Berhampur Durga Puja in the pages of history / ଇତିହାସରେ ବ୍ରହ୍ମପୁର ଦୁର୍ଗାପୂଜା

ବ୍ରହ୍ମପୁରରେ ସାର୍ବଜନୀନ ଦୁର୍ଗା ପୂଜା ସହରର ପାର୍ବଣ ପଞ୍ଜିକାର ଅନ୍ୟତମ ଆକର୍ଷଣ l ଠାକୁରାଣୀ ଯାତ୍ରା ଓ ଗଣେଶ ପୂଜା ସାଙ୍ଗକୁ ଦଶହରା ପୂଜା ଏଠାରେ ସାମୂହିକ ଉଦ୍ୟମରେ ଜାକଜମକରେ ପାଳିତ ହୋଇଥାଏ l କାଳୀ, ଲକ୍ଷ୍ମୀ, ସରସ୍ୱତୀ ଓ ବିଶ୍ୱକର୍ମା ପୂଜା ତଥା ଗହ୍ମା ଡ଼ିଆଁ, ଭୋଗି ଧୂନୀ ଇତ୍ୟାଦି ଅଞ୍ଚଳଭିତ୍ତିକ ବା ଗୋଷ୍ଠୀ ମଧ୍ୟରେ ସୀମିତ ରହିଥାଏ l

          ଏଠାକାର ସାର୍ବଜନୀନ ଦୁର୍ଗାପୂଜା ଆୟୋଜନ ତୁଳନାତ୍ମକ ଭାବେ ନିକଟ ଅତୀତର ପରମ୍ପରା l କୋଲକତାରୁ କଟକ ମଧ୍ୟ ଦେଇ ଏହିଭଳି ଏକ ସାମୂହିକ ପୂଜା ଅର୍ଚ୍ଚନା ପ୍ରଥା ଆମ ସହରରେ ଗତ ଶତାଦ୍ଦୀର ପଞ୍ଚମ ଓ ଷଷ୍ଠ ଦଶକରେ ଲୋକପ୍ରିୟ ହୋଇଥିଲା l ଅବଶ୍ୟ ଏଥିପୂର୍ବରୁ ବଙ୍ଗଭାଷାଭାଷୀଙ୍କ ଦ୍ୱାରା ଦୁର୍ଗାପୂଜା ଆୟୋଜନର ପରମ୍ପରା ରହିଥିଲା l 1934 ମସିହାରୁ ବିଧିବଦ୍ଧଭାବେ ‘ଆଦି ଦୁର୍ଗାପୂଜା ସମିତି’ ଆନୁକୂଲ୍ୟରେ ବଙ୍ଗଭାଷୀଙ୍କ ଦୁର୍ଗାପୂଜା ଅନୁଷ୍ଠିତ ହୋଇ ଆସୁଛି l

          ସ୍ୱାଧୀନତା ପୂର୍ବବର୍ତ୍ତୀ ଅବସ୍ଥାରେ ବେଙ୍ଗାଲ – ନାଗପୁର ରେଳୱେ କମ୍ପାନୀରେ ସଂଖ୍ୟାଧିକ ବଙ୍ଗଳା କର୍ମଚାରୀ କାର୍ଯ୍ୟକରୁଥିବା ଅବସରରେ ବ୍ରହ୍ମପୁର ରେଳଷ୍ଟେସନରେ ମଧ୍ୟ କିଛି ଅବସ୍ଥାପିତ ହୋଇଥାନ୍ତି l ସେମାନଙ୍କ ଉଦ୍ୟମରେ ବଙ୍ଗଳାର ପ୍ରସିଦ୍ଧ ଶାରଦୀୟ ପର୍ବ ସାର୍ବଜନୀନ ଦୁର୍ଗାପୂଜା ପ୍ରଥମ ପାଞ୍ଚବର୍ଷ ଧରି ସ୍ଥାନୀୟ ରେଳୱେ ଇନଷ୍ଟିଟିଉଟରେ ଆୟୋଜନ କରାଯାଇଥିବା ଜଣାଯାଏ l ସ୍ୱାଧୀନତା ପ୍ରାପ୍ତି ଅବସରରେ ଦେଶ ବିଭାଜନ କାଳରେ ବହୁ ବଙ୍ଗଭାଷୀ ପରିବାର ତତ୍ କାଳୀନ ପୂର୍ବ-ପାକିସ୍ଥାନ ବା ଆଜିର ବଙ୍ଗଳାଦେଶରୁ ଆସି ବ୍ରହ୍ମପୁରରେ ବସବାସ ଆରମ୍ଭ କରିଥିଲେ l ଫଳତଃ ସହରରେ ବଙ୍ଗଭାଷୀଙ୍କ ସଂଖ୍ୟା ବଢ଼ିଥିଲା ଏବଂ ପୂଜା ଆୟୋଜନ ପରିବ୍ୟାପ୍ତ ହୋଇଥିଲା l

          ସହରର ପ୍ରାଚ଼ୀନତମ ଦୁର୍ଗାମେଢ଼ମାନଙ୍କ ମଧ୍ୟରେ ସାନବଜାର-ହନୁମାନବଜାର ଦୁର୍ଗାପୂଜା ଅନ୍ୟତମ l ସ୍ୱାଧୀନୋତ୍ତର ଅବସ୍ଥାରେ ସେ ଅଞ୍ଚଳରେ କୁଆଡ଼େ ପ୍ରବଳ ମାତ୍ରାରେ ଜୁଆଖେଳ ଚାଲିଥାଏ l ମଫସଲ ଅଞ୍ଚଳରୁ କିଣାବିକା ଉଦ୍ଦେଶ୍ୟରେ ସହରରେ ଆସି ପହଞ୍ଚୁଥିବା ଗାଉଁଳି ଲୋକେ ଏଠାକାର ତିନିପତ୍ତା ହାତସଫେଇ ତାସଖେଳରେ ସର୍ବସ୍ୱାନ୍ତ ହୋଇ ଗ୍ରାମକୁ ଫେରିବା ଏକ ନିତିଦିନିଆ ଘଟଣାରେ ପରିଣତ ହୋଇଥାଏ l ଏଭଳି ଜୁଆଖେଳରେ ଗରାଖମାନେ ଶିକାର ହେଉଥିବା ହେତୁ ସ୍ଥାନୀୟ ବ୍ୟବସାୟରେ ମାନ୍ଦାବସ୍ଥା ଦେଖା ଦେଇଥିଲା ଏବଂ ବ୍ୟବସାୟୀମାନେ ସାନବଜାର ଅଞ୍ଚଳରୁ ଜୁଆଖେଳକୁ ମୂଳପୋଚ୍ଛ କରିବା ନିମନ୍ତେ ସଂଗଠିତ ହୋଇପଡ଼ିଥିଲେ l ଏହି ଅଞ୍ଚଳର ପ୍ରତ୍ୟେକ ବ୍ୟବସାୟୀ ଦୈନିକ ଦଶ ପଇସା ହିସାବରେ ଚାନ୍ଦା ସଂଗ୍ରହ କରି ଜୁଆଖେଳ ବିରୁଦ୍ଧରେ ବିଦ୍ରୋହ ଘୋଷଣା କଲେ l ତେବେ ପରବର୍ତ୍ତୀ ଅବସ୍ଥାରେ ପ୍ରଶାସନିକ ତତ୍ପରତା ହେତୁ ଜୁଆଖେଳ ଆପତତଃ ବନ୍ଦ ହୋଇଯିବା ଫଳରେ ଗଚ୍ଛିତ ଚାନ୍ଦାର ସଦ୍ ବିନିଯୋଗ କରିବା ନିମନ୍ତେ ସାନବଜାର – ହନୁମାନ ବଜାର ଛକରେ 1956 ମସିହାରୁ ସାମୂହିକ ଦୁର୍ଗାପୂଜାର ପରିକଳ୍ପନା କରାଯାଇଥିଲା l

          #ବ୍ରହ୍ମପୁର ସହରରେ ଗତବର୍ଷ 2015ରେ 38 ଗୋଟି ସାମୂହିକ ଦୁର୍ଗପୂଜା ଅନୁଷ୍ଠିତ ହୋଇଥିଲା l ମୁଖ୍ୟତଃ ବିଭିନ୍ନ ଅଞ୍ଚଳର ବ୍ୟବସାୟୀ ଓ ଯୁବକ ସଂଘଗୁଡ଼ିକ ତତ୍ତ୍ୱାବଧାନରେ ଦୁର୍ଗାମେଢ଼ ଆୟୋଜନ କରାଯାଇଥାଏ l ଭିନ୍ନଭିନ୍ନ ଅଞ୍ଚଳର ଦୁର୍ଗାପୂଜାକୁ ନେଇ ବିଭିନ୍ନ ଘଟଣା ଯୋଡ଼ି ହୋଇ ରହିଥାଏ l

          ଇଞ୍ଜିନିଅରିଂ ସ୍କୁଲ ଛକରେ 1965 ମସିହାରୁ ମା’ଜୟଦୁର୍ଗା ନବରାତ୍ର ପୂଜା ଅବସରରେ ପ୍ରତିପଦା ତିଥି ପୂର୍ବାହ୍ନରେ ମନ୍ଦିରରୁ ଆସି ଅସ୍ଥାୟୀ ମଣ୍ଡପରେ ପୂଜିତ ହୋଇଥାନ୍ତି l ଦଶହରା ପୂଜା ଶେଷ ରାତିରେ ଦେବୀ ସାହୀ ପରିକ୍ରମା କରି ମନ୍ଦିର ଫେରନ୍ତି l ଏଠାକାର ପୂଜା ପଦ୍ଧତି ନିଆରା l ପ୍ରତିବର୍ଷ ତୋରଣ ନିର୍ମିତ ହୁଏ, ତେବେ ମୃଣ୍ମୟ ମୂର୍ତ୍ତି ଗଠନ ହୁଏନାହିଁ l କୁହାଯାଏ ଯେ ସହରର ତତ୍ କାଳୀନ ପ୍ରବେଶ ପଥ ଇଞ୍ଜିନିୟରିଂ ସ୍କୁଲ ଛକରେ ବାରମ୍ୱାର ମୋଟର ଦୁର୍ଘଟଣା ଘଟୁଥିଲା l ତେବେ ସେଠାରେ ମନ୍ଦିର ନିର୍ମିତ ହେବା ପରେ ଦୁର୍ଘଟଣାର ହାର କମିଗଲା l ମନ୍ଦିର ପ୍ରତିଷ୍ଠା ସମୟରୁ ଦଶହରା ଉତ୍ସବ ଆୟୋଜିତ ହୋଇଚାଲିଛି l

ସମ୍ୱାଦ (ବ୍ରହ୍ମପୁର ସଂସ୍କରଣ) 3 ଅକ୍ଟୋବର 2016

No protest for rise in city bus fare / ସିଟିବସ ଭଡ଼ା ବୃଦ୍ଧିର ବିରୋଧ ନାହିଁ

ସମକାଳୀନ #ବ୍ରହ୍ମପୁର ମୌଳିକ ପୌରସେବାଗୁଡ଼ିକ ମଧ୍ୟରେ ସହରତଳି ଅଞ୍ଚଳଗୁଡ଼ିକସହ ସିଟିବସ ସଂଯୋଗସ୍ଥାପନ ଉଲ୍ଲେଖଯୋଗ୍ୟ ବିଷୟ | ବ୍ରହ୍ମପୁର ତଥା ସହରତଳି ଅଞ୍ଚଳ ଗୁଡ଼ିକରେ ସାର୍ବଜନୀନ ପରିବହନ ବା ପବ୍ଳିକ ଟ୍ରାନ୍ସପୋର୍ଟ କ୍ଷେତ୍ରରେ ଅସୁବିଧା ଲାଗି ରହିଥିଲା | ଘରୋଇ ଟ୍ରେକର ଓ କ୍ୟାଣ୍ଟର ପରିବହନରେ ବିପଦପୂର୍ଣ୍ଣ ଯାତ୍ରୀବୁହା ଓ ତ୍ରୁଟିପୂର୍ଣ୍ଣ ଯାତ୍ରା ପରିଚ଼ାଳନାରେ ଜନସାଧାରଣ ଅତିଷ୍ଠ ହୋଇପଡ଼ିଥିଲେ ହେଁ ବିକଳ୍ପ ବ୍ୟବସ୍ଥା ନଥିଲା | ଅତୀତରେ ବ୍ରହ୍ମପୁରରେ ଦୁଇଥର ଘରୋଇ ଉଦ୍ୟମରେ ଓ ଆଉଥରେ ପୌରପାଳିକା ଉଦ୍ୟମରେ ଟାଉନବସ ସେବା ଆରମ୍ଭ କରାଯାଇଥିଲେହେଁ ଚ଼ାଲିପାରି ନଥିଲା | ସରକାରୀ ଉଦ୍ୟମରେ ଗଞ୍ଜାମ ଆର୍ବାନ ଟ୍ରାନ୍ସପୋର୍ଟ ସର୍ଭିସ ଲିମିଟେଡ଼ ଗଠନ ହୋଇ ଦୁଇଡ଼ଜନ ନୂଆ ବସ ସହରରେ ପହଞ୍ଚିବା ପରେ ମଧ୍ୟ ସେଗୁଡ଼ିକୁ ଚଳାଇବା ଲାଗି ପ୍ରଶାସନକୁ ନାକେଦମ ହେବାକୁ ପଡ଼ିଥିଲା | ଓଡ଼ିଶା ରୋଡ଼ ଟ୍ରାନ୍ସପୋର୍ଟ କରପୋରେସନ ବାଧ୍ୟବାଧକତାରେ ବର୍ଷେ ଚଳାଇବା ପରେ ତାହା ଘରୋଇ ମାଲିକନାକୁ ଗଲା |

          ବର୍ତ୍ତମାନ ସହରତଳି ଅଞ୍ଚଳ ଗୋପାଳପୁର, ଛତ୍ରପୁର, ହିଞ୍ଜିଳିକାଟୁ ଇତ୍ୟାଦିକୁ ସଂଯୋଗକରି 10 ଗୋଟି ରୁଟରେ 32 ଗୋଟି ସିଟି ବସ ଚ଼ାଲିଛି | ଗଟସେଲ ଟାଉନବସ ସେବା ଆରମ୍ଭ କରିବା ଅବସରରେ ବସଭଡ଼ା ଧାର୍ଯ୍ୟ କରିଥିଲେ | ଖବରକାଗଜରେ ହୋହଲ୍ଲା ହେବା କାରଣରୁ ତାହାକୁ ସାମାନ୍ୟ କମାଇ ଦିଆଯାଇଥିଲା | ତେବେ ଘରୋଇ ସିଟିବସ ଅପରେଟର ଗତ ଜୁନ-ଜୁଲାଇରୁ ତାହାକୁ ପୁଣି ପୂର୍ବାବସ୍ଥାକୁ ଫେରାଇ ଆଣିଛନ୍ତି | ଉଦାହରଣ ସ୍ୱରୂପ ପୁରୁଣା ବସଷ୍ଟାଣ୍ଡରୁ ସେଲ୍ସଟ୍ୟାକ୍ସ ଛକ ପୂର୍ବରୁ 5 ଟଙ୍କା ଥିବା ବେଳେ ବର୍ତ୍ତମାନ 6 ଟଙ୍କା ଦେବାକୁ ପଡୁଛି କିମ୍ୱା ବ୍ରହ୍ମପୁରରୁ ଭଞ୍ଜବିହାର 10 ଟଙ୍କା ଭଡ଼ା ଧାର୍ଯ୍ୟ ହୋଇଥିବା ବେଳେ ବର୍ତ୍ତମାନ ଯାତ୍ରୀଙ୍କୁ 12 ଟଙ୍କା ଗଣିବାକୁ ପଡୁଛି | ଏଥି ନେଇ ଗତ ଜୁନ 15 ତାରିଖରେ ଅନୁଷ୍ଟିତ ଗଟସେଲ ବୈଠକରେ ପୂର୍ବାନୁମୋଦିତ ବସଭଡ଼ା ଲାଗୁ କରାଯିବା ପାଇଁ ପ୍ରସ୍ତାବ ପାରିତ କରିଦିଆ ଯାଇଥିବା କଥା ମଧ୍ୟ ପ୍ରକାଶିତ ହୋଇଛି |

ପ୍ରଶ୍ନ ଉଠେ, ଗତ ଥର ଓଏସଆରଟିସିର ପରିଚ଼ାଳନାଧୀନ ସିଟିବସ ଭଡ଼ାକୁ ବିରୋଧ ହୋଇଥିବା ବେଳେ ଏଥରର ଘରୋଇ ଅପରଟେରଙ୍କ ଭଡ଼ାବୃଦ୍ଧି କିପରି ସର୍ବସାଧାରଣରେ ଚର୍ଚ୍ଚାର ପରିସରକୁ ମଧ୍ୟ ଆସିପାରିଲା ନାହିଁ ? ଗତ ଜାନୁୟାରୀ, ଫେବୃୟାରୀ, ଜୁଲାଇ ଓ ଚଳିତ ଅଗଷ୍ଟ ମାସରେ କ୍ରମାଗତ ଚ଼ାରିଥର ତୈଳଦର କମିଥିବା ଏବଂ ତଦ୍ଅନୁଯାୟୀ ଆଟୋମେଟିକ ମେକାନିଜମ ନୀତିରେ ରାଜ୍ୟରେ ଚଳାଚଳ କରୁଥିବା ରୁଟବସ ଭଡ଼ା କମିଥିବା ଅବସରରେ ବ୍ରହ୍ମପୁରରେ ସିଟିବସ ଭଡ଼ା ପରିବର୍ତ୍ତନରେ ଯଥାର୍ଥତା କେତେ ?

ଅପରପକ୍ଷରେ ବ୍ରହ୍ମପୁରରେ ସିଟିବସ ସେବାରେ 32 ଗୋଟି ବସ ସାମିଲ ହୋଇଥିଲେ ହେଁ ଖାସ ବ୍ରହ୍ମପୁର ସହରରେ ଯାତ୍ରୀ ପରିବହନ ନିମନ୍ତେ ଗୋଟିଏ ହେଲେ ବସ ନିୟୋଜିତ ହୋଇ ପାରିନାହିଁ | କୁହାଯାଉଛି ଯେ ଏଥି ନିମନ୍ତେ ପ୍ରସ୍ତାବ ରହିଛି ଏବଂ ରାଜ୍ୟ ସରକାରଙ୍କୁ ଅଧିକା 18 ଗୋଟି ମିନିବସ ଯୋଗାଇ ଦେବା ନିମନ୍ତେ ଅନୁରୋଧ କରାଯାଇଛି | ପ୍ରଶ୍ନ ଉଠେ ବ୍ରହ୍ମପୁରରେ ସିଟିବସ ସେବା ପ୍ରଚଳନର ଦେଢ଼ବର୍ଷ ପରେ ମଧ୍ୟ ସହରର ବିଭିନ୍ନ ଅଞ୍ଚଳ ମଧ୍ୟରେ ଗମନାଗମନ ସୁବିଧାଲାଗି କାହିଁକି ବସସେବା ଯୋଗାଇବା ଲାଗି କର୍ତ୍ତୃପକ୍ଷ ପରାଂମୁଖ ହେଉଛନ୍ତି ? ମୋଟ 32 ଗୋଟି ବସ ମଧ୍ୟରୁ ଅନ୍ତତଃ 4 ଗୋଟି ଯଦି ସହରର ମୁଖ୍ୟରାସ୍ତାଗୁଡ଼ିକରେ ଚଳାଚଳ କରନ୍ତା ତେବେ ସହରବାସୀ ଉପକୃତ ହୋଇପାରନ୍ତେ | ଆଗାମୀ ଗଟସଲ ବୈଠକରେ ଏ ସଂପର୍କରେ  ଆଲୋଚନା ହେବା ଉଚ଼ିତ | ନଚେତ ସିଟିବସ ସେବା ସବ୍-ଆର୍ବନ ବସସେବା ସ୍ତରରେ ହିଁ ରହିଯିବ |

Statics on senior citizen in Berhampur / ବ୍ରହ୍ମପୁରରେ ବରିଷ୍ଠ ନାଗରିକ ପରିସଂଖ୍ୟାନ

ଜନସଂଖ୍ୟା ଆକଳନ ଅନୁଯାୟୀ ଆମ ଦେଶରେ ବର୍ତ୍ତମାନ ପ୍ରାୟ ଦଶ ପ୍ରତିଶତ ଅଧିବାସୀ 60 ବର୍ଷରୁ ଉର୍ଦ୍ଧ୍ୱ ବା ବରିଷ୍ଠ ନାଗରିକ ପର୍ଯ୍ୟାୟଭୁକ୍ତ | ପୁଣି ଏମାନଙ୍କ ମଧ୍ୟରୁ ପ୍ରାୟ ଶତକଡ଼ା ଦଶ ପ୍ରତିଶତ ବୃଦ୍ଧବୃଦ୍ଧା ଏକେତ ଶଯ୍ୟାଶାୟୀ କିମ୍ୱା ଘରୁ ବାହାରିବା ଲାଗି ଅସମର୍ଥ | ଏହି ହିସାବ ଅନୁଯାୟୀ ବ୍ରହ୍ମପୁରର ସମସାମୟିକ ସ୍ଥାୟୀ ଲୋକସଂଖ୍ୟା 4 ଲକ୍ଷ 50 ହଜାର ଧରାଗଲେ ପ୍ରାୟ 45 ହଜାର ବାସିନ୍ଦା ବରିଷ୍ଠ ନାଗରିକ ଏବଂ 4 ହଜାରର 500 ବାସିନ୍ଦା ଶଯ୍ୟାଶାୟୀ କିମ୍ୱା ଘରୁ ବାହାରିବା ଲାଗି ଅସମର୍ଥ |

          ଏହି ପରିସଂଖ୍ୟାନ ଅଧ୍ୟୟନ କଲେ ପ୍ରଥମେ ମନକୁ ଆସେ ପରିଣତ ବୟସରେ ଶାରିରୀକ ଦୃଷ୍ଟିରୁ ଅସହାୟ ସ୍ଥିତିରେ ଉପନୀତ ହୋଇଥିବା ବରିଷ୍ଠ ନାଗରିକଙ୍କ ପାଇଁ ଆମ ସହରରେ କ’ଣ ସବୁ ସାମାଜିକ ସୁରକ୍ଷା ଉପଲବ୍ଧ | ଶିଶୁ, ନାବାଳାକ, ଯୁବବର୍ଗ, ମହିଳା, ସଂଖ୍ୟାଲଘୁ ସଭିଙ୍କ ପାଇଁ ଊଣା ଅଧିକେ କିଛି କିଛି ଘରୋଇ ଓ ସରକାରୀ ସୁବିଧାସୁଯୋଗ ଥିବାବେଳେ ବରିଷ୍ଠନାଗରିକ, ମୁଖ୍ୟତଃ ଶଯ୍ୟାଶାୟୀଙ୍କ ନିମନ୍ତେ ଘରୋଇ କିମ୍ୱା ସରକାରୀ କୌଣସିଟି ସ୍ତରରେ ଗୁରୁତ୍ୱ ଦିଆଯାଉଥିବା ମନେ ହୁଏନି | ଆପାତତଃ ପରିବାରବର୍ଗଙ୍କ ହେପାଜାତରେ ସେମାନଙ୍କୁ ଛାଡ଼ି ଦିଆଯାଇଥାଏ | ନିକଟ ଅତୀତରେ ସନ୍ତାନସନ୍ତତିଙ୍କ ଦ୍ୱାରା ବୃଦ୍ଧା ମାତାପିତାଙ୍କ ଭରଣପୋଷଣ ନିମନ୍ତେ ଏକ ଆଇନ ପ୍ରଣୟନ ହୋଇଥିଲେ ହେଁ ପ୍ରାୟତଃ ତାହାର ଉପଯୋଗ ସଂଖ୍ୟା ନଗଣ୍ୟ |

          ଦେଶରେ ବରିଷ୍ଠ ନାଗରିକଙ୍କ ସଂଖ୍ୟା ବଢ଼ି ଚ଼ାଲିବାରେ ଲାଗିଛି | ସ୍ୱାସ୍ଥ୍ୟ ସେବାରେ ଉନ୍ନତି, ମୁଣ୍ଡପିଛା ଆୟ ବୃଦ୍ଧି ତଥା ଶିକ୍ଷା ପ୍ରସାର କାରଣରୁ ପରମାୟୁ ବୃଦ୍ଧି ଘଟୁଛି | ‘ହେଲପ ଏଜ ଇଣ୍ଡିଆ’ ପକ୍ଷରୁ ଜାରି କରାଯାଇଥିବା ବିବରଣୀ ଅନୁଯାୟୀ 2050 ବେଳକୁ ଭାରତର ମୋଟ ଜନସଂଖ୍ୟାର 20 ପ୍ରତିଶତ ଲୋକ ବରିଷ୍ଠ ନାଗରିକ ପର୍ଯ୍ୟାୟଭୁକ୍ତ ହେବେ | ସେହି ହିସାବରେ 2050 ବେଳକୁ ଯଦି ବ୍ରହ୍ମପୁରର ଲୋକସଂଖ୍ୟା 10 ଲକ୍ଷ ଛୁଇଁଥିବ, ସେମାନଙ୍କ ମଧ୍ୟରେ ଦୁଇ ଲକ୍ଷ ବରିଷ୍ଠ ନାଗରିକଙ୍କୁ ଦେଖିବାକୁ ମିଳିବ | ସେଥି ମଧ୍ୟରୁ 20 ହଜାର ଶଯ୍ୟାଶାୟୀ ହେବା ଆଶା କରାଯାଇପାରେ |

          ସମାଜରେ ଏହି କ୍ରମବର୍ଦ୍ଧିଷ୍ଣୁ ବର୍ଗଙ୍କ ନିମନ୍ତେ ସୁଯୋଗସୁବିଧା ସୃଷ୍ଟି ଲାଗି ବିଚ଼ାରବିମର୍ଷ ତଥା ତୁରନ୍ତ କାର୍ଯ୍ୟାନୁଷ୍ଠାନ ଆବଶ୍ୟକ | ଘରୋଇ ଓ ସରକାରୀ ଉଭୟସ୍ତରରେ ଏହାକୁ ପ୍ରାଥମିକତା ଦେବାକୁ ପଡ଼ିବ | ପୌରପାଳିକାସ୍ତରରେ ଏଥି ନିମନ୍ତେ ସୁଚ଼ିନ୍ତିତ କାର୍ଯ୍ୟକ୍ରମ ପ୍ରଣୟନ ଅପରିହାର୍ଯ୍ୟ | ଗଣତାନ୍ତ୍ରିକ ଶାସନରେ ଏଥି ନିମନ୍ତେ ଚ଼ାପ ପ୍ରୟୋଗ କରିବାପାଇଁ ବରିଷ୍ଠ ନାଗରିକଙ୍କ ସାଙ୍ଗକୁ ଆସନ୍ନ ବାର୍ଦ୍ଧକ୍ୟ ପର୍ଯ୍ୟାୟଭୁକ୍ତ ନାଗରିକମାନେ ଏକଯୁଟ ହେବାର ସମୟ ଆସି ପହଞ୍ଚି ନାହିଁକି |

ସମ୍ୱାଦ (#ବ୍ରହ୍ମପୁର ସଂସ୍କରଣ) 05 ଅଗଷ୍ଟ 2016

AC compartment in Berhampur-Bhubaneswar DMU / ବ୍ରହ୍ମପୁର – ଭୁବନେଶ୍ୱର ଡ଼ିଏମୟୁରେ ଏସି ବଗି

ତୁରନ୍ତ ନ ହେଲେ ମଧ୍ୟ ଭବିଷ୍ୟତରେ #ବ୍ରହ୍ମପୁର – ଭୁବନେଶ୍ୱର ଡ଼ିଏମୟୁ ତଥା ପାଲାସା – କଟକ ଇତ୍ୟାଦି ଅନ୍ୟାନ୍ୟ ଡ଼ିଏମୟୁରେ ଏସି କୋଚ଼ ଯୋଡାଯିବା ପ୍ରସ୍ତାବ ବିଚ଼ାର କରାଯାଉଥିବା ଜଣାଯାଇଛି | ଭାରତୀୟ ରେଳପଥ ପକ୍ଷରୁ ପ୍ରକାଶିତ ଏକ ବିବୃତି ଅନୁଯାୟୀ ଦେଶର ବିଭିନ୍ନ ପ୍ରାନ୍ତରେ ଚଳାଚଳ କରୁଥିବା ଡ଼ିଏମୟୁ ଟ୍ରେନଗୁଡ଼ିକରେ ଶୀତତାପ ନିୟନ୍ତ୍ରିତ ବଗି ସଂଯୋଗ କରିବାଲାଗି ନିଷ୍ପତି ଗ୍ରହଣ କରାଯାଉଥିବା ପରିପ୍ରେକ୍ଷୀରେ ବ୍ରହ୍ମପୁରର ରେଳଯାତ୍ରୀ ସେହିଭଳି ସୁଯୋଗ ପାଇବା ଆଶା କରାଯାଇପାରେ |

          ଡ଼ିଏମୟୁ ବା ଡ଼ିଜେଲ ଇଲେକ୍ଟ୍ରିକ ମଲ୍ଟିପୁଲ ୟୁନିଟ ଗୁଡ଼ିକ ମୁଖ୍ୟତଃ ବଡ଼ ସହରଗୁଡ଼ିକୁ ସହରତଳି ଅଞ୍ଚଳ ସହ ସଂଯୋଗ କରିଥାଏ | ଆମ ଓଡ଼ିଶାରେ ଭୁବନେଶ୍ୱର ପୁରୀ ଭଳି ମୁଖ୍ୟ ସହର ସହ ବିଭିନ୍ନ ଅଞ୍ଚଳରୁ ଡ଼ିଏମୟୁ ରେଳ ସଂଯୋଗ ରହିଛି | ଏଗୁଡ଼ିକରେ କେବଳ ଅଣ-ଶୀତତାପ ନିୟନ୍ତ୍ରିତ ବଗି ଲାଗିଥାଏ ଏବଂ ଅନେକ କ୍ଷେତ୍ରରେ ଶୌଚ଼ାଳୟର ବ୍ୟବସ୍ଥା ନଥାଏ |

          ଛଅ, ଆଠ ଓ ଦଶ କୋଚ଼ ବିଶିଷ୍ଟ ଡ଼ିଏମୟୁ ଟ୍ରେନଗୁଡ଼ିକରେ ଗୋଟିଏ କିମ୍ୱା ଦୁଇଟି ଏସି କୋଚ଼ ସାଙ୍ଗକୁ ବାୟୋ ଟଏଲଟର ସଂଯୋଗ ବ୍ୟବସ୍ଥା କରିବା ନିମନ୍ତେ ସ୍ଥିରୀକୃତ ହୋଇଛି | ଏଭଳି କୋଚ଼ଗୁଡ଼ିକର ନିର୍ମାଣ କାର୍ଯ୍ୟ ଚ଼େନ୍ନଇସ୍ଥିତ ଇଣ୍ଟିଗ୍ରେଟେଡ଼ କୋଚ ଫାକ୍ଟ୍ରିରେ ଆରମ୍ଭ ହୋଇଥିବା ଜଣାଯାଇଛି | ପ୍ରଥମ ପର୍ଯ୍ୟାୟରେ ଚ଼ାରିଗୋଟି ବଗି ବ୍ୟବହୃତ ହେବାପରେ ଯାତ୍ରୀଙ୍କ ମତାମତ ନେଇ ପର୍ଯ୍ୟାୟକ୍ରମେ ଅନ୍ୟ ଡ଼ିଏମୟୁଗୁଡ଼ିକୁ ଏହି ସୁବିଧା ଯୋଗାଇ ଦିଆଯିବ |

          ଏହି ପରିପ୍ରେକ୍ଷୀରେ ବ୍ରହ୍ମପୁର ରେଳଯାତ୍ରୀ କେବେ ଡ଼ିଏମୟୁରେ ଏସି କୋଚ଼ର ସୁବିଧା ପାଇବେ ସଠିକ ଜଣା ନପଡ଼ିଥିଲେ ହେଁ ସ୍ଥାନୀୟ ରେଳଯାତ୍ରୀଙ୍କ ଚାପ ଉପରେ ଏହି ଭଳି ସୁଯୋଗ ନିର୍ଭରଶୀଳ ବୋଲି କୁହାଯାଇପାରେ |

          ବ୍ରହ୍ମପୁର ଭୁବନେଶ୍ୱର ବା କଟକ ଯାତ୍ରା ନିମନ୍ତେ ବର୍ତ୍ତମାନ ଚଳାଚଳ କରୁଥିବା ଟ୍ରେନଗୁଡ଼ିକରେ ଏସି ରେଳ ଯାତ୍ରା ସୁବିଧା ଦୁର୍ଲଭ | ମାସେ ଦୁଇ ମାସ ଆଗରୁ ସଂରକ୍ଷଣ ନକଲେ ଦୂରଗାମୀ ଟ୍ରେନଗୁଡ଼ିକରେ ଏସି ବର୍ଥ ମିଳେ ନାହିଁ | ଅବଶ୍ୟ ଭୁବନେଶ୍ୱରରୁ ବ୍ରହ୍ମପୁର ଯାତ୍ରା ଲାଗି ଏସି ବର୍ଥ ଅପେକ୍ଷାକୃତ ସୁଲଭ | ତେବେ ତୃତୀୟ ଏସି ବର୍ଥ ପିଛା ଅନ୍ୟୂନ 490 ଟଙ୍କା ଭଡ଼ା ଦେବାକୁ ପଡ଼ିଥାଏ | ଡିଏମୟୁରେ ଏସି ବଗି ଯୋଡ଼ାଗଲେ ସୁବିଧାରେ ବର୍ଥ ମିଳିବା ସାଙ୍ଗକୁ ରେଳଭଡ଼ା ମଧ୍ୟ ଯଥେଷ୍ଟ କମିଯିବ |

          ଗତ ଦେଢବର୍ଷ ତଳେ 2014 ନଭେମ୍ୱରରୁ ବିଶାଖା ଏକ୍ସପ୍ରେସ (ଏସ-7) ଓ କୋଣାର୍କ ଏକ୍ସପ୍ରେସ (ଏସ-4 ଓ ଏସ-5)ରେ ଅଣସଂରକ୍ଷିତ ସ୍ଳିପର କ୍ଳାସ ଟିକଟ କ୍ରୟ ବ୍ୟବସ୍ଥା ଆରମ୍ଭ ହୋଇଥିଲା | ଏହା ଫଳରେ ବ୍ରହ୍ମପୁରର ଯାତ୍ରୀ ସସମ୍ନାନେ ଭୁବନେଶ୍ୱର ରେଳଯାତ୍ରା ପାଇଁ ସଂରକ୍ଷିତ ବଗିରେ ଯାତ୍ରାର ସୁବିଧା ପାଇପାରିଛନ୍ତି | ବର୍ତ୍ତମାନ ଡିଏମୟୁରେ ଏସି ବଗି ସୁଯୋଗ ଯଦି ଶୀଘ୍ରଲାଗୁ ହୋଇ ପାରେ ତେବେ ଆରମଦାୟକ ଯାତ୍ରାର ଉପଲବ୍ଧ ପାଇପାରିବେ | 

ସମ୍ୱାଦ (ବ୍ରହ୍ମପୁର ସଂସ୍କରଣ) 14 ଜୁଲାଇ 2016

Forecast of monsoon at Berhampur / ବ୍ରହ୍ମପୁରରେ ମୌସୁମୀ ବର୍ଷା ପୂର୍ବାନୁମାନ

ଭାରତରେ ଦକ୍ଷିଣ ପଶ୍ଚିମ ମୌସୁମୀ ବାୟୁ ପ୍ରବାହରେ ବର୍ଷାଋତୁ ଆରମ୍ଭ ହୋଇଥାଏ | ପାରମ୍ପରିକ ଭାବେ ଜୁନ ପହିଲା ତାରିଖରେ ଏହା କେରଳ ଛୁଉଁଥିବା ବେଳେ ଚଳିତ ବର୍ଷ ସପ୍ତାହକ ବିଳମ୍ୱରେ ଜୁନ 8 ତାରିଖରେ କେରଳ ଉପକୂଳରେ ବର୍ଷା ଆରମ୍ଭ ହୋଇଛି | ମୌସୁମୀ କେରଳ ପହଞ୍ଚିବାର 8 ରୁ 10 ଦିନ ମଧ୍ୟରେ ଓଡ଼ିଶା ଆସିଥାଏ | ସେହି ହିସାବରେ ଜୁନ 16ରୁ 18 ତାରିଖ ବେଳକୁ ଓଡ଼ିଶାରେ ବର୍ଷା ହେବା କଥା |

          ସାଧାରଣତଃ ଓଡ଼ିଶାରେ ମୌସୁମୀ ବର୍ଷାର ଆଗମନ ସଙ୍ଗେ ବ୍ରହ୍ମପୁରରେ ବର୍ଷା ଆରମ୍ଭ ହୁଏନି | ମୌସୁମୀ ବାୟୁ କେରଳ ପହଞ୍ଚିଥିବା ମଙ୍ଗଳବାର ଦିନ ଅପରାହ୍ନରେ ବ୍ରହ୍ମପୁର ଓ ଆଖପାଖ ଅଞ୍ଚଳରେ ପ୍ରାକ୍-ମୌସୁମୀ ବର୍ଷା ହୋଇଥିଲା | #ବ୍ରହ୍ମପୁର ତୁଳନାରେ ଗୋପାଳପୁର ଅଞ୍ଚଳରେ ଘଡ଼ଘଡ଼ି, ବିଜୁଳି ଓ ବର୍ଷାର ପରିମାଣ ଅଧିକ ଥିଲା | ଅପରାହ୍ନ 2 ଟାରୁ 4 ଟା ମଧ୍ୟରେ ସେଠାରେ 52 ମିଲିମିଟର ବର୍ଷା ରେକର୍ଡ କରାଯାଇଥିଲା | ସାପ୍ତାହକ ପରେ 13 ଜୁନ ସୋମବାର ଦିନ ମଧ୍ୟ ଅପରାହ୍ନ 4ଟା ବେଳେ ଅଧଘଣ୍ଟାଏ ବର୍ଷା ହୋଇଥିଲା | ପାରମ୍ପରିକ ଭାବେ ରଜସଂକ୍ରାନ୍ତି ବେଳକୁ ବ୍ରହ୍ମପୁରର ପାଗ ମେଘୁଆ ରହେ | କାଁ ଭାଁ ଅସରାଏ ବର୍ଷା ହୁଏ | ଗୁଳଗୁଳି ହୁଏ |

          ବ୍ରହ୍ମପୁର ବିଶ୍ୱବିଦ୍ୟାଳୟର ପ୍ରାକ୍ତନ ସାମୁଦ୍ରିକ ବିଜ୍ଞାନ ଅଧ୍ୟାପକ ଡ଼କ୍ଟର ଏ.ଏସ୍.ଏନ୍. ମୂର୍ତ୍ତିଙ୍କ ବିଶ୍ଳେଷଣ ଅନୁଯାୟୀ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଜୁନ ଦ୍ୱିତୀୟ ସପ୍ତାହ ବେଳକୁ ବ୍ରହ୍ମପୁର ପହଞ୍ଚୁଥିଲେ ମଧ୍ୟ ଜୁନ ମାସରେ ଆଶାନୁରୂପ ବର୍ଷା ହୁଏ ନାହିଁ | ଜୁଲାଇ ମାସରେ ବୃଷ୍ଟିପାତର ପ୍ରାବଲ୍ୟ ବୃଦ୍ଧି ପାଏ | ଜୁଲାଇ ଓ ଅଗଷ୍ଟ ମାସରେ ବର୍ଷା ପ୍ରାଚୁର୍ଯ୍ୟ ଦିନଗୁଡିକରେ ଦୈନିକ ହାରାହାରି 30 ରୁ 40 ମିଲିମିଟର ଯାଏଁ ବର୍ଷା ହୋଇଥାଏ |

          ବ୍ରହ୍ମପୁରରେ ବାର୍ଷିକ ପ୍ରାୟ 200 ସେଣ୍ଟିମିଟର ବର୍ଷା ରେକର୍ଡ କରାଯାଇଥାଏ | ଅଗଷ୍ଟ-ସେପ୍ଟେମ୍ୱର ମାସରେ ମୌସୁମୀକାଳୀନ ଲଘୁଚ଼ାପ ଓ ନଭେମ୍ୱର-ଡ଼ିସେମ୍ୱର ମାସରେ କ୍ରାନ୍ତୀୟ ଲଘୁଚ଼ାପ ଯୋଗୁଁ ସହରରେ ଲଗାଣ ବର୍ଷା ଦେଖିବାକୁ ମିଳିଥାଏ | ଜୁନରୁ ସେପ୍ଟେମ୍ୱର ମାସ ମଧ୍ୟରେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଓ ଅକ୍ଟୋବରରୁ ଡ଼ିସେମ୍ୱର ମାସ ମଧ୍ୟରେ ଉତ୍ତର-ପୂର୍ବ ମୌସୁମୀବାୟୁ ପ୍ରଭାବରେ ବର୍ଷା ହୋଇଥାଏ |

          ପାଣିପାଗ ପୂର୍ବାନୁମାନ ଏକ ବୈଜ୍ଞାନକ ଧାରା | ଦକ୍ଷିଣ-ପଶ୍ଚିମ ମୌସୁମୀ ବାୟୁ ଚଳାଚଳ ମୁଖ୍ୟତଃ ତିନିଗୋଟି ସୂତ୍ରରେ ପୂର୍ବାନୁମାନ କରାଯାଇଥାଏ | ପ୍ରଥମତଃ ଆନ୍ତର୍ଜାତିକ କ୍ଷେତ୍ରରେ ବାୟୁ ଚଳାଚଳର ପରିସଂଖ୍ୟାନ, ଦ୍ୱିତୀୟତଃ ଅତୀତରେ ବୃଷ୍ଟିପାତ ଜନିତ ତଥ୍ୟାବଳୀ ଓ ତୃତୀୟତଃ ସମକାଳୀନ ଭୁପୃଷ୍ଠ ତଥା ସାମୁଦ୍ରିକ ଅଞ୍ଚଳରେ ବାୟୁ ଚଳାଚଳ ଧାରା ବିଶ୍ଳେଷଣ ଦ୍ୱାରା ମୌସୁମୀ ବର୍ଷାର ପୂର୍ବାନୁମାନ ହୋଇଥାଏ | ଗତ କିଛି ବର୍ଷ ଧରି ପାଣିପାଗ ନିରୀକ୍ଷଣ ଦିଗରେ ଅତ୍ୟାଧୁନିକ ଭିତ୍ତିଭୂମି ସୃଷ୍ଟି କରାଯିବା ପରେ ଭାରତୀୟ ପାଣିପାଗ ବିଭାଗର ପୂର୍ବାନୁମାନ ପ୍ରାୟତଃ ସଠିକ ଘଟୁଥିବା ଦେଖିବାକୁ ମିଳୁଛି | ତେବେ ବି ପାଣିପାଗର ପୂର୍ବାନୁମାନରେ ଶତକଡ଼ା ଶତ ପ୍ରତିଶତ ସତ୍ୟତା କେବେ ହେଁ ସମ୍ଭବପର ନୁହେଁ ବୋଲି ବୈଜ୍ଞାନିକମାନେ ସ୍ୱୀକାର କରିଥାନ୍ତି |

ସମ୍ୱାଦ (ବ୍ରହ୍ମପୁର ସଂସ୍କରଣ) 14 ଜୁନ 2016

Neglecting the culture of water bodies / ଅବହେଳାରେ ପୁଷ୍କରଣୀ ସଂସ୍କୃତି

ସପ୍ତଦଶ ଶତାଦ୍ଦୀ ମଧ୍ୟଭାଗରୁ କ୍ରମବର୍ଦ୍ଧିଷ୍ଣୁ #ବ୍ରହ୍ମପୁର ସହର ମଠ, ମନ୍ଦିର ଓ ପୁଷ୍କରଣୀମୟ ଜନବସତି ରୂପେ ଗଢ଼ି ଉଠିଥିଲା | ଐତିହାସିକମାନଙ୍କ ମତରେ ୧୬୭୨ ଖ୍ରୀଷ୍ଟାଦ୍ଦରେ ହରିଡ଼ାଖଣ୍ଡିଠାରେ ଲକ୍ଷ୍ମୀନୃସିଂହ ସ୍ୱାମୀ ମନ୍ଦିର ଓ ତାହାର କିଛି ସମୟ ପୂର୍ବରୁ ବର୍ତ୍ତମାନର ବଡ଼ବଜାରଠାରେ ମହୁରି ରାଜବାଟୀ ପ୍ରତିଷ୍ଠା ପରେ ପରେ ସେହି ଅଞ୍ଚଳ ପରିସୀମାରେ ବହୁଳ ପରିମାଣରେ ମଠ ମନ୍ଦିରର ଉପସ୍ଥିତି କାରଣରୁ ଏହାକୁ ‘ଦେବତାଙ୍କପୁର’ ବା ‘ବ୍ରହ୍ମପୁର’ ନାମିତ କରାଯାଇଥିଲା | ଘନ ସବୁଜିମାର ଆସ୍ତରଣ ଓ ଜଳାଶୟ ସଂଗକୁ ପ୍ରଶସ୍ତ ରାସ୍ତାଘାଟ ଓ ପରିଚ୍ଛନ୍ନତା ବ୍ରହ୍ମପୁରକୁ ପରବର୍ତ୍ତୀ ଅବସ୍ଥାରେ ସମଗ୍ର ମାଡ୍ରାସ ପ୍ରେସିଡ଼େନ୍ସିରେ ସୁନାମ ଅର୍ଜନଲାଗି ସମର୍ଥ କରାଇପାରିଥିଲା |

          ମଠ ମନ୍ଦିର ସଂଲଗ୍ନ ପୁଷ୍କରଣୀ ଖନନ ଭାରତୀୟ ସଂସ୍କୃତିର ଏକ ଅଂଶ ବିଶେଷ | ଅତଏବ ଅଧିକ ସଂଖ୍ୟାରେ ମଠମନ୍ଦିରର ଅର୍ଥ ଅଧିକ ସଂଖ୍ୟାରେ ପୁଷ୍କରଣୀର ଉପସ୍ଥିତି ସ୍ୱାଭାବିକ | ବିଭିନ୍ନ ଧାର୍ମିକ ବିଧିବିଧାନ ପୁଷ୍କରଣୀରେ ସମାହିତ ହୋଇଥାଏ ଏବଂ ପୁଷ୍କରଣୀର ରକ୍ଷଣାବେକ୍ଷଣ ସ୍ଥାନୀୟ ନାଗରିକଙ୍କ କର୍ତ୍ତବ୍ୟରୂପେ ପରିଗଣିତ ହୋଇ ଆସିଛି |

          ତେବେ ସ୍ୱାଧୀନୋତ୍ତର ଅବସ୍ଥାରେ ବ୍ରହ୍ମପୁରରେ ଏହି ପରମ୍ପରାରେ ବିଚ୍ୟୁତି ଦେଖିବାକୁ ମିଳିଲା | ପ୍ରଥମତଃ ପୁଷ୍କରଣୀଗୁଡ଼ିକ ରକ୍ଷଣାବେକ୍ଷଣ ଲାଗି ସାମାଜିକ ତଥା ପ୍ରଶାସନିକସ୍ତରରେ ଅବହେଳା ପ୍ରଦର୍ଶନ କରାଗଲା, ଦ୍ୱିତୀୟତଃ ବ୍ୟକ୍ତିଗତ ମାଲିକନାରେ ଥିବା ବହୁ ପୁଷ୍କରଣୀଗୁଡ଼ିକୁ ପୋତି ଦିଆଯାଇ ଗୃହନିର୍ମାଣ ଲାଗି ଡ଼ିହ ପ୍ରସ୍ତୁତ କରାଗଲା ଓ ତୃତୀୟତଃ ସରକାରୀ ମାଲିକାନାରେଥିବା ଅନ୍ୟ କେତେକ ବୃହତ ପୁଷ୍କରଣୀକୁ ପୋତି ବିଭିନ୍ନ ସାର୍ବଜନୀନ କାର୍ଯ୍ୟରେ ଲଗାଗଲା | ଫଳରେ ବ୍ରହ୍ମପୁରରୁ ପୁଷ୍କରଣୀ ସଂସ୍କୃତି କ୍ରମଶଃ ଲୋପ ପାଇବାରେ ଲାଗିଲା | ତା’ ସତ୍ତ୍ୱେ ବର୍ତ୍ତମାନ ସୁଦ୍ଧା ସହରରେ ୪୨ ଗୋଟି ପୋଖରୀ ବଞ୍ଚରହିଛି |

          ଜନପଦରେ ଜନସାଧାରଣଙ୍କ ପାଇଁ ଜଳଉତ୍ସରୂପେ କାର୍ଯ୍ୟକରିବା ସାଙ୍ଗକୁ ଭୂଗର୍ଭରେ ଜଳସ୍ତର ନିୟନ୍ତ୍ରଣ ତଥା ପାରିପାର୍ଶ୍ୱିକ ବାୟୁମଣ୍ଡଳରେ ଆଦ୍ରତା ବଜାୟ ରଖିବାରେ ପୁଷ୍କରଣୀଗୁଡ଼ିକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥାଏ | ବର୍ତ୍ତମାନ ପୁଷ୍କରଣୀ ଅଭାବରେ ବ୍ରହ୍ମପୁର ସହରବାସୀ ତତ୍ ଜନିତ ପ୍ରତିକୂଳ ଅବସ୍ଥାର ସମ୍ମୁଖୀନ ହେଉଛନ୍ତି | ଚଳିତ ଗ୍ରୀଷ୍ମଋତୁରେ ସହରରେ ତାପମାତ୍ରା ବୃଦ୍ଧିର ଏହା ଅନ୍ୟତମ କାରଣ |

          ବ୍ରହ୍ମପୁର ପୌରପାଳିକାଙ୍କ ପକ୍ଷରୁ ସହରର ବିକାଶଲାଗି ଆନ୍ତର୍ଜାତିକ ସହାୟତା ଆବେଦନ କରାଯିବା ଅବସରରେ ଏଠାକାର ଜୀର୍ଣ୍ଣ ଅବସ୍ଥାରେ ଥିବା ପୁଷ୍କରଣୀଗୁଡ଼ିକର ରକ୍ଷଣାବେକ୍ଷଣ ପାଇଁ ଅନୁଦାନକାରୀ ସଂସ୍ଥା ଗୁରୁତ୍ୱ ଆରୋପ କରିଥିଲେ | ଚ଼ବିଶି ଗୋଟି ପୁଷ୍କରଣୀର ପୁନରୁଦ୍ଧାର ପାଇଁ ପ୍ରାୟ ଷୋହଳ କୋଟି ଟଙ୍କା ମଂଜୁର ହୋଇଥିଲା | ୨୦୦୭ ମସିହାରେ ଆରମ୍ଭ କରାଯାଇଥିବା ଏହି କାର୍ଯ୍ୟକ୍ରମରେ ପ୍ରଥମ ପର୍ଯ୍ୟାୟରେ ୧୭ ଗୋଟି ଏବଂ ଦ୍ୱିତୀୟ ପର୍ଯ୍ୟାୟରେ ୭ ଗୋଟି ପୁଷ୍କରଣୀର ପୁନରୁଦ୍ଧାର କାର୍ଯ୍ୟକ୍ରମ ହାତକୁ ନିଆଯାଇଥିଲା | ତେବେ ସେଥିରେ ଟେଣ୍ଡର ଫିକ୍ସିଂ ଓ ନିମ୍ନମାନର କାର୍ଯ୍ୟ ସଂପର୍କରେ ଅଭିଯୋଗ ବର୍ତ୍ତମାନ ସମ୍ୱାଦପତ୍ରର ପୃଷ୍ଠା ମଣ୍ଡନ କରୁଛି |

          ସହରାଞ୍ଚଳରେ ପାରିପାର୍ଶ୍ୱିକ ପରିବେଶ ସନ୍ତୁଳନରେ ପୁଷ୍କରଣୀର ଭୂମିକା ସଂପର୍କରେ ଗୁରୁତ୍ୱପୂର୍ଣ୍ଣ ଉଦାହରଣମାନ ସମୟକ୍ରମେ ଚର୍ଚ୍ଚାର ପରିସରକୁ ଆସିବାରେ ଲାଗିଛି | ଗତବର୍ଷ ବର୍ଷାଦିନେ ଚ଼େନ୍ନାଇରେ ଓ ପୂର୍ବବର୍ଷ ମୁମ୍ୱାଇରେ ଜଳାଶୟ ଅଭାବ କାରଣରୁ ରାସ୍ତାଘାଟର ବନ୍ୟାଜଳ ବାସଗୃହ ମଧ୍ୟକୁ ପ୍ରବେଶ ଜନିତ ସହରବାସୀଙ୍କ ଦୁର୍ଦ୍ଦଶା ଅନ୍ୟାନ୍ୟ ସହରପ୍ରତି ଚ଼େତାବନୀ ସାଜିଛି | ବ୍ରହ୍ମପୁରରେ ଆସିକାରୋଡ଼ରେ ଏକ ବିରାଟ ଜଳାଶୟ ପୋତି ସେଥିରେ ମାର୍କେଟ କମ୍ପ୍ଳେକ୍ସ  ନିର୍ମାଣଲାଗି ପ୍ରସ୍ତାବ ଦୀର୍ଘଦିନରୁ ଲଟକି ରହିଛି | ଠିକ୍ ତାହାର ସାମ୍ନାରେ ଅନ୍ୟଏକ ଜଳାଶୟ ତାମେୟା ବନ୍ଧ ପୋତି ଗୋଟିଏ ପାର୍କ ଗଢ଼ାଗଲା | ସହରର ଅନ୍ୟାନ୍ୟ ଅଞ୍ଚଳରେ ଛୋଟ ବଡ଼ ବହୁ ପୁଷ୍କରଣୀ ପୋତିବା ଯୋଜନା ଚାଲିଥିବା ଖବର ପ୍ରକାଶ ପାଉଛି | ଅନ୍ତତଃ ପକ୍ଷେ ଏଣିକି ପୁଷ୍କରଣୀ ପୋତା ସଂସ୍କୃତିକୁ ସାଧାରଣସ୍ତରରେ ପ୍ରତିବାଦ କରିବା ସମୟ ଆସିପହଞ୍ଚିଛି | ଏବର୍ଷ ପ୍ରଚ଼ଣ୍ଡ ରୌଦ୍ରତାପରୁ ନିଜକୁ ସୁରକ୍ଷିତ ରଖିବା ପାଇଁ ଗୃହ ମଧ୍ୟରେ କଠୋରୀଗୁଡ଼ିକରେ ଖୋଲାପାତ୍ରରେ ପାଣି ରଖିବା ପାଇଁ ବୈଜ୍ଞାନିକମାନେ ପରାମର୍ଶ ଦେଉଛନ୍ତି | ଏହାଦ୍ୱାରା କଠୋରୀରେ ଆଦ୍ରତା ବଢ଼ିବା କୁହାଯାଉଛି | ତେବେ ଜନପଦରେ ଆଦ୍ରତା ବୃଦ୍ଧି କରି ପାଣିପାଗରେ ସନ୍ତୁଳନ ରକ୍ଷା ପାଇଁ ପୁଷ୍କରଣୀ କଥା ଆମେ କିପରି ଭୂଲି ଯିବା ?

ସଂବାଦ (ବ୍ରହ୍ମପୁର ସଂସ୍କରଣ) ୨୦ ଏପ୍ରିଲ ୨୦୧୬ ରେ ପ୍ରକାଶିତ

Proposal on multi-stored parking lot / ବହୁତଳ ବିଶିଷ୍ଟ ‘ପାର୍କିଂ – ଲଟ’ ପ୍ରସ୍ତାବ

କ୍ରମବର୍ଦ୍ଧିଷ୍ଣୁ #ବ୍ରହ୍ମପୁର ସହରରେ ଟ୍ରାଫିକ ସମସ୍ୟା ସମାଧାନ ନିମନ୍ତେ ଗତ ଏପ୍ରିଲ ପ୍ରଥମ ସପ୍ତାହରେ ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ମୁଖ୍ୟତଃ କମାପଲ୍ଲୀ ଓ ବଡ଼ବଜାରରେ ପାର୍କିଂ ଓ ଜବରଦଖଲଜନିତ କାରଣରୁ ସୃଷ୍ଟି ହେଉଥିବା ଟ୍ରାଫିକ ସମସ୍ୟା ସଜାଡ଼ିବାଲାଗି କେତେକ ନୀତିଗତ ନିଷ୍ପତ୍ତି ନିଆ ଯାଇଛି | କମାପଲ୍ଲୀ ଛକ ଅଞ୍ଚଳରେ ଓଭରବ୍ରିଜ ତଳେ ତଥା ବଡ଼ବଜାର ଅଞ୍ଚଳରେ କମଳାବାରୀ ସାହୀ ଓ ଧାନମେରା ସାହୀଠାରେ ‘ପାର୍କିଂ ଜୋନ’ ଚ଼ିହ୍ନଟ କରିବା ଉଦ୍ୟମ ସେଥିମଧ୍ୟରୁ ଅନ୍ୟତମ | ଏହାଛଡ଼ା ସହରର ଅନ୍ୟାନ୍ୟ ଅଞ୍ଚଳରେ ପାର୍କିଂ ପାଇଁ ଖାଲିସ୍ଥାନ ଚ଼ିହ୍ନଟ ଲାଗି ମଧ୍ୟ ସମୟସୀମା ଧାର୍ଯ୍ୟ ହୋଇଛି |

          ଯଦିଓ ପ୍ରଶାସନିକସ୍ତରରେ ଏହା ଏକ ଧରାବନ୍ଧା ରୁଟିନ କାର୍ଯ୍ୟସୂଚ଼ୀ, ତଥାପି ସହରର ଅସଜଡ଼ା ଟ୍ରାଫିକ ବ୍ୟବସ୍ଥାକୁ ଗୁରୁତ୍ୱର ସହ ବିଚ଼ାର କରିବା ସମୟ ଆସି ପହଞ୍ଚିଛି | ବ୍ରହ୍ମପୁରର ପରିସୀମା ପରିବ୍ୟାପ୍ତ ହୋଇ ଚାଲିଥିବା ତଥା ଦୂରଦୂରାନ୍ତରେ ବସବାସ କରୁଥିବା ସହରବାସୀ ମୁଖ୍ୟତଃ ଦୁଇଚକିଆ ଯାନରେ ସହରର କେନ୍ଦ୍ରାଞ୍ଚଳରେ ବିଭିନ୍ନ କାର୍ଯ୍ୟ ଉଦ୍ଦେଶ୍ୟରେ ପହଞ୍ଚୁଥିବା ବେଳେ ଯାନବାହାନ ପାର୍କିଂ ପାଇଁ ସ୍ଥାନ ଅଭାବ କ୍ରମଶଃ ଉତ୍କଟ ହେବାରେ ଲାଗିଛି | ତେବେ ଜନଗହଳିପୂର୍ଣ୍ଣ ବଜାରଅଞ୍ଚଳଗୁଡ଼ିକରେ ସ୍ଥାନ ଅଭାବ କାରଣରୁ ‘ପାର୍କିଂ ଜୋନ’ ସ୍ଥାପନ ହୋଇ ପାରୁନାହିଁ | ଆଜକୁ ଛଅ ବର୍ଷ ପୂର୍ବେ ଜୁଲାଇ ୨୦୧୦ରେ ତତ୍ କାଳୀନ ବ୍ରହ୍ମପୁରର ପୋଲିସ ଏସପି ରାମଲିଙ୍ଗ ବନ୍ଧ ପାର୍ଶ୍ୱ ଗୌତମ ସିନେମା ହଲ ରାସ୍ତା, ରୁକ୍ମିଣୀ ସିନେମା ହଲ ପାର୍ଶ୍ୱର ଧର୍ମନଗର ରାସ୍ତା ଓ କରପୋରେସନ ରୋଡ଼ସ୍ଥିତ ବିଜୁ ପଟ୍ଟନାୟକ ପାର୍କ ପାର୍ଶ୍ୱ ରାସ୍ତାକଡ଼ରେ ‘ପାର୍କିଂ ଜୋନ’ ଗଠନ ପାଇଁ ପ୍ରସ୍ତାବ ବିଚ଼ାରକୁ ଆଣିଥିଲେ | ସେଥି ମଧ୍ୟରୁ ଧର୍ମନଗର ରାସ୍ତାକଡ଼ରେ ଚାରି ଚକିଆ ଯାନବାହାନ ପାର୍କିଂ କରାଯିବା ବେଳେ ଗୌତମ ସିନେମା ହଲ ରାସ୍ତା ଓ ବିଜୁ ପଟ୍ଟନାୟକ ପାର୍କ ପାର୍ଶ୍ୱରାସ୍ତା କଡ଼ରେ ଦୁଇ ଚକିଆ ଯାନବାହାନ ପାର୍କିଂ ବ୍ୟବସ୍ଥା ହେବ ବୋଲି କୁହାଯାଉଥିଲା | କିନ୍ତୁ ସମୟକ୍ରମେ ସେଭଳି ପ୍ରସ୍ତାବ କାର୍ଯ୍ୟକାରୀ ହୋଇ ପାରିନଥିଲା |

          ବ୍ରହ୍ମପୁରରେ ବହୁତଳ ବିଶିଷ୍ଟ ‘ପାର୍କିଂ ଲଟ’ ନିର୍ମାଣ ପ୍ରସ୍ତାବକୁ ବିକଳ୍ପଭାବେ ଅନୁଧ୍ୟାନ କରାଯାଇପାରେ | ବିଦେଶରେ ସବୁ ବଡ଼ ସହର ସାଙ୍ଗକୁ ଆମ ଦେଶରେ ମୁମ୍ୱାଇ, ଚ଼େନ୍ନାଇରେ ମଧ୍ୟ ଏଭଳି ବ୍ୟବସ୍ଥା ଆରମ୍ଭ ହୋଇସାରିଛି | ଭୁବନେଶ୍ୱରଠାରେ ବହୁତଳ ବିଶିଷ୍ଟ ପାର୍କିଂ ଲଟ ନିର୍ମାଣ ପ୍ରସ୍ତାବ ନୀତିଗତଭାବେ ଗୃହୀତ ହୋଇଛି | ଏଭଳି ଯୋଜନା କାର୍ଯ୍ୟକାରୀ କରିବା ପାଇଁ ଉଦାହରଣ ସ୍ୱରୂପ ବ୍ରହ୍ମପୁର ପୌର ନିଗମ ମାଲିକାନାରେ ଥିବା ପୁରୁଣା ବସଷ୍ଟାଣ୍ଡ କଥା ବିଚ଼ାରକୁ ନିଆଯାଉ | ଏଠାରେ ଏକ ଚ଼ାରିତଳ ବିଶିଷ୍ଟ ‘ପାର୍କିଂ ଲଟ’ ନିର୍ମାଣ କରାଯାଇପାରେ | ସବା ତଳେ ଅଟୋ ରିକ୍ସା ଓ ଟ୍ୟାକ୍ସି, ପ୍ରଥମ ମହଲାରେ ଟାଉନବସ, ଦ୍ୱିତୀୟ ମହଲରେ ଦୁଇ ଚ଼କିଆ, ତୃତୀୟ ମହଲାରେ ଚ଼ାରି ଚକିଆ ଯାନବାହାନ ଓ ଚ଼ତୁର୍ଥ ମହଲାରେ ରୁଫ ଟପ ପାର୍କ – ଫାଉଣ୍ଟେନ – ଫୁଡ଼ ପାର୍କ ଗଢ଼ାଯାଇ ପାରେ | ଏଭଳି ଏକ ‘ପାର୍କିଂ ଲଟ’ର ସୁବିଧା ମିଳିଲେ ଖଲ୍ଲିକୋଟ କ୍ଳଷ୍ଟର ବିଶ୍ୱବିଦ୍ୟାଳୟଠାରୁ ଗିରିଜା ଛକ ଯାଏଁ ଅଞ୍ଚଳର ପାର୍କିଂ ସମସ୍ୟା ସମାଧାନ ହୋଇପାରିବ, ରାସ୍ତାକଡ଼ର ଠିଆ କ୍ୟାଣ୍ଟିନଗୁଡ଼ିକୁ ଉଚ୍ଛେଦ କରି ଥଇଥାନର ବ୍ୟବସ୍ଥା ସମ୍ଭବପର ହେବ ଏବଂ ସର୍ବୋପରି ସହରର ମଧ୍ୟସ୍ଥଳରୁ ପବ୍ଳିକ ଟ୍ରାନ୍ସପୋର୍ଟର ସୁବିଧା ଦେଇହେବ | ‘ବ୍ରହ୍ମପୁର ଡ଼େଭଲାପମେଣ୍ଟ ଅଥାରିଟି’ ମାଲିକାନାରେ ଥିବା ବିବାଦମାନ ‘ଗଜପତି ପ୍ଳାଜା’ ଚ଼ିହ୍ନଟ ଜମିକୁ ମଧ୍ୟ ଅନ୍ୟଏକ ବହୁତଳ ବିଶିଷ୍ଟ ‘ପାର୍କିଂ ଲଟ’ରେ ପରିଣତ କରାଯାଇ ପାରିଲେ ତଥା ରାମଲିଙ୍ଗ ବନ୍ଧ କଡ଼ରେ ପ୍ରସ୍ତାବିତ ‘ସ୍କାଇ-ୱାକ ଓ ପାର୍କିଂ ଜୋନ’ ନିର୍ମାଣ କାର୍ଯ୍ୟ ସରିଲେ ସହରର ଜନାକୀର୍ଣ୍ଣ ମଧ୍ୟଭାଗରେ ତିନି ଗୋଟି ‘ପାର୍କିଂ ଲଟ’ ଦୀର୍ଘ ଭବିଷ୍ୟତ ପାଇଁ ବ୍ରହ୍ମପୁରର ଟ୍ରାଫିକ ସମସ୍ୟା ସମାଧାନରେ ସହାୟକ ହୋଇପାରିବ ବୋଲି ଆଶା କରାଯାଇପାରେ | ପୁରୁଣା ବସଷ୍ଟାଣ୍ଡ ଓ ଗଜପତି ପ୍ଳାଜା ଜମିରେ ‘ପାର୍କିଂ ଲଟ’ ନିର୍ମାଣ ପାଇଁ ‘ପ୍ରାଇଭେଟ – ପବ୍ଳିକ – ପାର୍ଟନରସିପ’ ଧାରାରେ ଘରୋଇ ପୁଞ୍ଜି ବିନିଯୋଗ କରାଯାଇ ଉପଭୋକ୍ତା ଜନସାଧାରଣଙ୍କଠାରୁ ଭଡ଼ା ଆଦାୟରେ ନିର୍ମାଣ ଓ ରକ୍ଷଣାବେକ୍ଷଣ ଖର୍ଚ୍ଚ ଭରଣା ସମ୍ଭବପର | 

What is Rahagiri / ‘ରାହଗିରି’ ...କ’ଣ ? କେବେଠୁ ? କେଉଁଠୁ ? କାହିଁକି ?...

ବ୍ରହ୍ମପୁରରେ ‘ରାହଗିରି’ ଦିବସ 10 ଏପ୍ରିଲ 2016 ରବିବାରଠୁଁ ପାଳନ କରିବା ନିମନ୍ତେ ନିଷ୍ପତ୍ତି ଗୃହୀତ ହୋଇଛି | ଭୁବନେଶ୍ୱରରେ 17 ଜାନୁୟାରୀ 2016 ଠାରୁ ‘ରାହଗିରି’ ଆରମ୍ଭ ହେବାପରେ ପୁରୀ ପରକୁ ଏହି ଦିବସ ପାଳନରେ #ବ୍ରହ୍ମପୁର ହେବ ରାଜ୍ୟର ତୃତୀୟ ସହର |

          ‘ରାହଗିରି’ ଏକ ହିନ୍ଦୀ ଶଦ୍ଦ | ‘ରାହ’ର ଅର୍ଥ ରାସ୍ତା ଓ ‘ଗିରି’ ଆଦର୍ଶ ଅର୍ଥରେ ବ୍ୟବହୃତ ହୋଇଥାଏ .... ଯେପରି କି ଗାନ୍ଧିଗିରି, ଚାମଚାଗିରି ଇତ୍ୟାଦି | ‘ରାହଗିରି’ର ଓଡ଼ିଆ ଅନୁବାଦ ‘ପଥଚ଼ାରୀ ଦିବସ’ | ରାଷ୍ଟ୍ରୀୟସ୍ତରରେ ରାହଗିରି ଫାଉଣ୍ଡେସନ ନାମକ ଏକ ସ୍ୱେଚ୍ଛାସେବୀ ସଂଗଠନ ‘ରାହଗିରି’ର ଟ୍ରେଡ଼ମାର୍କ ରେଜିଷ୍ଟ୍ରେସନ କରିଛି | ଅର୍ଥାତ ‘ରାହଗିରି’ ଶଦ୍ଦ ସେମାନଙ୍କ ବିନାଅନୁମତିରେ ବ୍ୟବହୃତ ହୋଇପାରିବ ନାହିଁ କିମ୍ୱା ଅଞ୍ଚଳିକ ଭାଷା ସମୂହରେ ଅନୁବାଦିତ ହୋଇପାରିବ ନାହିଁ  |

          ଭାରତରେ ‘ରାହଗିରି’ 17 ନଭେମ୍ୱର 2013ରେ ହରିଆନାର ଗୁରୁଗାଁଓରେ ଆରମ୍ଭ ହୋଇଥିଲା | ପରବର୍ତ୍ତୀ କାଳରେ ଦିଲ୍ଲୀ, ଲୁଧିଆନା, ନଭି ମୁମ୍ୱାଇ, ବାଙ୍ଗାଲୁର ଇତ୍ୟାଦି ସହରରେ ମଧ୍ୟ ଏହି ଉତ୍ସବ ପାଳନ ସଂପ୍ରସାରିତ ହେବାରେ ଲାଗିଲା |

          ‘ରାହଗିରି’ ଦିବସ ପାଳନର ଉତ୍ପତି ଦକ୍ଷିଣ ଆମେରେକୀୟ ରାଷ୍ଟ୍ର କଲମ୍ୱିଆର ବୋଗୋଟା ସହରରେ 1976ରୁ ପାଳିତ ସାପ୍ତାହିକ ‘ସିସ୍ଳୋଭିଆ’ ଦିବସକୁ ଚ଼ିହ୍ନଟ କରାଯାଇଥାଏ | ସ୍ପାନିସ ଭାଷାରେ ‘ସିସ୍ଳୋଭିଆ’ର ଅର୍ଥ ସାଇକଲ ଚ଼ାଳନା ପାଇଁ ରାସ୍ତା ଅବରୋଧକୁ ବୁଝାଇଥାଏ | ପ୍ରତି ସପ୍ତାହରେ ଏକ ନିର୍ଦ୍ଧିଷ୍ଟ ଦିବସର ନିର୍ଦ୍ଧିଷ୍ଟ ସମୟସୀମାରେ ରାଜରାସ୍ତା ମଟରଗାଡ଼ି ଚଳାଚଳଲାଗି ନିଷିଦ୍ଧ କରି ପଥଚ଼ାରୀ ତଥା ସାଇକଲ ଚ଼ାଳନା ପାଇଁ ରାସ୍ତା ଉନ୍ମୁକ୍ତ କରାଯାଉଥିବା କଲମ୍ୱିଆର ଏହି ପ୍ରଥା କାଳକ୍ରମେ ଯୁକ୍ତରାଷ୍ଟ୍ର ଆମେରିକା, କାନାଡ଼ା, ଅଷ୍ଟ୍ରେଲିଆ, ବ୍ରାଜିଲ, ମେକ୍ସିକୋ, ବେଲଜିୟମ ଓ ଇସ୍ରାଏଲ ପ୍ରଭୃତି ରାଷ୍ଟ୍ରକୁ ବ୍ୟାପିଥିଲା | ଏହି ଉତ୍ସବକୁ ଦେଶ ବିଦେଶରେ ଲୋକପ୍ରିୟ କରାଇବା ପାଇଁ କେତେକ ଅନ୍ତଃରାଷ୍ଟ୍ରୀୟ ସ୍ୱେଚ୍ଛାସେବୀ ସଂଗଠନ ନିୟୋଜିତ ହୋଇଛନ୍ତି | ଆମ ଦେଶରେ ଗରିବ ଓ ଅବହେଳିତ ବର୍ଗଙ୍କ ଉନ୍ନୟନ ପାଇଁ ବିଗତ ଚ଼ାରି ପାଞ୍ଚ ଦଶନ୍ଧୀଧରି ସ୍ୱେଚ୍ଛାସେବୀ ସଂଗଠନମାନ କାମ କରୁଥିବା ଭଳି ବଡ଼ବଡ଼ ଦେଶରେ ସହରାଞ୍ଚଳରେ ବିଭିନ୍ନ ସୁବିଧାସୁଯୋଗ ସୃଷ୍ଟିପାଇଁ ମଧ୍ୟ ସ୍ୱେଚ୍ଛାସେବୀ ସଂଗଠନମାନ ତତ୍ପର ଅଛନ୍ତି | ବିଶେଷକରି ଜଗତୀକରଣପରେପରେ ସହରାଞ୍ଚଳ ବିକାଶ ନିମନ୍ତେ ବିଭିନ୍ନ ପ୍ରାୟୋଜିତ କାର୍ଯ୍ୟକ୍ରମ ଆରମ୍ଭ ହୋଇଛି | ଗାଡ଼ିମଟରଜନିତ ପ୍ରଦୂଷଣ, ସୁସ୍ଥ ଶରୀର ନିମନ୍ତେ ବ୍ୟାୟାମ, ଗୋଷ୍ଠୀଗତ ଜୀବନରେ ଭାଗିଦାରୀ ଇତ୍ୟାଦି ତତ୍ତ୍ୱର ପ୍ରଚ଼ାର ନିମନ୍ତେ ‘ରାହଗିରି’ ଧରଣର ଉତ୍ସବମାନ ସୃଷ୍ଟି ହୋଇଛି | ଏଥିଲାଗି ‘ସେଲ’ ଭଳି ଆନ୍ତର୍ଜାତିକ କମ୍ପାନୀମାନେ ଆର୍ଥିକ ସହାୟତା ଦେଉଛନ୍ତି ଏବଂ ଆଧୁନିକ ପରିଚ଼ାଳନା ବିଧି ଉପଯୋଗରେ ଏହିରକମର ପ୍ରଥା ବିଜ୍ଞାପିତ ହୋଇ ବହୁଳ ଜନସଂଖ୍ୟାର ଚର୍ଚ୍ଚାର ପରିସରକୁ ଆସିପାରୁଛି |

          କଲମ୍ୱିଆର ‘ସିସ୍ଳୋଭିଆ’ ବ୍ରହ୍ମପୁରକୁ ‘ରାହଗିରି’ରେ ସଂପ୍ରସାରିତ ହେବା ଅବସରରେ ଏଭଳି ଏକ ଗଣଉତ୍ସବ ପାଳନର ଉଦ୍ଦେଶ୍ୟ ବହୁମାତ୍ରାରେ ପରିବର୍ତ୍ତିତ ହୋଇଛି | ବ୍ରହ୍ମପୁର ସହରସାରା ଏକ ଅଗ୍ରଣୀ ବ୍ୟାଙ୍କ ସହଯୋଗରେ ଟଣା ହୋଇଥିବା ଫ୍ଳେକ୍ସ ବ୍ୟାନର ଦେଖି ମଟରସାଇକଲରେ ତ୍ରିବଲ-ଲୋଡ଼ରେ ସହରବାସୀ ଟାଉନହଲ-କଲ୍ୟାଣ ମଣ୍ଡପ କିମ୍ୱା ଷ୍ଟେସନରୋଡ଼ଠାରେ ପହଞ୍ଚିବେ | ସେଠି ମଟରସାଇକଲ ପାର୍କିଂ କରି ଖଲ୍ଲିକୋଟ କଲେଜ ଛକଠାରୁ ବିଜିପୁର ଛକରାସ୍ତା କଡ଼େ କବିତା ପାଠୋତ୍ସବ ଠାରୁ ଆରମ୍ଭ କରି ମେହେନ୍ଦୀ ଚିତା କୁଟା ଦେଖି ଘରକୁ ଫେରିବେ | ତେବେ ଏହା ବି ଏକ ଆନନ୍ଦ...... ନିତିଦିନିଆ ରୁଟିନର ଧରାବନ୍ଧା ବନ୍ଧନୀରୁ ସାମୟିକ ମୁକ୍ତିଲାଗି ଏକ ପ୍ରୟାସ .... | ଅନ୍ୟ ରାଜ୍ୟରେ ଖୁସି ପାଇଁ ମନ୍ତ୍ରଣାଳୟ ସୃଷ୍ଟି କରାଯାଉଥିବା ଅବସରରେ ଓଡ଼ିଶାର ସହରଗୁଡ଼ିକରେ ‘ରାହଗିରି’ ପାଳନର ପ୍ରାସଙ୍ଗିକତା ଆମେ କାହିଁକି ଖୋଜିବା..... ? ଅନ୍ତତଃ ବର୍ତ୍ତମାନ ପାଇଁ ଆମେ ଏଭଳି ଉତ୍ସବ ପାଳନର ରାଜନୀତିକ ଦିଗପ୍ରତି ଦୃଷ୍ଟି ଦେବାନି ..... | ତେବେ ଦଣ୍ଡନାଚ଼, ଠାକୁରାଣୀ ଯାତ୍ରାର ସହରରେ ‘ରାହଗିରି’ ହୁଏତ ଯୋଡ଼ିବ ମନୋରଞ୍ଜନର ଏକ ନୂଆ ଫର୍ଦ୍ଦ ..... |

ସଂବାଦ (ବ୍ରହ୍ମପୁର ସଂସ୍କରଣ) ୧୦ ଏପ୍ରିଲ୍ ୨୦୧୬ ରେ ପ୍ରକାଶିତ

Tradition of Holi in Berhampur / ବ୍ରହ୍ମପୁରରେ ହୋଲି ପରମ୍ପରା

ବ୍ରହ୍ମପୁରରେ ହୋଲି ପାଳନ ପରମ୍ପରା ବିଗତ ଅର୍ଦ୍ଧଶତାଦ୍ଦୀ ମଧ୍ୟରେ ସୀମାବଦ୍ଧ ବୋଲି କୁହାଯାଇପାରେ | #ବ୍ରହ୍ମପୁର ସହରର ଉତ୍ପତ୍ତି ଓ କ୍ରମବିକାଶକାଳରେ ଦକ୍ଷିଣାତ୍ୟ ସଂସ୍କୃତି ବଳବତ୍ତର ରହିଥିବା ଏବଂ ଦକ୍ଷିଣ ଭାରତରେ ହୋଲି ଲୋକପ୍ରିୟ ଉତ୍ସବ ନଥିବା କାରଣରୁ ହୋଲିଦ୍ୱାରା ଏଠାକାର ସଂସ୍କୃତିକ ଜୀବନ ପ୍ରଭାବିତ ହୋଇପାରି ନଥିଲା | ଅବଶ୍ୟ ମଠମନ୍ଦିରମୟ ଜନପଦରୂପେ ଗଢ଼ିଉଠିଥିବା ବ୍ରହ୍ମପୁରରେ ଦୋଳ ପୂର୍ଣ୍ଣିମା ଯାକଜମକରେ ପାଳିତ ହୋଇ ଆସୁଥିଲା | ସ୍ୱାଧୀନତା ପରବର୍ତ୍ତୀ କାଳରେ ଖଲ୍ଲିକୋଟ ମହାବିଦ୍ୟାଳୟର ସଂପ୍ରସାରଣ ତଥା ଇଂଜିନିଅରିଂ ସ୍କୁଲ, ସରକାରୀ ମହିଳା ମହାବିଦ୍ୟାଳୟ ଓ ଭେଷଜ ମହାବିଦ୍ୟାଳୟ ଇତ୍ୟାଦି ଶିକ୍ଷାନୁଷ୍ଠାନ ସ୍ଥାପନ ଫଳରେ ଉଚ୍ଚ ଶିକ୍ଷିତ ଛାତ୍ରଛତ୍ରୀଙ୍କ କୋଳାହଳ ଉତ୍ତରଭାରତ ତଥା ଉତ୍ତର ଓଡ଼ିଶାର ବଡ଼ ସହରଗୁଡ଼ିକରେ ଲୋକପ୍ରିୟ ହୋଲି ଖେଳ ଏଠାକାର ଯୁବ ସମାଜ ମଧ୍ୟରେ ଆଦୃତ ହୋଇ ପାରିଥିଲା | ଗତ ଶତାଦ୍ଦୀର ଷଷ୍ଠ ଦଶକରୁ ହିନ୍ଦୀ ଚଳଚ଼ିତ୍ର ଏବଂ ନବମ ଦଶକରୁ ଟେଲିଭିଜନ ସଂସ୍କୃତିର ପ୍ରସାର ଉତ୍ତର ଓ ପଶ୍ଚିମ ଭାରତରେ ଲୋକପ୍ରିୟ ପର୍ବ ହୋଲିକୁ ଏକ ସର୍ବଭାରତୀୟ ପର୍ବରେ ପରିଣତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲା | ବ୍ରହ୍ମପୁରର ସାଂସ୍କୃତିକ ଜୀବନ ମଧ୍ୟ ଏଥିରୁ ବାଦ ପଡ଼ିନଥିଲା |

          ସପ୍ତଦଶ ଶତାଦ୍ଦୀ ମଧ୍ୟଭାଗରେ ୧୬୬୨ ରୁ ୧୬୭୨ ଖ୍ରୀଷ୍ଟାଦ୍ଦ ମଧ୍ୟରେ ବର୍ତ୍ତମାନର ବଡ଼ବଜାର ଛକ ନିକଟସ୍ଥ ଦେଶୀବେହରା ସାହୀ ସମ୍ମୁଖରେ ମହୁରି ରାଜନଅର ପ୍ରତିଷ୍ଠା ପରେ ପରେ ରାଜବାଟୀକୁ ଘେରି ଜନବସତି ସ୍ଥାପନ ଫଳରେ ବ୍ରହ୍ମପୁର ସହର ଗଢ଼ି ଉଠିଥିଲା | ବ୍ରହ୍ମପୁରରେ ମହୁରି ରାଜଉଆସ ସ୍ଥାପନ ପରବର୍ତ୍ତୀ ଅବସ୍ଥାରେ ଆନ୍ଧ୍ର ପ୍ରଦେଶର ରାଜମହେନ୍ଦ୍ରୀ ଅଞ୍ଚଳରୁ ଦେବାଙ୍ଗ ସଂପ୍ରଦାୟର ବୁଣାକରମାନେ ବ୍ରହ୍ମପୁର ଆଗମନ କରିଥିଲେ | ସେ ସମୟରେ ପାଟବସ୍ତ୍ର ବୟନ ଏକ ଲାଭଜନକ ବୃତ୍ତିରୂପେ ପ୍ରତିଷ୍ଠା ଲାଭ କରିଥିଲା ଏବଂ ଦକ୍ଷିଣାଞ୍ଚଳରୁ ଆସିଥିବା ପରିବାରବର୍ଗ ପାଟବସ୍ତ୍ର ବୟନ ସମେତ ଅନ୍ୟାନ୍ୟ ବ୍ୟବସାୟରେ ମଧ୍ୟ ପାରଦର୍ଶିତା ଲାଭ କରିଥିଲେ | ୧୮୩୫ ଖ୍ରୀଷ୍ଟାଦ୍ଦରେ ମହୁରି ରାଜା ବ୍ରିଟିଶ ସରକାରଙ୍କୁ ସଲାମୀ କର ଦେଇ ନପାରିବା ହେତୁ ବ୍ରହ୍ମପୁର ସହରକୁ ଉକ୍ତ ସଲାମୀ ବକେୟା ଅର୍ଥ ବଦଳରେ ରାଜାଙ୍କଠାରୁ ଇଂରେଜ ସରକାର କିଣି ନେଇଥିଲେ | ୧୮୫୦ ଖ୍ରୀଷ୍ଟାଦ୍ଦରେ ବ୍ରହ୍ମପୁର ସମେତ ସମଗ୍ର ମହୁରି ରାଜ୍ୟକୁ ଇଂରେଜ ସରକାର ବାଜ୍ୟାପ୍ତ କରିଦେଇଥିଲେ | ଫଳରେ ଏଠାରେ କେତୋଟି ଜିଲ୍ଲାସ୍ତରୀୟ କାର୍ଯ୍ୟାଳୟ ସ୍ଥାପିତ ହୋଇଥିଲା | ପୂର୍ବରୁ ବାଣିଜ୍ୟପେଣ୍ଠ ରୂପେ ଗଢ଼ିଉଠିଥିବା ବ୍ରହ୍ମପୁରରେ ଦକ୍ଷିଣାଞ୍ଚଳରୁ ଆଗତ ପରିବାରବର୍ଗ ଆସ୍ଥାନ ଜମାଇଥିବାବେଳେ ମାଡ୍ରାସ ପ୍ରେସିଡ଼େନ୍ସି ଅଧୀନରେ ଏଠାରେ ସରକାରୀ କାର୍ଯ୍ୟାଳୟମାନ ସ୍ଥାପନ ଅବସରରେ ଦକ୍ଷିଣ ଭାରତୀୟ ରାଜକର୍ମଚ଼ାରୀମାନଙ୍କ ଆଗମନ ସହରରେ ଦାକ୍ଷିଣାତ୍ୟ ସାଂସ୍କୃତିକ ପାଣିପାଗ ପ୍ରସାରର କାରଣ ପାଲଟିଥିଲା | ଉତ୍ତର ଓଡ଼ିଶା ଓ ଉତ୍ତର ଭାରତୀୟ ସାଂସ୍କୃତିକ ବିଭବ ବ୍ରହ୍ମପୁର ସହରରେ ପ୍ରବେଶ ଲାଗି ୧୯୩୬ ଖ୍ରୀଷ୍ଟାଦ୍ଦରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ଯାଏଁ ଏହି ପରିସ୍ଥିତି ବାଧକ ସାଜିଥିଲା ବୋଲି ବିବେଚ଼ନା କରାଯାଏ |

          ତେବେ ସ୍ୱାଧୀନତା ପରବର୍ତ୍ତୀ ଅବସ୍ଥାରେ ହିନ୍ଦୀ ଚଳଚ଼ିତ୍ର ଓ ୧୯୮୨ ଖ୍ରୀଷ୍ଟାଦ୍ଦରୁ ଟେଲିଭିଜନ ପ୍ରସାରଣ ଆରମ୍ଭ ଦେଶର ଅନ୍ୟାନ୍ୟ ତୃତୀୟସ୍ତରୀୟ ସହରାଞ୍ଚଳ ଭଳି ବ୍ରହ୍ମପୁରରେ ନୂତନ ସର୍ବଭାରତୀୟ ସାଂସ୍କୃତିକଧାରା ପ୍ରସାରରେ ସହାୟକ ହୋଇପାରିଥିଲା | ହୋଲି ସାଙ୍ଗକୁ ରାକ୍ଷୀ, ଇଂରାଜୀ ନବବର୍ଷ, ସାର୍ବଜନୀନ ଦୁର୍ଗା ଓ ଗଣେଷ ପୂଜା ପାଳନ ଇତ୍ୟାଦି ସହରର ସାମାଜିକ ଜୀବନର ଅଙ୍ଗବିଶେଷରେ ପରିଣତ ହୋଇପଡ଼ିଥିଲା | ଦେଶର ଅନ୍ୟାନ୍ୟ ପ୍ରାନ୍ତ ଭଳି ବ୍ରହ୍ମପୁର ସହରରେ ମଧ୍ୟ ହୋଲି ଉତ୍ସବ ପାଳନ ଲୋକପ୍ରିୟ ହେବାରେ ଲାଗିଲା |

          ସ୍ୱାଧୀନତା ପ୍ରାପ୍ତି ପରବର୍ତ୍ତୀ ଅବସ୍ଥାରେ ଦେଶବିଭକ୍ତ କାଳରେ ବ୍ରହ୍ମପୁର ସହରକୁ ବଙ୍ଗାଳୀ, ଗୁଜରାତୀ ଓ ମାରୱାଡ଼ି ସଂପ୍ରଦାୟର କିଛି ପରିବାର ଆଗମନ କରିଥିଲେ | ଏମାନେ ମୁଖ୍ୟତଃ ବ୍ୟବସାୟକୁ ବୃତ୍ତିରୂପେ ଗ୍ରହଣ କରିଥିଲେ ଏବଂ ଖୁବ୍ କମ ସମୟମଧ୍ୟରେ ପ୍ରତିଷ୍ଠିତ ହୋଇପାରିଥିଲେ | ସହରରେ ଏମାନଙ୍କ ମଧ୍ୟରେ ପ୍ରଥମେ ହୋଲି ପାଳିତ ହୋଇଥିବା ଲକ୍ଷ୍ୟ କରାଯାଇପାରେ | ଦୀର୍ଘଦିନ ଧରି ଭାପୁର ବଜାର ନିକଟସ୍ଥ ମିଲଟାରୀ ଲାଇନ୍ସ ଅଞ୍ଚଳରେ ବସବାସ କରୁଥିବା ଗୁଜରାତୀ ପରିବାରବର୍ଗ ହୋଲି ଉତ୍ସବ ପୂର୍ବ ରାତିରେ ଧୂନୀ ଜାଳନ୍ତି | ସେ ଯାହାହେଉ, ହୋଲି ଆଜି ବ୍ରହ୍ମପୁରରେ ଏକ ସାର୍ବଜନୀନ ପର୍ବରେ ପରିଣତ ହୋଇଛି | ବିଶେଷକରି ସହରର ଶିଶୁ, ଯୁବ ଓ ମହିଳାମାନଙ୍କ ମଧ୍ୟରେ ହୋଲି ଲୋକପ୍ରିୟ ହୋଇପାରିଥିବା ଲକ୍ଷ୍ୟ କରାଯାଇପାରେ |

ସଂବାଦ (ବ୍ରହ୍ମପୁର ସଂସ୍କରଣ) ୨୩ ମାର୍ଚ୍ଚ ୨୦୧୬ ରେ ପ୍ରକାଶିତ