ଚଳିତ ସପ୍ତାହ ଶେଷରୁ ଦକ୍ଷିଣ ପଶ୍ଚିମ ମୌସୁମୀ ବାୟୁ ଭାରତରୁ ପ୍ରତ୍ୟାବର୍ତ୍ତନ ଆରମ୍ଭ କରିବା ଖବର ଶୁଣି ବ୍ରହ୍ମପୁରବାସୀ ଚମକି ପଡ଼ିବା ସ୍ୱାଭାବିକ । କାରଣ ଏବର୍ଷ ବର୍ଷାର ଅନୁଭୂତି ପ୍ରାୟ ସହରରେ ଅନୁଭୂତ ହୋଇ ନାହିଁ କହିଲେ ଚଳେ । ଯଦି ଦେଶରୁ ମୌସୁମୀ ବାୟୁ ଫେରୁଛି ତେବେ କ’ଣ #ବ୍ରହ୍ମପୁର ବର୍ଷା ଅଭାବଗ୍ରସ୍ତ ହୋଇ ରହିଯିବ ?
ପାଣିପାଗ
କ୍ୟାଲେଣ୍ଡରରେ ପ୍ରତିବର୍ଷ ଦକ୍ଷିଣ ପଶ୍ଚିମ ମୌସୁମୀ ଜୁନ ପହିଲାରେ କେରଳ ଦେଇ ୭ ରୁ ୧୪ ସୁଦ୍ଧା
ଓଡ଼ିଶା ପହଞ୍ଚୁଥିବା ସ୍ଥଳେ ସେପ୍ଟେମ୍ୱର ୧୭ ରୁ ରାଜସ୍ଥାନରୁ ପ୍ରଥମେ ଅପସାରିତ ହେବା ପରେ
ଅକ୍ଟୋବର ୧୪ରେ ଓଡ଼ିଶା ଛାଡ଼ିଥାଏ । ପାଣିପାଗ ବିଜ୍ଞାନୀମାନଙ୍କ ମତରେ ବଙ୍ଗୋପସାଗରରେ
ବାରମ୍ୱାର ଲଘୁଚାପ ସୃଷ୍ଟି କାରଣରୁ ଚଳିତ ବର୍ଷ ମୌସୁମୀ ଅପସାରଣ ପ୍ରକ୍ରିୟାରେ ସାମାନ୍ୟ
ବିଳମ୍ୱ ଘଟିଛି । ଓଡ଼ିଶାରୁ ମୌସୁମୀ ଅପସାରଣ ସଂପର୍କରେ କୌଣସି ଆକଳନ କରାଯାଇନଥିଲେହେଁ
ଅକ୍ଟୋବର ଦ୍ୱିତୀୟ ସପ୍ତାହ ଯାଏଁ କାଁ ଭାଁ ବର୍ଷା ଜାରୀ ରହିବା ଆଶା କରାଯାଏ ।
ଭୁବନେଶ୍ୱରସ୍ଥିତ
ଆଞ୍ଚଳିକ ପାଣିପାଗ କେନ୍ଦ୍ରର ହିସାବ ଅନୁଯାୟୀ ଜୁନ ପହିଲାରୁ ସେପ୍ଟେମ୍ୱର ୨୩ ତାରିଖ ମଧ୍ୟରେ
ଓଡ଼ିଶାରେ ୧୧୨୧.୫ ମିଲିମିଟର ବର୍ଷା ହୋଇଛି । ଏହାକୁ ସ୍ୱାଭାବିକ ପରିମାଣ କୁହାଯାଇପାରେ ।
ତେଣେ ଭାରତୀୟ ପାଣିପାଗ ବିଭାଗର ତଥ୍ୟ ଅନୁଯାୟୀ ବର୍ତ୍ତମାନ ସୁଦ୍ଧା ଦେଶରେ ୭ ପ୍ରତିଶତ ଅଧିକ
ବର୍ଷା ହୋଇଛି । ତେବେ ବ୍ରହ୍ମପୁରବାସୀଙ୍କ ପାଇଁ ଏଯାଏଁ ବର୍ଷା ଟେଲିଭିଜନ ପର୍ଦ୍ଦାରେ ଉତ୍ତର
ଓଡ଼ିଶା, ଆସାମ ବା ମୁମ୍ୱାଇରେ ବନ୍ୟାର ଭର୍ଚୁଆଲ ଅନୁଭୂତିରେ ହିଁ ସୀମାବଦ୍ଧ ।
ବ୍ରହ୍ମପୁରରେ
ପାଣିପାଗ ଇତିହାସକୁ ଅନୁଧ୍ୟାନ କଲେ ପ୍ରତିବର୍ଷ ଜୁନରୁ ସେପ୍ଟେମ୍ୱର ଦକ୍ଷିଣ-ପଶ୍ଚିମ ମୌସୁମୀ
ବାୟୁ ଓ ଅକ୍ଟୋବରରୁ ଡ଼ିସେମ୍ୱର ଉତ୍ତର-ପୂର୍ବ ମୌସୁମୀ ବାୟୁ ପ୍ରବାହରେ ସହରରେ ବର୍ଷା ହୋଇଥାଏ
। ଦକ୍ଷିଣ-ପଶ୍ଚିମ ମୌସୁମୀ ଜୁନ ୭ ତାରିଖ ସୁଦ୍ଧା ବ୍ରହ୍ମପୁର ପହଞ୍ଚୁଥିବା କୁହାଯାଉଥିଲେହେଁ
ଜୁନ ମାସରେ ଏଠାରେ ବର୍ଷା ହୁଏ ନାହିଁ । ଜୁଲାଇ ଓ ଅଗଷ୍ଟ ମାସରେ ବର୍ଷା ହୁଏ । ସମୟେ ସମୟେ
ବର୍ଷଣମୁଖର ଦିବସ ଗୁଡ଼ିକରେ ୩୦ ରୁ ୪୦ ମିଲିମିଟର ଯାଏଁ ବର୍ଷା ରେକର୍ଡ଼ କରାଯାଏ ।
ବ୍ରହ୍ମପୁରରେ
ମୌସୁମୀ ଋତୁ ଜୁନ ଠାରୁ ସେପ୍ଟେମ୍ୱର ମଧ୍ୟରେ ବର୍ଷାରହିତ ସମୟରେ ଆକାଶ ମେଘାଚ୍ଛନ୍ନ
ହୋଇପଡୁଥିବା କାରଣରୁ ଭୂମିସ୍ଥ ଉତ୍ତାପ ପୁନଃ-ବିକୀରଣ ହେତୁ ଦିନସାରା ଗୁଳଗୁଳି ଅନୁଭୂତ ହୁଏ ।
ଫଳରେ ସହରବାସୀ ବର୍ଷାଋତୁ ଥଣ୍ଡାର ମଜା ନେଇପାରନ୍ତି ନାହିଁ । ସାଧାରଣତଃ କୁମାର ପୂର୍ଣ୍ଣିମା
ଯାଏଁ ଏତାଦୃଶ ପାଣିପାଗ ଲାଗି ରହେ ଏବଂ କୁମାର ପୂର୍ଣ୍ଣିମାଠାରୁ ଶିବରାତ୍ରୀ ଯାଏଁ ଚାରିମାସ ଏକ
ରକମ ଗରମରୁ ଆଶ୍ୱସ୍ତି ମିଳେ ।
ବ୍ରହ୍ମପୁରରେ
ଲଘୁଚାପଜନିତ ବର୍ଷା ହିଁ ସହରକୁ ଜଳାର୍ଣ୍ଣବ କରିଥାଏ । ମୁଖ୍ୟତଃ ଆନ୍ଧ୍ର ପ୍ରଦେଶର ଉତ୍ତର
ଉପକୂଳ ବିଶାଖପାଟଣା-ଶ୍ରୀକାକୁଲମ ଲଘୁଚାପ ଆକ୍ରାନ୍ତ ହେଲେ ବ୍ରହ୍ମପୁରରେ ବର୍ଷାର ପ୍ରକୋପ
ବଢ଼ିଥାଏ । ଏତଦ୍ ବ୍ୟତୀତ ଗ୍ରୀଷ୍ମଋତୁର
ପ୍ରାକ-ମୌସୁମୀକାଳୀନ ଏପ୍ରିଲ ଓ ମେ ମାସରେ କାଳବୈଶାଖୀ ପ୍ରଭାବରେ ମଧ୍ୟ କେତେକ ଅପରାହ୍ନରେ
ଅଧଘଣ୍ଟାରୁ ଘଣ୍ଟାଏ ଲେଖାଁ ବର୍ଷା ମିଳିଥାଏ । ଉତ୍ତର-ପୂର୍ବ ମୌସୁମୀ ମୁଖ୍ୟତଃ ଚ଼େନ୍ନାଇର
କରମଣ୍ଡଳ ଉପକୂଳରେ ବର୍ଷା କରାଉଥିବା ସ୍ଥଳେ ବ୍ରହ୍ମପୁରର ଭାଗରେ ମଧ୍ୟ କିଛି ବର୍ଷା ପଡ଼େ ।
ଦକ୍ଷିଣ-ପଶ୍ଚିମ ମୌସୁମୀ ବାୟୁର ପ୍ରତ୍ୟାବର୍ତ୍ତନ ସମୟ ପାଖେଇ ଆସୁଥିବା ହେତୁ ବର୍ଷା ପାଇଁ ଚଳିତବର୍ଷ ବ୍ରହ୍ମପୁରକୁ ଉତ୍ତର-ପୂର୍ବ ମୌସୁମୀ ପ୍ରବାହ ଓ ଲଘୁଚାପକୁ ହିଁ ଅପେକ୍ଷା କରିବାକୁ ପଡ଼ିବ । ସହରର ବର୍ଷାର ଇତିହାସ ସେୟା କହେ !
