃ ଗ୍ରାମାଞ୍ଚଳ ଅନ୍ତର୍ଗତ ହୋଇଥିବା ହେତୁ ବ୍ରହ୍ମପୁର ଭଳି ସହରାଞ୍ଚଳ ସମସ୍ୟା ସମାଧାନ ଦିଗରେ କିଭଳି ଆଭିମୁଖ୍ୟ ଗ୍ରହଣ କରିବେ ତାହା ସମୟ କହିବ ।

 Image by Minh Hung Le from Pixabay

Independent Politicians / ସ୍ୱାଧୀନ ପ୍ରାର୍ଥୀ ଓ ସ୍ଥାନୀୟ ସମସ୍ୟା

 

#ବ୍ରହ୍ମପୁର ରାଜନୀତିରେ ୨୦୨୪ ବିଧାନସଭା ନିର୍ବାଚନରେ ଅବତୀର୍ଣ୍ଣ ସ୍ୱାଧୀନ ପ୍ରାର୍ଥୀଙ୍କ ନୈରାଶ୍ୟଜନକ ପ୍ରଦର୍ଶନ ଅନୁଶୀଳନ ସ୍ଥାନୀୟ ସାମାଜିକ ବିକାଶ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ । ବ୍ରହ୍ମପୁର ବିଧାନସଭା ନିର୍ବାଚନମଣ୍ଡଳୀରେ ମୋଟ ଆଠ ଜଣ ସ୍ୱାଧୀନ ପ୍ରାର୍ଥୀ ପ୍ରତିଦ୍ୱନ୍ଦିତା କରିଥିବା ସ୍ଥଳେ ପ୍ରତ୍ୟେକଙ୍କ ଅର୍ଜିତ ଭୋଟ ସଂଖ୍ୟା ସର୍ବାଧିକରୁ ସର୍ବନିମ୍ନ ଯଥାକ୍ରମେ (୧) ୨୪,୬୬୧, (୨) ୩୭୮, (୩) ୩୬୪, (୪) ୩୪୧, (୫) ୩୨୨, (୬) ୩୧୧, (୭) ୧୩୯ ଓ (୮) ୯୩ ଗଣତି କରାଯାଇଥିଲା । ବିଧାନସଭା ନିର୍ବାଚନରେ ଅବତୀର୍ଣ୍ଣ ‘ସ୍ୱାଧୀନ ପ୍ରାର୍ଥୀ’ ଅର୍ଥ (୧) ସେମାନେ କୌଣସି ରାଜନୀତିକ ଦଳ ଅନୁଗତ ନଥିବା, (୨) ସ୍ଥାନୀୟ ସମସ୍ୟା ସମାଧାନରେ ଆଗ୍ରହୀ, (୩) ବୃତ୍ତିଗତ ‘ପ୍ରଫେସନାଲ’ କିମ୍ୱା ପ୍ରବୃତ୍ତିଗତ ‘ଭୋକେସନାଲ’ ଭାବେ ସମାଜ ସେବାରେ ଉତ୍ସର୍ଗୀକୃତ ବ୍ୟକ୍ତି ଚ଼ରିତ୍ରଙ୍କୁ ବୁଝାଏ । ନିର୍ବାଚନ ଫଳାଫଳ ତର୍ଜମା କରିବା ଅବସରରେ ଏଭଳି ମହତକାଂକ୍ଷୀ ରାଜନେତାଙ୍କ ମଧ୍ୟରୁ ସାତ ଜଣଙ୍କ ଭୋଟ ସଂଖ୍ୟା ହାରାହାରି ଅଢ଼େଇ ଶହରେ କାହିଁକି ସୀମିତ ରହିଲା ? ଏହାର ବହୁବିଧ କାରଣ ଖୋଜି ବାହାର କରାଯିବା ଅବକାଶ ଥିବା ସତ୍ତ୍ୱେ ସ୍ୱାଧୀନ ପ୍ରାର୍ଥୀମାନେ ବ୍ରହ୍ମପୁର ଜନସାଧାରଣଙ୍କ ଯେ ବିଶ୍ୱାସଭାଜନ ହୋଇପାରିନଥିଲେ, ଏହି ନିଷ୍କର୍ଷକୁ କେହି ଅସ୍ୱୀକାର କରିପାରିବେ ନାହିଁ ।

 

ଜଣେ ସ୍ୱାଧୀନ ପ୍ରାର୍ଥୀ ଯଦି ଅଢ଼େଇ ଶହ ଭୋଟ ପାଉଛନ୍ତି ତେବେ ନିଜ ପରିବାରରୁ ପାଞ୍ଚ ଖଣ୍ଡ, ସଂପ୍ରସାରିତ ପରିବାରବର୍ଗଙ୍କଠାରୁ ୨୫ରୁ ୫୦ ଖଣ୍ଡ, ପାଖପଡ଼ିଶା ୧୦ରୁ ୨୦ ପରିବାରରୁ ୫୦ରୁ ୧୦୦ ଖଣ୍ଡ ନିକଟତର ବନ୍ଧୁ ଗହଣରୁ ୫୦ରୁ ୧୦୦ ଖଣ୍ଡ ଭୋଟ ହିସାବ କରାଯାଇପାରେ । ମନସ୍ତତ୍ତ୍ୱବିତମାନେ ବନ୍ଧୁ ସଂଖ୍ୟା ପରିମାପ କଲାବେଳେ ପ୍ରତ୍ୟେକ ବ୍ୟକ୍ତିଙ୍କ ଅଢ଼େଇ ଶହ ଯାଏଁ ବ୍ୟକ୍ତିଙ୍କ ସହ ଘନିଷ୍ଠତା ଥିବା ତତ୍ତ୍ୱ ପ୍ରତିପାଦିତ କରିଥାନ୍ତି । ଏହି ପରିପ୍ରେକ୍ଷୀରେ ପ୍ରଶ୍ନ ଉଠେ ସ୍ୱାଧୀନ ପ୍ରାର୍ଥୀମାନେ ଯଦି ‘ସମାଜସେବା’ରେ ଉତ୍ସର୍ଗୀକୃତ ଜୀବନ ଅତିବାହିତ କରୁଛନ୍ତି, ତେବେ ତାହା ‘ଭୋଟ’ରେ କାହିଁକି ପରିଣତ ହୋଇ ପାରିନାହିଁ ?

 

ସରଳ ଉତ୍ତରରେ ସେମାନଙ୍କ ସମାଜସେବା ଜନସାଧାରଣଙ୍କ ଆସ୍ଥା ଜିଣି ପାରୁନାହିଁ । ଚାରିରୁ ପାଞ୍ଚ ଲକ୍ଷ ଜନସଂଖ୍ୟା ବିଶିଷ୍ଟ ବ୍ରହ୍ମପୁର ସହର ପାରମ୍ପରିକ ଭାବେ ପ୍ରଶାସନିକସ୍ତରରେ ଅବହେଳିତ । ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ପୂର୍ବରୁ ଓ ପରେ ଉପାନ୍ତ ସହରଭାବେ ମାଡ୍ରାସ ବା ଭୁବନେଶ୍ୱର ପ୍ରଶାସନିକ କେନ୍ଦ୍ରଠାରୁ ଦୂରରେ ରହିଆସିଛି । ଫଳତଃ ପ୍ରଶାସନିକ ଅଧିକାରୀମାନଙ୍କ ଦୌରାତ୍ମ୍ୟ ପ୍ରତିରୋଧ କରି ସାଧାରଣ ନାଗରିକ ତିଷ୍ଠିପାରେ ନାହିଁ । ବ୍ୟକ୍ତିଗତ ବା ସାମୂହିକ ସମସ୍ୟା ବିରୋଧରେ ସ୍ୱର ଉତ୍ତୋଳନ କରିବା ନିମନ୍ତେ କେହି ସହଭାଗୀ ମିଳନ୍ତି ନାହିଁ । ବିଧାନସଭାମଣ୍ଡଳୀରେ ଯଦି ଆଠ ଜଣ ସ୍ୱାଧୀନ ପ୍ରାର୍ଥୀ ନିର୍ବାଚନ ଲଢୁଛନ୍ତି, ତେବେ ଦଶ ଗୁଣ ଅନ୍ତତଃ ପକ୍ଷେ ଅଶୀରୁ ଶହେ ଜଣ ପ୍ରତ୍ୟକ୍ଷ ଭାବେ ରାଜନୀତିକ ଦଳ ସହବନ୍ଧିତ ନହୋଇ ସମାଜସେବା ନିମନ୍ତେ ଉତ୍ସର୍ଗୀକୃତ ନିଶ୍ଚୟ । କିନ୍ତୁ ଏହି ବୃହତ୍ତ ଶୃଙ୍ଖଳରୁ ସାଧାରଣ ନାଗରିକ କ’ଣ ସୁବିଧା ପାଇପାରୁଛନ୍ତି ? ଯଦି କିଛି ସୁବିଧା ପାଇପାରୁଥାନ୍ତେ, ତେବେ ତାହା ନିଶ୍ଚିତ ଭୋଟରେ ପରିଣତ ହୋଇଥାନ୍ତା ।

 

ସ୍ୱାଧୀନ ରାଜନୀତିକଜ୍ଞମାନଙ୍କୁ ନିଜ ସାମାଜିକ କାର୍ଯ୍ୟଧାରା ବଦଳାଇବା ସମୟ ଉପନୀତ । ଫେସବୁକ, ହ୍ୱାଟସଆପ ଓ ସ୍ମାର୍ଟଫୋନର ବହୁଳ ପ୍ରଚଳନ ପରେ ସାଧାରଣ ଜନତାଙ୍କ ସହ ଯୋଡ଼ି ହେବା ସମସ୍ୟାର ଅନ୍ତ ଘଟିଛି । ଯଦି ଜଣେ କର୍ମୀ ଦୈନିକ ଜଣେ ବ୍ୟକ୍ତି ବା ପରିବାରର ସମସ୍ୟା ସମାଧାନରେ ସହାୟତାର ହାତ ବଢ଼ାଏ, ତେବେ ପରବର୍ତ୍ତୀ ନିର୍ବାଚନ ନିମନ୍ତେ ପାଞ୍ଚରୁ ପଚାଶ ଭୋଟ ଅର୍ଜନର ପ୍ରତିଶୃତି ଆଶା କରାଯାଇପାରେ । ଦୈନିକ ୫୦ x ବାର୍ଷିକ ୩୬୫ ଦିନ x ପାଞ୍ଚ ବର୍ଷ = ନବେ ହଜାରରୁ ଲକ୍ଷେ ପ୍ରତ୍ୟକ୍ଷ ଭୋଟ ଏବଂ ଆନୁସଙ୍ଗିକ ପରୋକ୍ଷ ଭୋଟ ଅର୍ଜନର ହିସାବ ପରବର୍ତ୍ତୀ ନିର୍ବାଚନ ଲାଗି ସମର୍ଥକ ସୃଷ୍ଟି କରିବ ।

 

ପରିବର୍ତ୍ତିତ ପରିବେଶରେ ରାଜନୀତିରେ ଯେଉଁମାନେ ଆଗ୍ରହୀ ସେମାନେ ନିଜକୁ ସ୍ୱାଧୀନ ପ୍ରାର୍ଥୀ ଭାବେ ଗଢ଼ି ତୋଳିବା ନିମନ୍ତେ ଯତ୍ନବାନ ହେବା ହିଁ ପ୍ରକୃଷ୍ଟ ପନ୍ଥା । ଦଳୀୟ ରାଜନୀତିରେ ଆଗ୍ରହ, ଦକ୍ଷତା ଓ ଉତ୍ସର୍ଗୀକୃତ ଜୀବନ ଭିନ୍ନ ଅନ୍ୟ କାରଣଗୁଡ଼ିକ ନିର୍ବାଚନ ପ୍ରାର୍ଥୀ ଚୟନରେ ଗୁରୁତ୍ୱ ଲାଭ କରୁଥିବା ହେତୁ ନିଜସ୍ୱ ରାଜନୀତିକ ବ୍ୟକ୍ତିତ୍ୱ ପ୍ରତିଷ୍ଠା ହିଁ ଉଭୟ ବ୍ୟକ୍ତିଗତ ଓ ଗୋଷ୍ଠୀଗତସ୍ତରରେ ଲାଭ ଦାୟକ । ତେଣିକି ଦଳର ଦାବୀ ପୂରଣ କରିପାରି ଟିକେଟ ମିଳିଲେ ଭଲ କଥା । ବ୍ରହ୍ମପୁର ସହରରେ ସାମାଜିକ ସମସ୍ୟା ସମାଧାନ ଦିଗରେ ଉଦ୍ୟମ ସ୍ଥାନୀୟ ଜନଜୀବନ ଉନ୍ନତିରେ ସହାୟକ ହୋଇପାରିବ । ସହରର ସ୍ୱାଧୀନ ରାଜନୀତିଜ୍ଞମାନଙ୍କୁ ଏଦିଗରେ ଅନ୍ୟମାନଙ୍କ ପରାମର୍ଶରେ ସୁଚିନ୍ତିତ ଯୋଜନା ପ୍ରସ୍ତୁତ କରିବାକୁ ପଡ଼ିବ । ପାରମ୍ପରିକ ମଡ଼େଲରେ କାମ କଲେ ଭୋଟ ହାର ଅଢ଼େଇ ଶହରେ ହିଁ ଲଟକି ରହିବ !

 

ସ୍ୱାଧୀନ ଭାରତରେ ପ୍ରଥମ ବିଧାନସଭା ନିର୍ବାଚନରେ ବ୍ରହ୍ମପୁର ନିର୍ବାଚନମଣ୍ଡଳୀରୁ ୧୯୫୨ରେ ରାମ ଚନ୍ଦ୍ର ମିଶ୍ର  ଓ ଦଣ୍ଡପାଣି ଦାସ ସ୍ୱାଧୀନ ପ୍ରାର୍ଥୀ ଭାବେ ତତ୍କାଳୀନ ପ୍ରବଳ ପ୍ରତାପୀ କଂଗ୍ରେସ ପ୍ରାର୍ଥୀଙ୍କୁ ହରାଇଥିଲେ । ସେହିପରି ୧୯୭୭ ବିଧାନସଭା ନିର୍ବାଚନରେ ସ୍ୱାଧୀନ ପ୍ରାର୍ଥୀ ମହୁରି ରାଣୀ ରତ୍ନ ମଞ୍ଜରୀ ଦେବୀ ଜୟଯୁକ୍ତ ହୋଇଥିଲେ । ଏହି ସମୃଦ୍ଧ ପରମ୍ପରାରୁ ସହରର ସ୍ୱାଧୀନ ରାଜନୀତିଜ୍ଞମାନେ ସମାଜସେବାରେ ନୂତନ ଅଧ୍ୟାୟ ସୃଷ୍ଟି କରିବା ନିମନ୍ତେ ପ୍ରେରଣା ପାଇବେ ନିଶ୍ଚୟ ।

Image by Mohamed Hassan from Pixabay

Night Temperature / ରାତି ତାପମାତ୍ରା

 

#ବ୍ରହ୍ମପୁର ସହରରେ ଗ୍ରୀଷ୍ମର ପ୍ରକୋପ ସ୍ଥାନୀୟ ବାସିନ୍ଦାଙ୍କୁ ହନ୍ତସନ୍ତ କରେ । ପ୍ରତିବର୍ଷ ଫେବୃୟାରୀ ମାସ ଶିବରାତ୍ରୀରୁ ଅକ୍ଟୋବର ମାସ କୁମାର ପୂର୍ଣ୍ଣିମା ଯାଏଁ ଆଠ ମାସ ଊଣା ଅଧିକେ ଏଠାକାର ଜଳବାୟୁ ଉତ୍ତପ୍ତ ରହେ । ବର୍ଷାଋତୁରେ ସୁଦ୍ଧା ବର୍ଷଣ-ମୁଖର ସମୟତକ ବାଦ ଦେଲେ ଗରମ ଓ ଗୁଳଗୁଳି । ଜୁନ, ଜୁଲାଇ ଓ ଅଗଷ୍ଟରେ ଆକାଶ ମେଘ ଘୋଡାଇ ରହିଲେ ଗରମ ଅନୁଭୂତ ହୁଏ । ସହରବାସିନ୍ଦାଙ୍କ ମତରେ ଅତୀତରେ ଦିନରେ ତାପମାତ୍ରା ଅଧିକ ରହୁଥିଲେ ହେଁ ସନ୍ଧ୍ୟାରେ କମି ଆସୁଥିଲା ଏବଂ ରାତିରେ ସ୍ୱାଭାବିକ ସ୍ତରରେ ପହଞ୍ଚୁଥିଲା । କିନ୍ତୁ କ୍ରମଶଃ ଏଥିରେ ପରିବର୍ତ୍ତନ ଲକ୍ଷ୍ୟ କରାଯାଉଛି । ଏଣିକି ସନ୍ଧ୍ୟା ଓ ରାତିରେ ତାପମାତ୍ରା ମଧ୍ୟ ଅଧିକ ରହୁଛି ।
 
ଦେଶବ୍ୟାପୀ ସହରାଞ୍ଚଳରେ ରାତିରେ ଅପେକ୍ଷାକୃତ ଗରମ ଅନୁଭୂତ ହେଉଥିବା ହେତୁ ପାଣିପାଗ ବିଜ୍ଞାନୀମାନେ ଉଦବେଗ ପ୍ରକାଶ କରିଥିବା ଗଣମାଧ୍ୟମରେ ଚର୍ଚ୍ଚିତ । ‘ସେଣ୍ଟର ଫର ସାଇନ୍ସ ଏଣ୍ଡ ଏନଭରମେଣ୍ଟ’କର୍ତ୍ତୃକ ମେ’ ୨୦୨୪ରେ ପ୍ରକାଶିତ ଏକ ବିବରଣୀରେ କଂକ୍ରିଟ କୋଠାବାଡ଼ି – ରାସ୍ତାଘାଟ, ବାୟୁ ମଣ୍ଡଳରେ ଆଦ୍ରତା ବୃଦ୍ଧି ଓ ବିଶ୍ୱ ତାପାୟନ ’ଗ୍ଳୋବାଲ ୱାର୍ମିଂ’ ତିନି ମୁଖ୍ୟ କାରଣ ରୂପେ ଦର୍ଶାଯାଇଛି । ଦେଶର ପ୍ରମୁଖ ସହରଗୁଡ଼ିକରେ ୨୦୦୧ରୁ ୨୦୧୦ ଦଶ ବର୍ଷ ତୁଳନାରେ ୨୦୧୧ ରୁ ୨୦୨୦ ମଧ୍ୟରେ ତାପମାତ୍ରା ‘ହିଟ ଇନଡ଼େକ୍ସ’ ବୃଦ୍ଧି ପାଇଥିବା ଜଣାଯାଇଛି । ଉଦାହରଣରେ ୧୯୮୧ରୁ ବାୟୁମଣ୍ଡଳର ତାପମାତ୍ରା ୨୦୨୩ରେ ଶୂନ୍ୟ ଦଶମିକ ୬୫ ପ୍ରତିଶତ ବଢ଼ିଥିବା ତଥ୍ୟ ହସ୍ତଗତ ହୋଇଛି । ବାୟୁମଣ୍ଡଳର ତାପମାତ୍ରା ସହ ଆଦ୍ରତା ପରିମାଣ ଯୋଗ କଲେ ମନୁଷ୍ୟ ଯେଉଁ ମାତ୍ରାରେ ଉତ୍ତାପ ଅନୁଭବ କରେ ତାହାକୁ ‘ହିଟ ଇନଡ଼େକ୍ସ’ କୁହାଯାଏ । ଉଦାହରଣରେ ବ୍ରହ୍ମପୁରରେ ମେ ୨୯ ତାରିଖରେ ଦିବା ତାପମାତ୍ରା ୩୯ ଡ଼ିଗ୍ରୀ ସେଲସିଏସ ରହିଥିବା ବେଳେ ବାୟୁମଣ୍ଡଳରେ ଆଦ୍ରତା ୭୨ ପ୍ରତିଶତ କାରଣରୁ ଗରମ ୫୩ ଡ଼ିଗ୍ରୀ ସେଲସିଏସ ଅନୁଭୂତ ହୋଇଥିଲା । ସହରର ସର୍ବାଧିକ ତାପମାତ୍ରା ୪୨ ଡ଼ିଗ୍ରୀରେ ପହଞ୍ଚୁଥିବା ସ୍ଥଳେ ୨୦୨୪ ଗ୍ରୀଷ୍ମ ଋତୁରେ ସେହି ସ୍ତରକୁ ପହଞ୍ଚି ସାରିଥିବା ପ୍ରକାଶ ।
 
‘ସେଣ୍ଟର ଫର ସାଇନ୍ସ ଏଣ୍ଡ ଏନଭରମେଣ୍ଟ’ର ବିବରଣୀ ‘ଡ଼ିକୋଡ଼ିଂ ଦି ଅର୍ବାନ ହିଟ ଷ୍ଟ୍ରେସ ଏମଙ୍ଗ ଇଣ୍ଡିଆନ ସିଟିସ’ରେ ଦର୍ଶାଯାଇଛି ଯେ ଦେଶର ଜନାକୀର୍ଣ୍ଣ ସହରାଞ୍ଚଳଗୁଡ଼ିକରେ ୨୦୦୧ରୁ ୨୦୧୦ ଦଶକରେ ଗ୍ରୀଷ୍ମଋତୁରେ ଦିନ ଓ ରାତି ତାପମାତ୍ରାରେ ୬.୨ ରୁ ୧୩.୨ ପ୍ରଭେଦ ରହିଥିବା ବେଳେ ୨୦୨୩ ତାହା ୬.୨ ରୁ ୧୧.୫ସେଲସିଏସ, ଅର୍ଥାତ ଦୁଇ ଡ଼ିଗ୍ରୀ ଯାଏଁ ହ୍ରାସ ପାଇଛି । ବହୁ ଗବେଷଣାରୁ ଜଣାଯାଇଛି ଯେ ସହରାଞ୍ଚଳରେ ତାପ ପ୍ରକୋପରୁ ରକ୍ଷା ପାଇବା ଲାଗି ବହୁଳ ମାତ୍ରାରେ ଏୟାରକଣ୍ଡିସନର ବ୍ୟବହାର ସ୍ଥାନୀୟ ବାୟୁମଣ୍ଡରେ ତାପ ବୃଦ୍ଧିର ଅନ୍ୟତମ କାରଣ ।
 
ଉଦବେଗର ବିଷୟ ଏହି ଯେ ଏସିଆ ମହାଦେଶରେ ତାପମାତ୍ରା ଆନ୍ତର୍ଜାତିକସ୍ତରରେ ତାପମାତ୍ରାଠାରୁ ଅଧିକ ରହୁଛି । ତେବେ ବିଶ୍ୱ ତାପାୟନ ସଂପର୍କରେ ଆଲୋଚନା କଲେ ବ୍ରହ୍ମପୁରବାସୀ ହୁଏତ କହିବେ “ଆମେ ବୁଝୁଛୁ,  କିନ୍ତୁ ନିଜେ କ’ଣ କରିପାରିବୁ ?” ଏହାର ସରଳ ଉତ୍ତର ହେଲା ବ୍ୟକ୍ତିଙ୍କ ସମଷ୍ଟିରେ ପରିବାର, ସମାଜ, ରାଜ୍ୟ, ରାଷ୍ଟ୍ର ଓ ବିଶ୍ୱର ସୃଷ୍ଟି । ପ୍ରତ୍ୟେକ ବ୍ୟକ୍ତି ବିଶ୍ୱ-ତାପାୟନ ରୋକିବା ଲାଗି ଉଦ୍ୟମ କଲେ ଯାଇ ପରିବର୍ତ୍ତନ ସମ୍ଭବ । ବ୍ୟକ୍ତିଗତ ଉଦ୍ୟମ ସ୍ଥୁଳ ସ୍ତରରେ ଅଲୋଡ଼ା ପ୍ରଭାବହୀନ ପ୍ରତୀୟମାନ ହୋଇପାରେ । କିନ୍ତୁ ଆନ୍ତର୍ଜାତିକ ତାପାୟନ ପ୍ରତିରୋଧ ଅଭିଯାନରେ ଅଂଶୀଦାର । ଆମେ ପରିବାର ପିଛା ଏକରୁ ଅଧିକ ମଟର ସାଇକଲ, ରେଫ୍ରିଜେରେଟର, ଏୟାରକଣ୍ଡିସନର କ୍ରୟକୁ ପ୍ରଗତିର ଅଂଶ ଭାବିବା ଆରମ୍ଭ କରିଥିବା ସ୍ଥଳେ ୟୁରୋପ ବାସିନ୍ଦା ସାଇକଲରେ ସହରର ଘୁରି ବୁଲୁଛନ୍ତି । ବର୍ଲିନରେ ରାସ୍ତାଘାଟରୁ ୨୦୩୦ ସୁଦ୍ଧା ମଟରଗାଡ଼ି ହଟାଇ ଦେବା ଲାଗି ଉଦ୍ୟମ ଆରମ୍ଭ ହୋଇଛି । ଆମ ମାନସିକତାରେ ପରିବର୍ତ୍ତନ ନହେବା ଯାଏଁ ତାପମାତ୍ରା ହାର ବଢ଼ି ଚାଲିଥିବ । ଏଥିରେ ସନ୍ଦେହ ନାହିଁ । ଏହି କ୍ଷେତ୍ରରେ କୌଣସି କୈଫୟତ କାମ ଦେବ ନାହିଁ ।
 
ତାପମାତ୍ରା ହ୍ରାସ ଅଭିଯାନରେ ସାମିଲ ହେବା ନିମନ୍ତେ ଭାରତରେ ପରିବେଶ ସଚ଼େତନ ସମାଜର ଉଚ୍ଚବର୍ଗସ୍ତରରେ କାଁ ଭାଁ ଉଦ୍ୟମ ଆରମ୍ଭ ହୋଇଛି । ନିକଟରେ ‘କାଉନସିଲ ଅଫ ସାଇଣ୍ଟିଫିକ ଏଣ୍ଡ ଇଣ୍ଡଷ୍ଟ୍ରିଆଲ ରିସର୍ଚ୍ଚ’ରେ ନିଯୁକ୍ତ କର୍ମଚାରୀମାନଙ୍କୁ ସପ୍ତାହରେ ଥରେ ସୋମବାର ଦିନ ବିନା ଇସ୍ତ୍ରୀ କରା ପୋଷାକରେ ଅଫିସ ଆସିବାକୁ ପ୍ରବର୍ତ୍ତା ଯାଇଛି । ପୋଷାକପତ୍ର ଇସ୍ତ୍ରୀ ‘ଆଇରନ’ କରିବା ନିମନ୍ତେ କୋଇଲା କିମ୍ୱା ବିଦ୍ୟୁତ ବ୍ୟବହାର ହୁଏ । ବିଭିନ୍ନ ସଂଗଠିତ କାର୍ଯ୍ୟକ୍ଷେତ୍ରରେ ନିଯୁକ୍ତ କର୍ମଚାରୀମାନେ ଦିନେ ସୁଦ୍ଧା ବିନା ଇସ୍ତ୍ରୀରେ ପୋଷାକ ପରିଧାନ ଅଭ୍ୟାସ ବଳବତ୍ତର ରଖିଲେ ଏକ ପକ୍ଷରେ ବ୍ୟାପକ ପରିମାଣରେ ଶକ୍ତି ସଞ୍ଚିତ ହେବ, ଅପରପକ୍ଷରେ ଦୈନନ୍ଦିନ ଜୀବନଚର୍ଯ୍ୟାର ବିଭିନ୍ନ ସ୍ତରରେ ଶକ୍ତି ସଂରକ୍ଷଣ ନିମନ୍ତେ ଆଗ୍ରହ ସୃଷ୍ଟି ହେବ । ଏଥିରୁ ଆମର ଯଥେଷ୍ଟ ଶିଖିବାର ନାହିଁ କି ?

Image by Bruno from Pixabay

Lychee / ଲିଚୁ

 

#ବ୍ରହ୍ମପୁର ବଜାରରେ ଲିଚୁ ପସରା ବିଗତ ତିନି ଦଶନ୍ଧିର ପରମ୍ପରା । ପଚାଶ ବର୍ଷ ପୂର୍ବେ ଏଠାରେ ଲିଚୁ ବିକ୍ରୀ ହେଉନଥିଲା । ବିଂଶ ଶତାଦ୍ଦୀ ସପ୍ତମ ଦଶକ ଆରମ୍ଭରେ କାଁ ଭାଁ କୋଲକତା ଫେରନ୍ତା ଟ୍ରେନ ଯାତ୍ରୀ ହାୱାଡ଼ା ରେଳଷ୍ଟେସନରେ ବିକ୍ରୀ ହେଉଥିବା ଲିଚୁ କୋଳି ନେଇ ବ୍ରହ୍ମପୁର ପହଞ୍ଚୁଥିଲେ । ପୂର୍ବରୁ ଠିକ ସେହିପରି ତୃତୀୟ ଦଶକରେ ଟମାଟୋ ଫଳ କୋଲକତା ଦେଇ ହିଁ ଏଠାରେ ପହଞ୍ଚିଥିଲା । ଲିଚୁ ବ୍ରହ୍ମପୁର ଆଖପାଖ ଅଞ୍ଚଳରେ ଚାଷ ହେଉନଥିବା ହେତୁ ଏଠାରେ ପ୍ରଚଳନ ନଥିଲା । ବିଗତ ତିନି ଦଶନ୍ଧି ଧରି ବ୍ରହ୍ମପୁରକୁ କୋଲକତା ଲିଚୁ କୋଳି ଆମଦାନୀ ଅବ୍ୟାହତ ରହିଛି ।
 
ଗ୍ରୀଷ୍ମ ଋତୁ ମେ-ଜୁନ ମାସରେ ପାଚ଼ିଲା ଲିଚୁ କୋଳି ଅମଳ କରାଯାଏ । ଭାରତରେ ବିହାର, ଝାଡ଼ଖଣ୍ଡ, ପଶ୍ଚିମବଙ୍ଗ, ଆସାମ ଭଳି ରାଜ୍ୟଗୁଡ଼ିକରେ ଦୀର୍ଘ କାଳରୁ ଲିଚୁ ଚାଷ ହୋଇଆସୁଛି । ବିଗତ କିଛି ବର୍ଷ ଧରି ୧୯ ଗୋଟି ରାଜ୍ୟକୁ ସରକାରୀ ପ୍ରୋତ୍ସାହନରେ ଲିଚୁ ଚାଷ ସଂପ୍ରସାରିତ ହୋଇଥିବା ଜଣାଯାଏ । ଦେଶରେ ପ୍ରାୟ ୯୮ ହଜାର ହେକ୍ଟର ଜମିରେ ବିସ୍ତୃତ ଲିଚୁ ବଗିଚାରୁ ବାର୍ଷିକ ସାତ ଲକ୍ଷ ଟନ ଲିଚୁ ଫଳେ । ଓଡ଼ିଶାର ସମ୍ୱଲପୁର ଓ ପଶ୍ଚିମ ଓଡ଼ିଶାର ଅନ୍ୟ କେତେକ ସ୍ଥାନରେ ଲିଚୁ ଅମଳ ହେଉଥିଲେ ହେଁ ବ୍ରହ୍ମପୁର ବଜାରକୁ ସେଠାକାର ଲିଚୁ ପ୍ରାୟ ଆସେ ନାହିଁ ।
 
ଆଜିକାଲି ବ୍ରହ୍ମପୁରରେ ଲିଚୁ ଡାଳପତ୍ର ସହ  କିଲୋଗ୍ରାମ ଦର ୨୦୦ ଟଙ୍କାରୁ ଆରମ୍ଭ ହୋଇ ୧୫୦ ଟଙ୍କାକୁ ହ୍ରାସ ପାଏ । ସାବିତ୍ରୀ ଅମବାସ୍ୟା ଯାଏଁ ଚଢ଼ା ଦର ରହୁଥିବା ସ୍ଥଳେ ସାବିତ୍ରୀ ଅମବାସ୍ୟା-ପର ଅବସ୍ଥାରେ ଦର କମିଥାଏ । ପଶ୍ଚିମବଙ୍ଗର ମୁର୍ଶିଦାବାଦ, ନଦିଆ, ୨୪-ପ୍ରଗଣା ଓ ହୁଗୁଳି ଜିଲ୍ଲାରେ ଲିଚୁ ବଗିଚା ରହିଛି । ଲିଚୁ ଗଛଗୁଡ଼ିକ ଜାମୁକୋଳି ଗଛ ଭଳି ବୃହତ ଆକାର । ଗୋଟିଏ ହୃଷ୍ଟପୃଷ୍ଟ ଫଳନ୍ତି ଲିଚୁ ଗଛରୁ ବର୍ଷରେ ୨୦୦ କିଲୋଗ୍ରାମ ଯାଏଁ ଲିଚୁ ଫଳେ । ଲିଚୁ ଚାଷୀମାନେ ମଧ୍ୟସ୍ଥି ବ୍ୟବସାୟୀଙ୍କୁ ଲିଚୁ ଗଛରୁ ଅମଳ ନିମନ୍ତେ ବର୍ଷକ ପାଇଁ ଠିକା ଦିଅନ୍ତି । ଗଛ ପ୍ରତି ସାତରୁ ଆଠ ହଜାର ଟଙ୍କା ଠିକା ଦର ନିର୍ଦ୍ଧାରିତ ହୁଏ । ଫଳରେ ଚାଷୀ କିଲୋଗ୍ରାମ ପିଛା ୩୫ ରୁ ୪୦ ଟଙ୍କା ପାଏ । ଚାଷୀଠାରୁ (୧) ମଧ୍ୟସ୍ଥି, (୨) ପଶ୍ଚିମବଙ୍ଗ ପାଇକାରୀ ବେପାରୀ, (୩) ପଶ୍ଚିମବଙ୍ଗରୁ ବ୍ରହ୍ମପୁର ପରିବହନ ଖର୍ଚ୍ଚ, (୪) ବ୍ରହ୍ମପୁରରେ ପାଇକାରୀ ବେପାରୀ, (୫) ସ୍ଥାନୀୟ ଖୁଚୁରା ବେପାରୀ, (୬) ଆନୁସଙ୍ଗିକ ଖର୍ଚ୍ଚ ଓ (୭) ନଷ୍ଟ ହୋଇଯାଇଥିବା କୋଳି ହିସାବ ମଧ୍ୟ ଦେଇ ଖାଉଟୀ ପାଖରେ ପାଞ୍ଚଗୁଣ ଦାମରେ ଲିଚୁ କୋଳି ପହଞ୍ଚେ !
 
ବିହାର ରାଜଧାନୀ ପାଟଣାଠାରୁ ୭୫ କିଲୋମିଟର ଦୂରରେ ଅବସ୍ଥିତ ମୁଜାଫରପୁର ଜିଲ୍ଲାର ‘ସାହୀ ଲିଚୁ’ କୋଳି ଜି.ଆଇ (ଜିଓଗ୍ରାଫିକାଲ ଇଣ୍ଡିକେସନ) ମାନ୍ୟତା ପାଇଛି । ‘ସାହୀ ଲିଚୁ’ର ସ୍ୱାଦ ମିଠା, ସୁଗନ୍ଧିତ, ଅଧିକ ଫଳ ଓ ମଞ୍ଜି ଛୋଟ । ‘ସାହୀ ଲିଚୁ’ର ଆଦର ଅଧିକ । ଏତଦ୍ ବ୍ୟତୀତ ଚାଇନା, ଲାଲିମା, ସମ୍ପଦ ଓ ଯୋଗିତା ନାମରେ ଅନ୍ୟାନ୍ୟ କିମସର ଲିଚୁ ଚାଷ କରାଯାଏ । ଆନ୍ତର୍ଜାତିକସ୍ତରରେ ଲିଚୁ ଚାଷରେ ଚୀନ ଅଗ୍ରଣୀ ଏବଂ ଥାଇଲ୍ୟାଣ୍ଡ, ଭିଏତନାମରେ ମଧ୍ୟ ଲିଚୁ ଚାଷ ହୁଏ । ଏପ୍ରିଲ ୨୦୨୪ରେ ପ୍ରବଳ ଗ୍ରୀଷ୍ମ ଲହରି ହେତୁ ଲିଚୁ କୋଳି କଞ୍ଚା ଅବସ୍ଥାରେ ବିହାରରେ ଝଡ଼ି ଯାଇଥିଲା ଏବଂ ଏହାଫଳରେ ୫୦ ପ୍ରତିଶତ ଯାଏଁ କମ ଉତ୍ପାଦନ ହେବା ବିଶେଷଜ୍ଞମାନେ ଆକଳନ କରିଛନ୍ତି ।
 
ବ୍ରହ୍ମପୁର ରାଜରାସ୍ତା କଡ଼େ ବିଛୁରିତ ଉଠା ଫଳ ଦୋକାନଗୁଡ଼ିକ ସମେତ ଅନ୍ନପୂର୍ଣ୍ଣା ବଜାର, ସତ୍ୟନାରାୟଣ ମନ୍ଦିର ରୋଡ଼ ଓ ଖଲ୍ଲିକୋଟ ବିଶ୍ୱବିଦ୍ୟାଳୟ ଆଖପାଖ ଅଞ୍ଚଳରେ ଟ୍ରଲି ରିକ୍ସାରେ ଲିଚୁ ବିକ୍ରୀ ହୁଏ । ଅପରାହ୍ନ ବଜାର ଗହଳିରେ ଲିଚୁ ପସରାଗୁଡ଼ିକରେ ବାରମ୍ୱାର ପାଣି ଛଟା ଯାଏ । ପ୍ରତୀୟମାନେ ହୁଏ ସତେ ଯେପରି ଲିଚୁ ସଦ୍ୟ ଗଛ ତୋଳା ଏବଂ ଗ୍ରୀଷ୍ମ ପ୍ରବାହରେ ସତେଜ ରଖିବା ନିମନ୍ତେ ଜଳ ସିଞ୍ଚନ କରାଯାଉଛି । କିନ୍ତୁ ପ୍ରକୃତପକ୍ଷେ ସୁଦୂର ପଶ୍ଚିମବଙ୍ଗରରେ ଲିଚୁ ଗଛରୁ କୋଳି ତୋଳା ଯିବା ପ୍ରାୟ ସପ୍ତାହକ ପରେ ବ୍ରହ୍ମପୁର ବଜାରରେ ପହଞ୍ଚିଥାଏ । ଲିଚୁ ଚାଷୀମାନେ ଦୁଇ ସପ୍ତାହର ସତେଜତା (ସେଲଫ-ଲାଇଫ)କୁ ଚାରି ସପ୍ତାହ ଯାଏଁ ବୃଦ୍ଧି ସକାଶେ ବୈଷୟିକ କୌଶଳ ପ୍ରୟୋଗ ସୁବିଧା ସୁଯୋଗ ଲାଗି ସରକାରଙ୍କଠାରେ ଦାବୀ କରୁଛନ୍ତି । ଚଢ଼ା ଦରରେ ବ୍ରହ୍ମପୁରରେ ବିକ୍ରୀ ହେଉଥିବା ଲିଚୁ ସ୍ଥାନୀୟ ବାସିନ୍ଦାଙ୍କ ବଦଳରେ ଆଖପାଖ ଅଞ୍ଚଳରୁ ବ୍ରହ୍ମପୁର ପରିଦର୍ଶନରେ ଆସିଥିବା ଆଗନ୍ତୁକ ଅଧିକ କିଣନ୍ତି ବୋଲି ଲିଚୁ ବିକ୍ରେତାମାନେ କହନ୍ତି । ଅର୍ଥାତ, ଆମ ଅଞ୍ଚଳରେ ଲିଚୁ ଏକ ‘ଅଜଣା ଫଳ’ର ମାନ୍ୟତା ଏ ଯାଏଁ ବଳବତ୍ତର ରହିଛି !

Image by Xuan Duong from Pixabay

Representation in Central Ministry / କେନ୍ଦ୍ର ମନ୍ତ୍ରୀମଣ୍ଡଳରେ ପ୍ରତିନିଧିତ୍ୱ

 

ସ୍ୱାଧୀନ ଭାରତ କେନ୍ଦ୍ର ମନ୍ତ୍ରୀମଣ୍ଡଳରେ #ବ୍ରହ୍ମପୁର ସହରରୁ ପ୍ରଧାନମନ୍ତ୍ରୀ, ମନ୍ତ୍ରୀ ଓ ରାଷ୍ଟ୍ରମନ୍ତ୍ରୀ ପାହ୍ୟାରେ ପ୍ରତିନିଧିତ୍ୱ ରହିଛି । ଏତଦ୍ ବ୍ୟତୀତ ରାଷ୍ଟ୍ରପତି ଓ ଉପ-ରାଷ୍ଟ୍ରପତି ପଦବୀରେ ମଧ୍ୟ ବ୍ରହ୍ମପୁରବାସୀ ଅଧିଷ୍ଠିତ । ବ୍ରହ୍ମପୁର ଜନ୍ମିତ ବରାହ ଗିରି ଭେଙ୍କଟ ଗିରି ରାଷ୍ଟ୍ରପତି, ଉପ-ରାଷ୍ଟ୍ରପତି ଓ କେନ୍ଦ୍ରମନ୍ତ୍ରୀ ପଦବୀ ହାସଲ କରିଥିଲେ । ତେବେ ବ୍ରହ୍ମପୁର ଲୋକସଭା ଆସନରୁ ସେ କେବେ ନିର୍ବାଚିତ ହୋଇନଥିଲେ । ଭି.ଭି.ଗିରିଙ୍କ ପରିବାର ଖ୍ରୀଷ୍ଟିଆନ ହସପିଟାଲ ପଛପଟ ହିଲପାଟଣା ତଥା ବର୍ତ୍ତମାନର ଗିରିରୋଡ଼ରେ ବସବାସ କରୁଥିଲେ । ସରକାରୀ ବାଳିକା ବିଦ୍ୟାଳୟ ଓ ତତ୍ ସଂଲଗ୍ନ କୋଠା ସେମାନଙ୍କ ଆବାସ ଥିଲା । ନିଜସ୍ୱ ବାସଭବନରୁ ଏକାଂଶ ବାଳିକା ବିଦ୍ୟାଳୟ ସ୍ଥାପନ ନିମନ୍ତେ ଦାନ କରାଯାଇଥିଲା । ବର୍ତ୍ତମାନ ସୁଦ୍ଧା ଗିରିଙ୍କ ବନ୍ଧୁବାନ୍ଧବ ସଂଲଗ୍ନ କୋଠାରେ ବସବାସ କରନ୍ତି ।
 
ଭି.ଭି. ଗିରିଙ୍କ ପିତା, ଜେଜେ ବାପା ଓ ଅଜା ଆଇନଜୀବୀ ଥିଲେ । ଗିରି ନିଜ ଘର ପାଖ ବାପିଷ୍ଟ ଚର୍ଚ୍ଚ ପ୍ରାଥମିକ ବିଦ୍ୟାଳୟ, ଗୋସାଣି ନୂଆଗାଁସ୍ଥିତ ଖଲ୍ଲିକୋଟ କଲେଜିଏଟ ହାଇସ୍କୁଲ ଓ ଖଲ୍ଲିକୋଟ କଲେଜରେ ଅଧ୍ୟୟନ ସାରି ମାଡ୍ରାସ ଓ ଆୟରଲ୍ୟାଣ୍ଡ ଯାତ୍ରା କରିଥିଲେ । ସେ ୧୯୧୬ରେ ବ୍ରହ୍ମପୁର ଫେରିବା ପରେ ମୁନସିଫ ଭାବେ ନିଯୁକ୍ତ ହୋଇଥିଲେ । କିନ୍ତୁ ଚାକିରୀ ଛାଡ଼ି ସ୍ୱାଧୀନଭାବେ ଆଇନ ବ୍ୟବସାୟ ସାଙ୍ଗକୁ କଂଗ୍ରେସ କାର୍ଯ୍ୟକ୍ରମରେ ଯୋଗ ଦେଇଥିଲେ । ଗିରି ୧୯୩୫ରେ ବିଶାଖାପାଟଣା ନିର୍ବାଚନ ମଣ୍ଡଳୀରୁ ପ୍ରଥମ ଥର ପାଇଁ ମାନ୍ଦ୍ରାଜ କେନ୍ଦ୍ରୀୟ ବିଧାନସଭାକୁ ନିର୍ବାଚିତ ହୋଇ ବ୍ୟବସ୍ଥାପକ ଜୀବନ ଆରମ୍ଭ କରିଥିଲେ । ୧୯୫୨ରେ ଅନୁଷ୍ଠିତ ଭାରତର ପ୍ରଥମ ସାଧାରଣ ନିର୍ବାଚନରେ ଆନ୍ଧ୍ରପ୍ରଦେଶର ଲୋକସଭା ଆସନରୁ ଜୟଯୁକ୍ତ ହୋଇ କେନ୍ଦ୍ରମନ୍ତ୍ରୀମଣ୍ଡଳରେ ସ୍ଥାନ ପାଇଥିଲେ । ଗିରି ୧୯୬୭ରେ ଉପ-ରାଷ୍ଟ୍ରପତି ଓ ୧୯୬୯ରେ ରାଷ୍ଟ୍ରପତି ପଦବୀ ଅଳଂକୃତ କରିଥିଲେ ।
 
ରାଜକୋଣ୍ଡା ଜଗନ୍ନାଥ ରାଓ ବ୍ରହ୍ମପୁର ଲୋକସଭା ନିର୍ବାଚନ ମଣ୍ଡଳୀରୁ ୧୯୬୭ରୁ କ୍ରମାଗତ ଭାବେ ପାଞ୍ଚ ଥର ୧୯୮୪ ଯାଏଁ ସାଂସଦ ଭାବେ ନିର୍ବାଚିତ ହୋଇ କେନ୍ଦ୍ରମନ୍ତ୍ରୀମଣ୍ଡଳରେ ରାଷ୍ଟ୍ରମନ୍ତ୍ରୀ ପାହ୍ୟାରେ ଅବସ୍ଥାପିତ ହୋଇଥିଲେ । ସାଧାରଣରେ ଜଗନ୍ନାଥ ରାଓ ଦିଲ୍ଲୀ ବାସିନ୍ଦା ଥିଲେ ଏବଂ ବ୍ରହ୍ମପୁର ପରିଦର୍ଶନ କରି ରାଜନୀତିକ ସଂପର୍କ ରଖୁଥିଲେ । ତେବେ ୧୯୭୭, ୧୯୮୦ ଓ ୧୯୯୧ରେ ବ୍ରହ୍ମପୁର ବାସିନ୍ଦା ରାମଚନ୍ଦ୍ର ରଥ ବ୍ରହ୍ମପୁର ବାସିନ୍ଦା ହୋଇଥିଲେହେଁ ଆସିକା ଲୋକସଭା ନିର୍ବାଚନମଣ୍ଡଳୀରୁ ନିର୍ବାଚିତ ହୋଇ ରାଷ୍ଟ୍ରମନ୍ତ୍ରୀ ପଦବୀ ଗ୍ରହଣ କରିଥିଲେ । ରାମଚନ୍ଦ୍ର ରଥଙ୍କ ରାଜନୀତିକ ବିରୋଧି ଭାବେ ପରିଗଣିତ ପି.ଭି.ନରସିଂହ ରାଓ ୧୯୯୧ରେ ପ୍ରଧାନମନ୍ତ୍ରୀ ପଦାସୀନ ହେବାପରେ ଉପନିର୍ବାଚନରେ ବ୍ରହ୍ମପୁର ଲୋକସଭା ନିର୍ବାଚନମଣ୍ଡଳୀରୁ ନିର୍ବାଚିତ ହୋଇଥିଲେ । ପି.ଭି.ନରସିଂହ ରାଓଙ୍କ ବ୍ରହ୍ମପୁର ରାଜନୀତିକ କାର୍ଯ୍ୟକ୍ରମରେ ପ୍ରାୟତଃ କୌଣସି ସଂପର୍କ ରହୁନଥିଲା । ତେବେ ଏହି ଅଞ୍ଚଳର ଦରଖାସ୍ତଗୁଡ଼ିକୁ ସେ ବିଚାରକୁ ନେଉଥିଲେ । ସ୍ଥାନୀୟ ଏକ ସାମାଜିକ ସଂଗଠନ ‘ଓଡ଼ିଶା ଇଣ୍ଟରନେସନାଲ ସୋସାଇଟି’ ପକ୍ଷରୁ ‘ବ୍ରହ୍ମପୁର’ ସହରର ଇଂଲିଶ ବନାନ ସରକାରୀ ନଥିପତ୍ରରେ ‘ବେରହମପୁର’ ଚଳି ଆସୁଥିବା ହେତୁ ସଂଶୋଧନ ଲାଗି ଏକ ନିବେଦନ ପତ୍ର ନରସିଂହ ରାଓଙ୍କ ଠାରେ ପେଶ କରାଯାଇଥିଲା । ସେହି ସମୟରେ ଜାଫର ସରିଫ କେନ୍ଦ୍ର ରେଳମନ୍ତ୍ରୀ ଥିଲେ ଏବଂ ସେ ଲଣ୍ଡନରେ ଚିକିତ୍ସିତ ହେଉଥିବା ହେତୁ ରେଳ ମନ୍ତ୍ରଣାଳୟ ପ୍ରଧାନମନ୍ତ୍ରୀଙ୍କ ଅଧୀନରେ ଥାଏ । ରେଳ ବିଭାଗ ନଥିପତ୍ରରେ ‘ବେରହମପୁର’ ବଦଳରେ ‘ବ୍ରହ୍ମପୁର’ ସଂଶୋଧନ ନିମନ୍ତେ ତୁରନ୍ତ ନିଷ୍ପତ୍ତି ଗ୍ରହଣ କରାଯାଇଥିଲା । ଏହିଭଳି ସଂଶୋଧନ ନିମନ୍ତେ ରାଜ୍ୟ ସରକାର, ଡ଼ାକ ବିଭାଗ ଓ ବ୍ରହ୍ମପୁର ବିଶ୍ୱବିଦ୍ୟାଳୟକୁ ଦରଖାସ୍ତର ନକଲ ପ୍ରଦାନ କରାଯାଇଥିଲେହେଁ କେହି ଉଚ଼ିତ ପଦକ୍ଷେପ ଗ୍ରହଣ କରିନଥିଲେ ।
 
ଦୀର୍ଘ ସମୟ ଅନ୍ତରରେ ୨୦୦୪ରେ ମନମୋହନ ସିଂଙ୍କ କଂଗ୍ରେସ ମନ୍ତ୍ରୀମଣ୍ଡଳରେ ବ୍ରହ୍ମପୁର ସାଂସଦ ଚନ୍ଦ୍ର ଶେଖର ସାହୁ କେନ୍ଦ୍ର ଗ୍ରାମ ଉନ୍ନୟନ ବିଭାଗର ରାଷ୍ଟ୍ରମନ୍ତ୍ରୀ ଭାବେ ଅବସ୍ଥାପିତ ହୋଇଥିଲେ । କେନ୍ଦ୍ର ମନ୍ତ୍ରୀମଣ୍ଡଳରେ ବ୍ରହ୍ମପୁର ସହର ସହ ସଂଶ୍ଳିଷ୍ଟ ରାଜନୀତିକ ନେତୃବର୍ଗଙ୍କ ପ୍ରତିନିଧିତ୍ୱ ରହିଆସିଥିଲେ ହେଁ ବ୍ରହ୍ମପୁରରେ କୌଣସି ଉଲ୍ଲେଖଯୋଗ୍ୟ ଅବଦାନ ଲକ୍ଷ୍ୟ କରିହୁଏ ନାହିଁ । ଆର.ଜଗନ୍ନାଥ ରାଓ ରାଷ୍ଟ୍ରମନ୍ତ୍ରୀ ଥିବା ବେଳେ ବ୍ରହ୍ମପୁର ବଡ଼ ଡ଼ାକଘର କୋଠା ନିର୍ମିତ ହୋଇଥିଲା । ସହରରେ କେନ୍ଦ୍ର ସରକାରଙ୍କ ପରିଚାଳନାଧୀନ ସେହି ଗୋଟିଏ ହିଁ ବଡ଼ କୋଠା ଥିଲା । ପରେ ଆୟକର ଭବନ ଓ କେନ୍ଦ୍ରୀୟ ବିଦ୍ୟାଳୟ ନିର୍ମିତ ହୋଇଥିଲା । ମୌଳିକ ଭାବେ ଏକ ବାଣିଜ୍ୟ ପେଣ୍ଠ ଭାବେ ଗଢି ଉଠିଥିବା ବ୍ରହ୍ମପୁର ନିଜସ୍ୱ ଶୈଳୀରେ ବିକଶିତ ହୋଇଚାଲିଛି । ୨୦୨୪ ନିର୍ବାଚନୀ ସଭାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବ୍ରହ୍ମପୁରକୁ ଏକ ‘ବାଣିଜ୍ୟ ପେଣ୍ଠ’ ଭାବେ ହିଁ ସଂବୋଧିତ କରିଥିଲେ ।

Image by Vicki Hamilton from Pixabay

First Elections Experience / ପ୍ରଥମ ନିର୍ବାଚନ ଅନୁଭୂତି

 

#ବ୍ରହ୍ମପୁର ସହରବାସୀ ପ୍ରଥମ ଥର ନିମନ୍ତେ ୧୯୨୦ ନିର୍ବାଚନରେ ଅଂଶଗ୍ରହଣ କରି ଜନପ୍ରତିନିଧି ମନୋନୀତ କରିବା ସୁଯୋଗ ପାଇଥିଲେ । ବିଂଶ ଶତାଦ୍ଦୀର ପ୍ରଥମ ଦୁଇ ଦଶକରେ ଦେଶବ୍ୟାପୀ ବ୍ରିଟିଶ ସରକାର ବିରୋଧୀ ଆନ୍ଦୋଳନ ଦାନା ବାନ୍ଧିବା ପରେ ଜନସାଧାରଣଙ୍କ ଆସ୍ଥାଭାଜନ ହେବା ନିମନ୍ତେ ୧୯୧୯ରେ ପ୍ରାଦେଶିକ ବ୍ୟବସ୍ଥା ସଭା ନିର୍ବାଚନ ଆୟୋଜନ ଆଇନ ପ୍ରଣୟନ କରିଥିଲେ । ସେହି ସମୟରେ ବ୍ରହ୍ମପୁର ମାନ୍ଦ୍ରାଜ ବିଧାନ ପରିଷଦ ଅନ୍ତର୍ଭୁକ୍ତ ଥିଲା । ୧୯୩୬ରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ପୂର୍ବରୁ ୧୯୨୦, ୧୯୨୩, ୧୯୨୬ ଓ ୧୯୩୦ରେ ଚାରି ଥର ମାନ୍ଦ୍ରାଜ ବିଧାନ ପରିଷଦ ନିର୍ବାଚନ ବ୍ରହ୍ମପୁରରେ ଅନୁଷ୍ଠିତ ହୋଇଥିଲା ।

 

ଭାରତୀୟ ଜାତୀୟ କଂଗ୍ରେସ ବ୍ରିଟିଶ ସରକାରଙ୍କ ଦ୍ୱାରା ୧୯୨୦ରେ ଆୟୋଜିତ ପ୍ରଦେଶିକ ବ୍ୟବସ୍ଥା ସଭା ନିର୍ବାଚନ ବିରୋଧ କରିଥିଲେ । କଂଗ୍ରେସ କର୍ମୀଙ୍କ ଅସହଯୋଗ ଫଳରେ ଦେଶର କେତେକ ଅଞ୍ଚଳରେ ନିର୍ବାଚନ ବର୍ଜନ ହୋଇଥିବା ସ୍ଥଳେ ବ୍ରହ୍ମପୁର ଭଳି କେତେକ ଅଞ୍ଚଳରେ ଅନୁଷ୍ଠିତ ନିର୍ବାଚନରେ ସ୍ଥାନୀୟ ପ୍ରତିନିଧିମାନେ ନିର୍ବାଚିତ ହୋଇଥିଲେ । ୧୯୨୦ରେ ଅନୁଷ୍ଠିତ ମାନ୍ଦ୍ରାଜ ବିଧାନ ପରିଷଦ ନିର୍ବାଚନରେ ଶଶିଭୂଷଣ ରଥ, ବିଶ୍ୱନାଥ ଦାସ ଓ ଏ. ପର୍ଶୁରାମ ପାତ୍ର ତିନି ଜଣ ନିର୍ବାଚିତ ହୋଇ ତିନି ବର୍ଷ ପାଇଁ କାର୍ଯ୍ୟଭାର ତୁଲାଇଥିଲେ । ୧୯୨୩ ନିର୍ବାଚନରେ ପୁନର୍ବାର ଶଶିଭୂଷଣ ରଥ ଓ ବିଶ୍ୱନାଥ ଦାସ ଏବଂ ରାମଚନ୍ଦ୍ର ମର୍ଦ୍ଦରାଜ ଦେଓ ନିର୍ବାଚିତ ହୋଇଥିଲେ । ୧୯୨୬ ନିର୍ବାଚନରେ ପୁନର୍ବାର ବିଶ୍ୱନାଥ ଦାସ ଓ ରାମଚନ୍ଦ୍ର ମର୍ଦ୍ଦରାଜ ଦେଓଙ୍କ ସହ ଶ୍ରୀନିବାସ ରାଜମଣି ନିର୍ବାଚିତ ହୋଇଥିଲେ । ୧୯୩୦ରେ ଅନୁଷ୍ଠିତ ଚତୁର୍ଥ ମାନ୍ଦ୍ରାଜ ବିଧାନ ପରିଷଦ ନିର୍ବାଚନରେ ବ୍ରହ୍ମପୁରରୁ ଏ. ପର୍ଶୁରାମ ପାତ୍ର, କୃଷ୍ଣଚନ୍ଦ୍ର ଗଜପତି ନାରାୟଣ ଦେବ ଓ ମାନ୍ଧାତା ଗୋରାଚାନ୍ଦ ପଟ୍ଟନାୟକ ପ୍ରତିନିଧିତ୍ୱ କରିଥିଲେ ।

 

୧୯୨୩ରେ ମାନ୍ଦ୍ରାଜ ବିଧାନ ପରିଷଦ ନିର୍ବାଚନରେ ବ୍ରହ୍ମପୁର ଆସନ ନିମନ୍ତେ ଶଶିଭୂଷଣ ରଥଙ୍କ ସହ ପି.ଭେଙ୍କେଟସ୍ୱରଲୁ ପ୍ରତିଦ୍ୱନ୍ଦିତା କରୁଥିଲେ । ପି. ଭେଙ୍କେଟସ୍ୱରଲୁ ବ୍ରହ୍ମପୁରର ଜଣେ ଖ୍ୟାତାନାମା ଓକିଲ ରୂପେ ପରିଚ଼ିତ ଥିଲେ । କୁହାଯାଏ ଯେ ସେ ବିଜୟ ଲାଭ କରିବା ଏକ ରକମ ନିଶ୍ଚିତ ଥିଲା । ତେବେ ନିର୍ବାଚନ ନିମନ୍ତେ ଭୋଟଗ୍ରହଣ ପୂର୍ବ ରାତ୍ରିରେ ତାଙ୍କର ପରଲୋକ ଘଟିଲା । ଫଳରେ ନିର୍ବାଚନ ବନ୍ଦ ରହିଲା ଏବଂ କିଛି ଦିନ ଅନ୍ତେ ପୁନର୍ବାର ଆୟୋଜିତ ହେଲା । ଏହି ନିର୍ବାଚନରେ ଶଶିଭୂଷଣ ରଥ ବିଜୟ ଲାଭ କରିଥିଲେ ।

 

ବିଂଶ ଶତାଦ୍ଦୀ ଆଦ୍ୟଭାଗରେ ବ୍ରହ୍ମପୁର ଜନସଂଖ୍ୟାର ଅର୍ଦ୍ଧେକ ଓଡ଼ିଆ ଓ ଅର୍ଦ୍ଧେକ ତେଲୁଗୁ ଭଷାଭାଷୀ ଅନ୍ତର୍ଭୁକ୍ତ ଥିବା ହେତୁ ନିର୍ବାଚନରେ ଭାଷାଗତ ବିରୋଧ ବେଶ ଉଲ୍ଲେଖନୀୟ ସ୍ତରରେ ରହୁଥିଲା । ମହାତ୍ମା ଗାନ୍ଧୀ ୧୯୨୧ରେ ପ୍ରଥମ ଥର ନିମନ୍ତେ ବ୍ରହ୍ମପୁର ଆଗମନ କାଳରେ ଓଡ଼ିଆ ଓ ତେଲୁଗୁ ଭାଷାଭାଷୀଙ୍କ ମଧ୍ୟରେ ବିବାଦ ସଂପର୍କରେ ଅବଗତ ହୋଇ ଉଭୟ ଗୋଷ୍ଠୀର ନେତୃବର୍ଗଙ୍କୁ ସ୍ୱାଧୀନତା ଆନ୍ଦୋଳନରେ ଏକତ୍ର କାର୍ଯ୍ୟ କରିବା ନିମନ୍ତେ ନିବେଦନ କରିଥିଲେ ।

 

ବିଶ୍ୱନାଥ ଦାସ କଲିକତାରେ ଆଇନ ଅଧ୍ୟୟନ ପରେ ଉପାଧିଲାଭ କରି କଟକରେ ବାରିଷ୍ଟର ମଧୁସୂଦନ ଦାସଙ୍କ ଜୁନିୟର ଭାବେ କିଛି କାଳ କାର୍ଯ୍ୟ କରି ୧୯୧୮ରେ ବ୍ରହ୍ମପୁର ପହଞ୍ଚି ଓକିଲାତି ଆରମ୍ଭ କରିଥିଲେ । ସେହି ସମୟରେ ଦେଶବ୍ୟାପୀ କୃଷକ ଜାଗରଣ ଦେଖାଯାଇଥିଲା ଏବଂ ବିଶ୍ୱନାଥ ଦାସ ଗଞ୍ଜାମ ଜିଲ୍ଲାରେ ଚାଷୀମାନଙ୍କୁ ସଂଗଠିତ କରିଥିଲେ । ସେ ନିଜେ ‘ରୟତ ସଂଘ’ର ସଭାପତି ଏବଂ ସେହି ସମୟରେ ବ୍ରହ୍ମପୁରରେ ଓକିଲାତି କରୁଥିବା ଭି.ଭି.ଗିରିଙ୍କୁ ସଂପାଦକ ମନୋନୀତ କରିଥିଲେ । ଚାଷୀ ଆନ୍ଦୋଳନରେ ରାଜା ଓ ଜମିଦାରମାନଙ୍କୁ ବିରୋଧ କରାଯାଉଥିଲା । ଖଲ୍ଲିକୋଟ ଜମିଦାରୀ ଅଞ୍ଚଳରେ ରୟତ ସଂଗଠନ ପକ୍ଷରୁ ଆନ୍ଦୋଳନକୁ ସର୍ବଭାରତୀୟ ସ୍ତରରେ ପ୍ରଥମ କୃଷକ ଆନ୍ଦୋଳନ କୁହାଯାଏ । ବିଶ୍ୱନାଥ ଦାସ ରୟତ ସଂଗଠନର ନେତୃତ୍ୱ ନେଉଥିବା ହେତୁ ସ୍ୱାଭାବିକ ଭାବେ ଖଲ୍ଲିକୋଟ ଜମିଦାରୀ ବିରୋଧି ଥିଲେ । ତେବେ ୧୯୨୩ ଓ ୧୯୨୭ରେ ଅନୁଷ୍ଠିତ ମାନ୍ଦ୍ରାଜ ବିଧାନ ପରିଷଦ ନିର୍ବାଚନରେ ଉଭୟ ବିଶ୍ୱନାଥ ଦାସ ଓ ରାମଚନ୍ଦ୍ର ମର୍ଦ୍ଦରାଜ ନିର୍ବାଚିତ ହୋଇ ଏକତ୍ର କାର୍ଯ୍ୟ କରିଥିଲେ । ପ୍ରାବନ୍ଧିକ ପଦ୍ମଚରଣ ସାହୁ ନିଜ ‘ବ୍ରହ୍ମପୁର ରାଜନୈତିକ ଧାରା ଓ ଲୋକ ପ୍ରତିନିଧି’ ରଚନାରେ ଏହି ବିଷୟ ବର୍ଣ୍ଣନା କରିଛନ୍ତି ।

 

୧୯୩୬ରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ପରେ ୧୯୩୭ରେ ଅନୁଷ୍ଠିତ ଓଡ଼ିଶା ବିଧାନସଭାକୁ ବ୍ରହ୍ମପୁରର ପ୍ରତିନିଧି ଭାବେ ଦିବାକର ପଟ୍ଟନାୟକ, ରାମଚନ୍ଦ୍ର ଦେବ, କାଶୀ ବିଶ୍ୱନାଥ ରାଜୁ (ସମସ୍ତେ ସାଧାରଣ), ଭି. ଲକ୍ଷ୍ମୀବାଈ (ମହିଳା ସଂରକ୍ଷିତ) ଓ ଲତିଫୁର ରହମାନ (ମୁସଲମାନ ସଂରକ୍ଷିତ) ନିର୍ବାଚିତ ହୋଇଥିଲେ । ସେହିପରି ୧୯୪୬ ନିର୍ବାଚନରେ ଉମାଚ଼ରଣ ପଟ୍ଟନାୟକ, ସୋମନାଥ ପଣ୍ଡା, ଗାଦି ନାରାୟଣ ମୂର୍ତ୍ତି (ସମସ୍ତେ ସାଧାରଣ), ଭି. ଲକ୍ଷ୍ମୀ ବାଈ (ମହିଳା ସଂରକ୍ଷିତ) ଓ ଲାଲମୋହନ ପଟ୍ଟନାୟକ (ଖ୍ରୀଷ୍ଟିୟାନ ସଂରକ୍ଷିତ) ନିର୍ବାଚିତ ହୋଇଥିଲେ ।

 

୧୯୪୭ରେ ଭାରତ ସ୍ୱାଧୀନତା ଲାଭ ପରେ ୧୯୫୨ ଲୋକସଭା ସାଧାରଣ ନିର୍ବାଚନରେ ଉମାଚ଼ରଣ ପଟ୍ଟନାୟକ ଏବଂ ବିଧାନସଭା ସାଧାରଣ ନିର୍ବାଚନରେ ରାମଚନ୍ଦ୍ର ମିଶ୍ର ଓ ଦଣ୍ଡପାଣି ଦାସ ବ୍ରହ୍ମପୁର ନିର୍ବାଚନ ମଣ୍ଡଳୀରୁ ନିର୍ବାଚିତ ହୋଇଥିଲେ । ଉଲ୍ଲେଖଯୋଗ୍ୟ ବିଷୟ ଏହି ଯେ ବ୍ରହ୍ମପୁରର ସମସ୍ତ ତିନିଜଣ ନିର୍ବାଚିତ ପ୍ରତିନିଧି ସ୍ୱାଧୀନଭାବେ ନିର୍ବାଚନ ଲଢ଼ି କଂଗ୍ରେସ ପ୍ରାର୍ଥୀଙ୍କୁ ପରାଜିତ କରିଥିଲେ ।

Image by starline on Freepik

Elections 2024 / ନିର୍ବାଚନ ୨୦୨୪

 

#ବ୍ରହ୍ମପୁର ଲୋକସଭା ଆସନ ନିମନ୍ତେ ୧୧ ଜଣ ପ୍ରାର୍ଥୀ ଏବଂ ବ୍ରହ୍ମପୁର ବିଧାନସଭା ନିମନ୍ତେ ୧୭ ଜଣ ପ୍ରାର୍ଥୀ ୨୦୨୪ ନିର୍ବାଚନରେ ଅବତୀର୍ଣ୍ଣ ହୋଇଛନ୍ତି । ବ୍ରହ୍ମପୁର ଲୋକସଭା ଅଧୀନରେ ବ୍ରହ୍ମପୁର, ଗୋପାଳପୁର, ଛତ୍ରପୁର, ଦିଗପହଣ୍ଡି, ଚିକିଟି, ମୋହନା ଓ ପାରଳାଖେମୁଣ୍ଡି ସାତଗୋଟି ବିଧାନସଭା କ୍ଷେତ୍ର ଅନ୍ତର୍ଭୁକ୍ତ । ଓଡ଼ିଶାରେ ଚାରିଗୋଟି ପର୍ଯ୍ୟାୟରେ ମତଦାନ ଆୟୋଜନ କରାଯାଉଥିବା ସ୍ଥଳେ ବ୍ରହ୍ମପୁର ସମେତ ଗୋପାଳପୁର, ଛତ୍ରପୁର, ଦିଗପହଣ୍ଡି ଓ ଚିକିଟି ପାଞ୍ଚଗୋଟି ବିଧାନସଭା କ୍ଷେତ୍ରରେ ମେ’ ୧୩ ତାରିଖ ସୋମବାର ଦିନ ଭୋଟ ଗ୍ରହଣ କାର୍ଯ୍ୟକ୍ରମ ଅନୁଷ୍ଠିତ ହେବ ।

 

ବ୍ରହ୍ମପୁର ବିଧାନସଭା ଆସନ ନିମନ୍ତେ ପ୍ରତିଦ୍ୱନ୍ଦିତା କରୁଥିବା ୧୭ ଜଣ ପ୍ରାର୍ଥୀଙ୍କ ମଧ୍ୟରେ ଆଠ ଜଣ ସ୍ୱାଧୀନ ପ୍ରାର୍ଥୀ ଅନ୍ତର୍ଭୁକ୍ତ । ଏତଦ୍ ବ୍ୟତୀତ ବିଜେଡ଼ି, ବିଜେପି, କଂଗ୍ରେସ, ଆମ ଆଦମୀ ପାର୍ଟି, ବହୁଜନ ସମାଜ ପାର୍ଟି, ଭାରତୀୟ ବିକାଶ ପରିଷଦ, ଫରୱାର୍ଡ ବ୍ଳକ, ଏସୟୁସିଆଇ (କମ୍ୟୁନିଷ୍ଟ) ଓ ନବ ଭାରତ ନିର୍ମାଣ ସେବା ଦଳ ରାଜନୀତିକ ଦଳ ପକ୍ଷରୁ ପ୍ରାର୍ଥୀ ଅବତୀର୍ଣ୍ଣ ।

 

ବ୍ରହ୍ମପୁର ଲୋକସଭା ଆସନ ନିମନ୍ତେ ପ୍ରତିଦ୍ୱନ୍ଦିତା କରୁଥିବା ୧୧ ଜଣ ପ୍ରାର୍ଥୀଙ୍କ ମଧ୍ୟରେ ତିନି ଜଣ ସ୍ୱାଧୀନ ପ୍ରାର୍ଥୀ ଅନ୍ତର୍ଭୁକ୍ତ । ଏତଦ୍ ବ୍ୟତୀତ ବିଜେଡ଼ି, ବିଜେପି, କଂଗ୍ରେସ, ବହୁଜନ ସମାଜ ପାର୍ଟି, ନବ ଭାରତ ନିର୍ମାଣ ସେବା ଦଳ, ଭାରତୀୟ ବିକାଶ ପରିଷଦ, ଫରୱାର୍ଡ ବ୍ଳକ ଓ ଏସୟୁସିଆଇ (କମ୍ୟୁନିଷ୍ଟ) ରାଜନୀତିକ ଦଳ ପକ୍ଷରୁ ପ୍ରାର୍ଥୀ ଅବତୀର୍ଣ୍ଣ ।

 

ବ୍ରହ୍ମପୁର ସହର ଦକ୍ଷିଣ ଓଡ଼ିଶାର ବ୍ୟାବସାୟିକ, ପ୍ରଶାସନିକ, ସାଂସ୍କୃତିକ, ସ୍ୱାସ୍ଥ୍ୟ ଓ ଶିକ୍ଷା କ୍ଷେତ୍ରରେ ପ୍ରାଣକେନ୍ଦ୍ର ହୋଇଥିଲେ ହେଁ ସ୍ୱାଧୀନୋତ୍ତର ଅବସ୍ଥାରେ ରାଜନୀତିକସ୍ତରରେ କର୍ତ୍ତୃତ୍ୱ ଜାହିର କରିପାରେ ନାହିଁ । ଦୀର୍ଘ ୪୪ ବର୍ଷ ପୂର୍ବେ ୧୯୮୦ ବିଧାନସଭା ନିର୍ବାଚନରେ କଂଗ୍ରେସ ପ୍ରାର୍ଥୀ କୃଷ୍ଣ ଚରଣ ପଟ୍ଟନାୟକ ବିଧାୟକ ଭାବେ ନିର୍ବାଚିତ ହୋଇ ରାଜ୍ୟ ମନ୍ତ୍ରୀମଣ୍ଡଳରେ ସ୍ଥାନ ପାଇଥିଲେ । ଏଥି ପୂର୍ବରୁ ୧୯୭୪ ବିଧାନସଭା ନିର୍ବାଚନରେ କଂଗ୍ରେସ ପ୍ରାର୍ଥୀ ବିନାୟକ ଆଚାର୍ଯ୍ୟ ବିଧାୟକଭାବେ ନିର୍ବାଚିତ ହୋଇ ମନ୍ତ୍ରୀମଣ୍ଡଳରେ ସାମିଲହୋଇଥିଲେ । ତାହାପରଠାରୁ ବ୍ରହ୍ମପୁର ବିଧାନସଭା କ୍ଷେତ୍ରରୁ ନିର୍ବାଚିତ କେହି ବିଧାୟକ ରାଜ୍ୟ ମନ୍ତ୍ରୀମଣ୍ଡଳରେ ସ୍ଥାନ ପାଇପାରି ନାହାନ୍ତି ।

 

ବ୍ରହ୍ମପୁର ଲୋକସଭା ନିର୍ବାଚନ ମଣ୍ଡଳୀରୁ ୨୦୦୪ ନିର୍ବାଚନରେ ସାଂସଦ ଭାବେ ନିର୍ବାଚିତ ହୋଇ କଂଗ୍ରେସ ପ୍ରାର୍ଥୀ ଚନ୍ଦ୍ର ଶେଖର ସାହୁ କେନ୍ଦ୍ର ମନ୍ତ୍ରୀ ମଣ୍ଡଳରେ ସ୍ଥାନ ପାଇଥିଲେ । ଇତି ମଧ୍ୟରେ ୨୦ ବର୍ଷରେ ଅନ୍ୟ କେହି ବ୍ରହ୍ମପୁର ସାଂସଦ କେନ୍ଦ୍ରରେ ମନ୍ତ୍ରୀ ପଦ ପାଇପାରି ନାହାନ୍ତି ।

 

ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ଆନ୍ଦୋଳନରେ ବ୍ରହ୍ମପୁର ଓଡ଼ିଆ ଭାଷାଭାଷୀଙ୍କ ରାଜନୀତିକ ନେତୃତ୍ୱରେ ଆଗ୍ରଣୀ ରହିଥିଲା । ଉତ୍କଳ ସମ୍ମିଳନୀର ପରିକଳ୍ପନା ୧୯୦୩ରେ ବ୍ରହ୍ମପୁରରୁ ହିଁ ସୂତ୍ରପାତ ହୋଇଥିଲା । କିନ୍ତୁ ୧୯୩୬ରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ପରେ ରାଜ୍ୟ ରାଜନୀତିକ ନେତୃତ୍ୱ କ୍ରମଶଃ କଟକ ଓ ପରେ ଭୁବନେଶ୍ୱରକୁ ସ୍ଥାନାନ୍ତରିତ ହେଲା । ବ୍ରହ୍ମପୁର ତଥା ଦକ୍ଷିଣ ଓଡ଼ିଶାର ରାଜନୀତିକ ନିଷ୍ପତି କେନ୍ଦ୍ରୀୟ ସ୍ତରରୁ ହିଁ ନିର୍ଦ୍ଧାରିତ ହୋଇଥାଏ । ଏହି ଦୁଃଭାର୍ଗ୍ୟପୂର୍ଣ୍ଣ ପରିସ୍ଥିତି ନିମନ୍ତେ କେତେଗୋଟି କାରଣ ଚ଼ିହ୍ନଟ କରାଯାଇପାରେ ।

 

ପ୍ରଥମତଃ, ସ୍ୱାଧୀନୋତ୍ତର ଅବସ୍ଥାରେ ଜାତୀୟ ତଥା ରାଜ୍ୟ ସ୍ତରରେ ରାଜନୀତିକ ଦଳଗୁଡ଼ିକରେ ଗଣତାନ୍ତ୍ରିକ ପ୍ରକ୍ରିୟାର ମୂଳ-ଉତ୍ପାଟନ ଘଟିଛି । ରାଜନୀତିକ ନେତୃତ୍ୱ ବ୍ୟକ୍ତି-କେନ୍ଦ୍ରୀକ ହେବା ଫଳରେ ଶୀର୍ଷ ନେତୃବର୍ଗଙ୍କ ଇଚ୍ଛା ଅନୁଯାୟୀ ଦଳ ପରିଚାଳିତ ଏବଂ ରାଜଧାନୀ ବ୍ୟତିତ ଅନ୍ୟାନ୍ୟ ଅଞ୍ଚଳର ରାଜନୀତିକ ନେତୃତ୍ୱ ପ୍ରଭାବହୀନ । ବ୍ରହ୍ମପୁରର ରାଜନୀତିକ ଅପଭ୍ରଂଶର ଏହା ମୁଖ୍ୟ କାରଣ । କେନ୍ଦ୍ରୀୟ ଚାପରେ ସ୍ଥାନୀୟ ନେତୃତ୍ୱ ମୌଳିକ ଭାବେ ପ୍ରସ୍ପୁଟିତ ହୋଇପାରେ ନାହିଁ ।

 

ଦ୍ୱିତୀୟତଃ, ବିଗତ ୬୦ ବର୍ଷର ଇତିହାସ ଅନୁଧ୍ୟାନ କଲେ ୧୯୬୪ ଛାତ୍ର ଆନ୍ଦୋଳନରେ ବ୍ରହ୍ମପୁରର ଯେଉଁ ଛାତ୍ରନେତାମାନେ ଜନମାନସରେ ପ୍ରତିଷ୍ଠା ଲାଭ କରିଥିଲେ ପରବର୍ତ୍ତୀ ଅବସ୍ଥାରେ ମଉଳି ଗଲେ । ୧୯୭୫-୭୭ ଜରୁରିକାଳୀନ ପରିସ୍ଥିତିରେ ସୃଷ୍ଟ ନେତୃବର୍ଗ ସ୍ଥାନୀୟ ରାଜନୀତିରେ ଅସ୍ତିତ୍ୱ ସ୍ଥାପନ କରିପାରିଲେ ନାହିଁ । ଶେଷରେ ୧୯୯୮ ଗୋପାଳପୁର ଇସ୍ପାତ ପ୍ରକଳ୍ପ ବିରୋଧୀ ଆନ୍ଦୋଳନରେ ବ୍ରହ୍ମପୁରର ନେତୃବର୍ଗଙ୍କ ପ୍ରତିନିଧିତ୍ୱ ହିଁ ରହିଲା ନାହିଁ । ୧୯୬୬ରେ ବିଶ୍ୱବିଦ୍ୟାଳୟ ପ୍ରତିଷ୍ଠା ଆନ୍ଦୋଳନ ପରଠାରୁ ସହରରେ କୌଣସି ବଡ଼ ଧରଣ ଜନଜାଗରଣ ସଂଭବ ହୋଇପାରିନାହିଁ । ବିବାହ, ଶୁଦ୍ଧିକ୍ରିୟା ଭଳି ପାରିବାରିକ ମେଳନରେ ସମବେତ ଜନତାଙ୍କୁ କୁଶଳ ଜିଜ୍ଞାଷାକୁ ହିଁ  ଲୋକସଂପର୍କ ବୋଲି ଧରି ନିଆଗଲା !

 

ତୃତୀୟତଃ, ପରିବର୍ତ୍ତିତ ସାମାଜିକ ବ୍ୟବସ୍ଥାରେ ନାର୍ଯ୍ୟ ଦାବୀ ଉପସ୍ଥାପନ ବଦଳରେ ତୋଷାମଦ କାର୍ଯ୍ୟସାଧନର ମନ୍ତ୍ର ରୂପେ ଗୃହୀତ ହେବା ପରଠୁ ନେତୃତ୍ୱର ପରିଭାଷା ବଦଳି ଯାଇଛି । ଗଣତାନ୍ତ୍ରିକ ଶାସନ ପଦ୍ଧତିରେ ସାଂସଦ ଓ ବିଧାୟକଙ୍କ ଗରିମା କ୍ଷୟ ହୋଇ ଚାଲିଛି । ବ୍ରହ୍ମପୁରରେ ଏହି ଅବକ୍ଷୟର ଧାରା କେଉଁଠି ଅଟକିବ, ତାହା ସମୟ ହିଁ ନିର୍ଦ୍ଧାରଣ କରିବ !

Image by Satheesh Sankaran from Pixabay